Siamiejnaja dynastyja z Samachvałavičaŭ pad Minskam vyroščvaje 30 tysiač raślin

Dziŭnuju historyju stvareńnia vialikaha sadu i hadavalnika raskazali vydańniu pristalica.by u ahraharadku Samachvałavičy Minskaha rajona. Tut žyvie Natalla — pradstaŭnica dynastyi sadoŭnikaŭ u trecim pakaleńni. Razam ź siamjoj jana vyroščvaje pładova-jahadnyja i dekaratyŭnyja raśliny, a jaje parady dapamahli źmianić sady na sotni ŭčastkaŭ. Natalla padzialiłasia tonkaściami: jak pravilna raźmiaścić drevy, čym pieramahčy murašak i čamu z pabiełkaj stvałoŭ lepš nie śpiašacca.

Siońnia ŭładańni Natalli ŭražvajuć. Na 15 sotkach u ahraharadku jana ź siamjoj vyroščvaje harškovyja i dekaratyŭnyja kultury: hartenziju, ružy, azalii, bružmiel, jaźmin, čarnapłodnuju rabinu i puzyrapłodnik.

U ciaplicach idzie čarankavańnie — tut narychtoŭvajuć budučyja sadžancy. A na asobnym poli płoščaj 10 hiektaraŭ raskinulisia pładovyja drevy i kusty: jabłyni, hrušy, kala 500 kustoŭ bujakoŭ piaci sartoŭ, maliny i parečki. Pačynali ž z 10 sotak i prykładna tysiačy sadžancaŭ pładovych, a zaraz u haspadarcy — amal 30 tysiač raślin.

«Pracujem usioj siamjoj z ranicy da poźniaha viečara. Vychadnyja — redkaść. Navat u doždž idziem u ciaplicy: tam čaranki, jakija potym rassadžvajem u kasiety — bujaki, hartenzija. Zaraz jakraz pieryjad čarankavańnia», — raskazvaje Natalla.

Praca siezonnaja: asnoŭny ŭpor — na vosień i viasnu. Uletku raśliny nabirajuć siłu, uzimku navodziać paradak i vyroščvajuć jełki.

Z čaho pačać uładkavańnie sadu: hleba i płaniroŭka

Da Natalli i jaje syna Ivana źviartajucca nie tolki pa sadžancy, ale i pa kansultacyi: jak pravilna vybrać raśliny, raźmiaścić ich na ŭčastku i dahladać, kab jany pładanosili. U svajoj spravie Natalla prytrymlivajecca dakładnaha płana. Pieršy krok — vyznačyć typ hleby na ŭčastku.

«Dla raślin važnaja dobraja ziamla chacia b na pieršyja try-čatyry hady, kab umacavałasia karaniovaja sistema. Hlina abo suhlinak — heta dobra, a piasok i torf — drenna», — tłumačyć Natalla.

Kali hleba biednaja, ekśpiertka raić ukłaści na dno pasadačnaj jamy hlinianuju padušku. Hlina pastupova źmiašajecca z hruntam i budzie žyvić raślinu niekalki hadoŭ, pakul jana padrastaje. Darečy, na hlinie cudoŭna rastuć ślivy i čarešni, a voś dla hartenzii i bujakoŭ abaviazkova patrebien kisły torf.

Nastupny etap — pradumać płaniroŭku: sadžać pa pierymietry abo advieści pad sad asobny ŭčastak, vyrašyć, jakija kultury i ŭ jakoj kolkaści buduć raści. I tut vielmi važna paraicca z čałaviekam-znaŭcam.

«Časta ludzi chočuć pasadzić adnu čarešniu. Ale niekatoryja drevy samabiaspłodnyja — im patrabujecca susied-apylalnik. Taksama treba ŭličvać aśvietlenaść i baki śvietu. Naprykład, višnia — kampaktnaja raślina, a čarešnia — mahutnaja. Nie sadžajcie čarešniu z poŭdnia pierad višniaj, bo jana razraściecca i zacienić susiedku», — papiaredžvaje Natalla.

Jašče adno praviła — sadžać pobač drevy adnaho vidu: jabłyniu da jabłyni, višniu da višni. Heta źviazana z apyleńniem. Pyłok pieranosiać nie tolki nasiakomyja, ale i viecier, i kali jon ź jabłyni trapić na višniu, uradžaju moža nie być. Da taho ž u kožnaj raśliny svaja para dla ćvietu.

Pabiełka — nie dla pryhažości

Apracoŭka sadu — nie mienš važny etap. Hałoŭnaje — vykonvać daziroŭku i ŭličvać uzrost raślin. Navički časta prymianiajuć na maładych sadžancach dozu, raźličanuju na darosłaje dreva, i raślina litaralna «zharaje».

«Ni ŭ jakim razie nielha kłaści śviežy hnoj u pasadačnuju jamu — karani zharać. I asobnaja balučaja tema — pabiełka maładych dreŭ. Da troch hadoŭ jaje nie prymianiajuć: u składzie jość vapna, a kara ŭ sadžanca dalikatnaja, jana zmorščycca. Łoŭčyja pajasy ad murašak taksama nie varta vykarystoŭvać u hety pieryjad (i lepš daŭžej), tamu što dreva moža atrymać apiok», — dzielicca vopytam Natalla.

Dla baraćby z muraškami siamja sadoŭnikaŭ rekamienduje preparaty «Muraškajed» i Bros, suprać tli — «BijaTlin» i «Aktara». A bialić stvały, na dumku Natalli, treba nie viasnoj, a pad zimu — dla abarony ad soniečnych apiokaŭ. I jašče bolš efiektyŭna zamiest pabiełki abmatać stvały biełym spanbondam.

Kamientary da artykuła