«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva

U prapahandysckim siužecie, jaki na dniach pakazali na biełaruskim telebačańni, źjaviŭsia były dobraachvotnik pałka Kalinoŭskaha Andrej Siarhiejeŭ. Ciapier jon za kratami. 

«Naša Niva» znajšła čałavieka, jaki słužyŭ razam ź im u pieršyja tydni paŭnamaštabnaha rasijskaha ŭvarvańnia va Ukrainu. Heta Alaksandr «Kuś» Kłačko — były dobraachvotnik bataljona «Vołat» Pałka Kalinoŭskaha i suzasnavalnik dabračynnaj arhanizacyi KUS u Litvie. My parazmaŭlali ź im pra Siarhiejeva — jak jon apynuŭsia ŭ dobraachvotnickim padraździaleńni i što mahło prymusić jaho viarnucca ŭ Biełaruś.

Sustrelisia ŭ pieršyja dni vajny

«Heta «Kot», — amal adrazu kaža Alaksandr Kłačko, kali my pakazvajem jamu fota Andreja Siarhiejeva. 

Jany paznajomilisia 5 sakavika 2022 hoda ŭ Javaraŭskim centry dla ŭciekačoŭ kala Lvova. Tudy źjechalisia biełarusy, jakija šukali mahčymaść trapić u Kijeŭ i abaranić jaho ad Rasii. Dobraachvotniki čakali mahčymaści vyjechać na front.

Praź niekalki dzion hrupu zabraŭ humanitarny kanvoj z Varšavy na čale z «Dziadźkam» — Paŭłam Šurmiejem. Praz błokpasty jany dabralisia da Lvova, dzie ich sustrakaŭ Siarhiej Bulba, a ŭžo 8 sakavika byli ŭ Kijevie.

«Viedaju, što ŭ saviecki čas Siarhiejeŭ słužyŭ u tankavych vojskach. 11 sakavika 2022 jon dasłoŭna skazaŭ mnie: «Tut za čatyry dni daviedaŭsia bolš, čym za čatyry hady ŭ vojsku», — zhadvaje Alaksandr Kłačko.

U kancy viasny 2022 hoda druhaja rota bataljona adpraviłasia na bajavyja zadačy na Mikałajeŭski kirunak. Z taho času ich šlachi razyšlisia.

«Pa čutkach, Siarhiejeŭ demabilizavaŭsia praz stan zdaroŭja — zdajecca, kavid padkasiŭ», — zhadvaje naš surazmoŭca. 

Pajechaŭ u Biełaruś na apieracyju

Apošni raz Alaksandr Kłačko bačyŭsia z «Katom» u Varšavie ŭ siaredzinie vieraśnia 2022 hoda.

«Ja tady viartaŭsia ź Vilni druhi raz na front, i «Kot» ź inšym dobraachvotnikam zachacieli sa mnoj sustrecca pierad darohaj», — kaža naš surazmoŭca. 

Mienavita padčas toj sustrečy Kłačko daviedaŭsia, što ŭ Siarhiejeva surjoznyja prablemy sa zdaroŭjem.

«Mahu pamylacca pa časie, ale tady ja daviedaŭsia, čamu byŭ vielmi ździŭleny, što ŭ «Kata» byli surjoznyja prablemy ź lohkimi. I jon ad biazvychadnaści źjeździŭ u Biełaruś, dzie jamu zrabili apieracyju i vydalili adno lohkaje. Paśla toj sustrečy ja bolš pra jaho nie čuŭ. Ale tady jašče padumaŭ pra jaho: jak ža ty budzieš žyć u emihracyi z padarvanym zdaroŭjem?» — kaža jon.

Pry hetym ryzyka dla čałavieka, jaki ŭžo paśpieŭ zaśviacicca ŭ biełaruskich miedyja jak dobraachvotnik, była vidavočnaja.

«Naš fotazdymak na lvoŭskim vakzale publikavaŭsia ŭ «Baście» [telehram-kanale]. Tamu situacyja sa zdaroŭjem, vidać, była sapraŭdy vielmi ciažkaja, kali jon rašyŭsia na takuju ryzyku», — miarkuje Alaksandr Kłačko. 

«Časam viartańnie na radzimu moža razhladacca adzinym vyjściem»

U prapahandysckim siužecie zajaŭlałasia pra mahčymyja prablemy «Kata» z ałkaholem.

Kłačko nie vyklučaje, što toj moh vypić, ale padčas słužby ničoha takoha nie bačyŭ.

«Na słužbie ja za im hetaha nie zaŭvažaŭ. Tak, dapuskaju, što moh lubić vypić. Ale takaja dumka ŭ mianie ŭźnikła ŭžo paśla našaj apošniaj sustrečy», — kaža naš surazmoŭca.

Pry hetym Kłačko charaktaryzuje byłoha pabracima jak čałavieka niaprostaha:

«Pa charaktary — maje ŭłasnaje mierkavańnie, ale składany — zaŭsiody spračaŭsia ź inšym savieckich časoŭ aficeram svajho ŭzrostu nakont vajskovych momantaŭ. My nie kanfliktavali, ale i blizkimi našy adnosiny nie byli».

«Viedajecie, ja časam dumaju, što dla biełarusaŭ z padarvanym zdaroŭjem u vymušanaj emihracyi, asabliva dla dobraachvotnikaŭ, pry adsutnaści sistemnaj dapamohi z boku dziaržaŭnych ci hramadskich arhanizacyj viartańnie dadomu moža zdavacca adzinym vyjściem, jak by heta prykra ni hučała. Navat kali hety dom siońnia akupavany režymam Łukašenki i Maskvoj», — reziumuje «Kuś».

• 1
• 0
• 0
• 5
• 0
• 18
• 2
• 0