Pad Minskam žančyna stvaryła na 45 sotkach kvietkavaje karaleŭstva
Kali iści pa vioscy Abčak Minskaha rajona, mima adnaho dvara prajści niemahčyma. Tam zamiest zvyčajnych hradak — jarusy pivoń, klematysaŭ i chryzantem. Zamiest sumnaha hazona — łavanda i ampielny bambuk-hvaździk. Haspadynia hetaha kvietkavaha karaleŭstva — byłaja dyzajnierka Aksana Mišuk, jakaja 7 hadoŭ tamu pramianiała ofis na ziamlu i ciapier vyroščvaje bolš za 70 sartoŭ adnych tolki chryzantem, piša pristalica.by.
Što raście ŭ sadzie: ad palavoha łubinu da ampielnaha bambuka
U sadzie ŭ Aksany mnostva vidaŭ raślin. Naprykład, jość łubin, akvilehija roznych adcieńniaŭ. Siarod ulubioncaŭ haspadyni — pivoni, kasačy, dekaratyŭnaja cybula alium, vapnaŭka, klematys. Viasnoj raspuskajucca prymuły, krokusy, ciulpany. Niadaŭna źjaviŭsia i novy žychar — ahrościs, abo ampielny bambuk.
«Jaho dziela ekśpierymientu pačała vysadžvać. Jon padobny da travy, ale pryhoža źvisaje z harška. Dla zialonaj zony dakładna padydzie, abo dla čahości bolš strymanaha», — dzielicca paradaj Aksana.
Ale asnova kvietnika — viarhini. Na ŭčastku pradstaŭlenyja 6 sartoŭ: jość rannija i bolš poźnija, vyšynioj da 30 sm i da 60 sm. Adzin z ulubionych — sort «Čorny prync» z bardova-čornaj listotaj. A jość i vysokija, bolš za mietr, i takija iduć užo na zrezku.
Afarmleńnie pa ŭzroŭniach: jak uładkavanyja kłumby
Aksana padychodzić da pasadak jak dyzajnierka: jaje pryjom — raźmiaščać kvietki jarusami. Nižni ŭzrovień zajmajuć prymuły i krokusy. Krychu vyšej — lilejniki i chosta. Nad imi — karlikavaja jełka i tuja. A jašče vyšej padymajucca pivoni, mahnolija, bez i jaźmin. Tak atrymlivajecca šmatjarusnaja kłumba, raźbitaja na niekalki zon.
Kłopat bieź mituśni: padkormka i łajfchaki pa dohladzie
Padkormka dla ŭsich raślin vybudavanaja prosta i dakładna. Spačatku azot — dla pyšnaj listoty. Jak tolki zaviazvajecca kvietka, u chod iduć fosfarna-kalijnyja ŭhnajeńni (z palivam abo apyrskvańniem pa liście). Abaviazkovaja i apracoŭka ad škodnikaŭ i chvarob.
Maleńkaja chitraść: kali niama sił uhnojvać kožnuju kvietku asobna, ratuje prałanhavanaje ŭhnajeńnie. Jaho dastatkova padsypać u ziamlu, i jano budzie pavolna žyvić raśliny ŭvieś siezon.
Asobny kutok aharoda adviedzieny pad šałfiej, łavandu, kryničnik, hvaździki i mnostva chryzantem. Tut usie raśliny ŭkapanyja ŭ ziamlu prosta ŭ harškach — heta ŭśviadomleny krok, kab hrunt tam nie pierahravaŭsia i nie patrabavaŭ častaha palivu ŭ śpioku. Vykapać usio heta vosieńniu ciažka, a harščok dastać kudy praściej — tak Aksana zahadzia palahčaje sabie asiennija raboty.
Asablivaj uvahi zasłuhoŭvaje bujnakvietkavaja chryzantema. Jana čujna reahuje na daŭžyniu śvietłavoha dnia: čym karaciejšy dzień, tym chutčej farmujecca buton. Kab atrymać kvietki chacia b da kastryčnika, Aksana nakryvaje raśliny ščylnaj ciomnaj tkaninaj z 18 viečara da 10 ranicy.
Kvietkavyja ciaplicy: plusy i niuansy
Ciaplicy pastavili dla dalikatnych raślin, jakija bajacca choładu. Pry nizkich tempieraturach liście stanovicca fijaletavym, tamu ciepłalubnyja kultury (naprykład, łabieliju) Aksana źmiaščaje pad chovanku. Adziny minus — časty paliŭ. Ale plus značna važniejšy.
«U ciaplicy niama vietru, tam kvietki rastuć spakajniej. Na vietry raślina moža vyraści pad nachiłam, a ŭ ciaplicy jany stajać akuratnyja i pyšnyja. Palivać treba minimum raz na dzień».
Tym, što siadziać u kašpo, možna ładzić paliŭ praź dzień. Asablivaja ŭvaha — da raślin u čornych harškach: jany mocna nahravajucca, ziamla pierasychaje chutka, časam davodzicca padsiłkoŭvać navat dvojčy na dzień.
Top-3 raślin, jakija dakładna varta pasadzić
Na dumku Aksany, na ŭčastku abaviazkova pavinny być:
- Pivoni — kali chočacie razhalisty kust i ščodruju zielaninu.
- Hartenzija — kali honiciesia za efiektnaj kvietkaj.
- Chryzantemy — kali žadajecie mahutnaje pyšnaje ćvicieńnie.
- I, viadoma, łavanda: jana pryhoža raście i amal nie patrabuje dohladu.
Kala hoda tamu Aksana stała vyroščvać i pradavać sadovyja raśliny. Pieršymi dobra pajšli chryzantemy: minułaj vosieńniu pradała kala 300 raślin. Zaraz na ŭčastku kala 70 sartoŭ multyfłory, 20 bujnakvietkavych i dva vidy ampielnych.
Sioleta žycharka Abčaka vyrašyła pašyryć asartymient letnimi kvietkami — ad plušču i chosty da kalibrachoa i viarhiniaŭ. Tak chobi pierarasło ŭ spravu, dvor pieratvaryŭsia ŭ kvitniejučuju vitrynu, a aharod — u kvietkavyja abłoki.
«Nachabna ŭsio źniščyli». Minčanka ŭ šoku ad kvietkavych vandałaŭ u dvary
Parečki, vinahrad i navat piersiki. Minski piensijanier vysadziŭ mini-sad kala svajho padjezda
Na markietpłejsach stali pradavać pryhožyja raśliny, stvoranyja niejrasietkami. Jak abaranicca?
U Dziaržynskim rajonie našeście daŭhanosikaŭ. «U dom ni zajści, ni vyjści!»
«Chadziemcie ŭ sad? Ja pakažu vas ružam…» Sapraŭdny šedeŭr žančyna stvaryła na leciščy pad Maładziečnam
Jak pravilna abrazać hartenziju. I čym jana moža być karysnaja, akramia charastva
Ciapier čytajuć
«Ja supracoŭnik KDB, u vas buduć prablemy». Minčanka chacieła napisać skarhu ŭ optycy, ale supracoŭnica pakazała koračku18
Kamientary