Rekordnaja dla maja śpioka ŭ Jeŭropie. U Łondanie +33°C i heta nie miaža

Brytanskaja mieteasłužba Met Office paviedamiła, što ŭ paniadziełak u łondanskim aeraporcie «Chitrou» była zafiksavana tempieratura 33,5°C — heta novy absalutny rekord dla maja ŭ krainie.

Papiaredni rekord u 32,8°C byŭ zafiksavany ŭ łondanskim rajonie Kemden 22 maja 1922 hoda, a ŭ haradach Choršem, Tanbrydž-Uełs na paŭdniovym uschodzie krainy i ŭ łondanskim Rydžents-parku takaja tempieratura taksama rehistravałasia 29 maja 1944 hoda.

Sinoptyki papiaredžvajuć, što ŭ aŭtorak tempieratura ŭ Vialikabrytanii moža dasiahnuć 35°C.

Minułaj nočču ŭ Łondanie byŭ taksama ŭstalavany papiaredni rekord samaj vysokaj načnoj tempieratury ŭ mai — 19,4°C.

Pavodle prahnozaŭ, najbližejšyja dni ŭ Vialikabrytanii, Francyi i Ispanii buduć ustalavany sotni novych majskich rekordaŭ.

U mnohich rehijonach tempieratura pieravyšaje klimatyčnuju normu adrazu na 12—15 hradusaŭ.

Francuzskaja słužba Météo France apisvaje toje, što adbyvajecca, jak «zaŭčasnuju, vyklučnuju i praciahłuju» chvalu śpioki, jakaja, jak čakajecca, zachavajecca jašče niekalki dzion.

Žyćcio na paŭzie

U Hłosteršyry ŭ paniadziełak z-za śpioki ledź nie admianili znakamityja štohadovyja syrnyja honki.

Heta tradycyjnaje spabornictva ŭ Vialikabrytanii prachodzić u apošni paniadziełak maja na krutym uzhorku Kupiera pablizu Hłostera. Sutnaść spabornictva ŭ tym, što ŭdzielniki biahuć, kulajučysia i padajučy, z 200‑mietrovaha schiłu ŭśled za hałoŭkaj syru «Dvajny Hłoster», sprabujučy jaje złavić.

Karespandent Bi-bi-si Endzi Chovard, jaki aśviatlaŭ spabornictvy doŭhija hady, kaža, što hetyja honki prachodzili pad drobnym daždžom, zalevami i ŭ chałodnaje nadvorje, ale nikoli — pry takich vysokich tempieraturach.

Miascovyja ŭłady aścierahalisia, što schił u takuju śpioku vielmi žorstki i traŭmaniebiaśpiečny dla ŭdzielnikaŭ, a ŭ hledačoŭ niedastatkova cieniu, kab prasiedzieć doŭhi čas biez ryzyki ciepłavoha ŭdaru.

Pavodle niekatorych paviedamleńniaŭ, arhanizataram jašče treba budzie patłumačyć, čamu jany ŭsio ž vyrašyli pravieści mierapryjemstva ŭ parušeńnie techniki biaśpieki.

A voś tradycyjnyja honki na asłach, jakija štohod prachodziać u hrafstvie Sarej u dni tradycyjnych dla kanca maja doŭhich vychadnych, u hetym hodzie admianili z-za ekstremalnaj śpioki.

Kłub Leatherhead Lions paviedamiŭ, što spabornictvy asłoŭ i vystava sabak nie adbuducca ź mierkavańniaŭ «dabrabytu i kamfortu žyvioł».

Pry hetym astatnija mierapryjemstvy — atrakcyjony, kirmaš i muzyčnaja prahrama — adbuducca pa płanie.

Sinoptyki papiaredžvajuć, što ŭ asobnych rajonach krainy tempieratura moža padniacca da 34°C, a ŭ samim Lezierchiedzie, dzie prachodziać honki, čakajecca kala 33°C.

Z-za rezkaha skačka spažyvańnia kala 500 damoŭ u hrafstvach Saseks i Kient siońnia zastalisia biez vady albo sutyknulisia z surjoznymi pierabojami ŭ padačy.

Kampanija South East Water pryniesła prabačeńni za situacyju, patłumačyŭšy prablemy «rezkim rostam popytu» pa ŭsioj sietcy na fonie anamalnaj śpioki.

Z-za pierabojaŭ z vodazabieśpiačeńniem u niekalkich nasielenych punktach Kienta adkryli punkt razdačy butylavanaj vady.

A što ŭ Jeŭropie?

Histaryčnaja śpiakota nakryła nie tolki Vialikabrytaniju — tempieraturnyja rekordy maja ŭ apošnija dni masava abnaŭlajucca pa ŭsioj Jeŭropie.

U Ispanii ŭ niadzielu zafiksavali 38°C.

U Francyi i Hiermanii tempieratura padniałasia da siaredziny 30‑hradusnaj adznaki, i sotni nasielenych punktaŭ paviedamili ab novych majskich rekordach.

U Francyi, Hiermanii, Šviejcaryi, Ispanii i paŭnočnaj Italii tempieratura zaraz pieravyšaje klimatyčnuju normu dla kanca maja adrazu na 10—15 hradusaŭ.

Pryčym sinoptyki papiaredžvajuć: biesprecedentnaja chvala śpioki, vierahodna, zachavajecca amal uvieś tydzień, a značyć, novyja rekordy jašče napieradzie.

Z čym źviazana anamalija?

Pavodle prahnozaŭ, ciapierašni cykł moža stać adnym z samych intensiŭnych za ŭsiu historyju nazirańniaŭ.

Pavodle adnoj ź viersij, heta moža być źviazana z El-Nińjo — pryrodnaj klimatyčnaj źjavaj, źviazanaj z paciapleńniem vady ŭ trapičnaj častcy Cichaha akijana.

El-Nińjo ŭźnikaje, kali tempieratura pavierchni akijana ŭ trapičnym Cichim akijanie padymajecca bolš čym na 0,5°C vyšej za normu. Heta ŭpłyvaje na nadvorje pa ŭsim śviecie i zvyčajna viadzie da rostu siaredniaj hłabalnaj tempieratury.

Na fonie śpioki ŭ Vialikabrytanii i Jeŭropie mnohija pačali zadavacca pytańniem: ci źviazana ciapierašniaja haračynia z El-Nińjo, jaki farmujecca?

Pa słovach sinoptykaŭ, karotki adkaz — nie.

Choć trapičnaja častka Cichaha akijana zaraz sapraŭdy prahravajecca niezvyčajna chutka, aficyjna El-Nińjo, vierahodna, abjaviać tolki praź miesiac. A jaho asnoŭnyja nastupstvy prajaviacca paźniej — u druhoj pałovie leta i ŭžo na praciahu 2027 hoda.

Dyk čym ža tłumačycca pryrodnaja anamalija ŭ Brytanii i inšych jeŭrapiejskich krainach?

Pavodle apošniaj dakłada Jeŭrapiejskaha sajuza ab stanie klimatu, Jeŭropa źjaŭlajecca samym chutkanahravanym kantynientam, i chvali śpioki zachłynajuć jaho ŭsio čaściej i intensiŭniej.

• 0
• 0
• 0
• 1
• 1
• 3
• 0
• 0