Častku Jeŭropy nakryła mocnaja śpioka — až da 40°C

Značnuju častku Jeŭropy nakryła mocnaja śpiakota. U šerahu krain tempieratura pavietra nabliziłasia da 40 hradusaŭ, što prymusiła ŭłady abviaścić pavyšanyja ŭzroŭni niebiaśpieki i pryniać dadatkovyja miery biaśpieki, piša Reuters.

Zdymak ilustracyjny. Fota: magnific.com

Asabliva składanaja situacyja skłałasia ŭ Italii, dzie paśla niekalkich dzion haračyni bolš za 35 hradusaŭ čyrvony ŭzrovień niebiaśpieki byŭ abvieščany ŭ niekalkich bujnych haradach, u tym liku ŭ Bałońni, Fłarencyi, Miłanie i Turynie. U Rymie ludzi ratavalisia ad sonca pad parasonami navat padčas tradycyjnaj niadzielnaj malitvy Papy.

U Ispanii sinoptyki taksama vypuścili čyrvonyja i aranžavyja papiaredžańni. U mnohich rehijonach krainy i na vostravie Majorka tempieratura pieravyšaje 39—40 hradusaŭ. Pavodle prahnozaŭ, śpiakota zachavajecca jašče niekalki dzion.

U Hiermanii tempieratura miescami dasiahnuła 38 hradusaŭ. Adnačasova mietearołahi papiaredzili pra mocnyja navalnicy na ŭschodzie krainy. U Bierlinie z-za zaleŭ navat pierapyniali praviadzieńnie muzyčnaha fiestyvalu pad adkrytym niebam.

Pryčynaj anamalnaj śpiakoty stała haračaje pavietra z pustyni Sachara, jakoje ruchajecca na poŭnač pad upłyvam mahutnaha antycykłonu. Mietearołahi adznačajuć, što tak zvany «ciepłavy kupał» zatrymlivaje haračaje pavietra nad Zachodniaj i Centralnaj Jeŭropaj, što pryvodzić da dalejšaha rostu tempieratury.

Ad śpiakoty ciarpiać nie tolki ludzi, ale i žyvioły. U Bielhii ŭ centry dapamohi dzikaj pryrodzie paviedamlajuć pra vialikuju kolkaść ptušak i inšych žyvioł z prykmietami ciepłavoha stresu. Niekatoryja ptušaniaty navat pakidajuć hniozdy raniej času, kab vyratavacca ad pierahrevu.

Ekśpierty adznačajuć, što praź źmianieńnie klimatu chvali ekstremalnaj śpiakoty ŭ Jeŭropie stanoviacca ŭsio bolš častymi i intensiŭnymi.

Kamientary da artykuła