Na Mahiloŭščynie likvidujuć ahrachołdynh, u jakim Łukašenka niekali svaryŭsia za «abasranych karoŭ»

Ahrachołdynh «Kupałaŭskaje» pad kryłom Kiraŭnictva spravami Łukašenki budzie likvidavany, a sielskahaspadarčyja pradpryjemstvy, jakija ŭvachodzili ŭ jaho skład, stanuć samastojnymi jurydyčnymi asobami. Takoje rašeńnie pryniata pa vynikach narady ŭ Alaksandra Łukašenki, pryśviečanaj raźvićciu Mahiloŭskaj vobłaści, piša BiełTA.

Karova, jakaja niekali ŭhniaviła Alaksandra Łukašenku. Skrynšot ź videa ANT

Pra pryniataje rašeńnie paviedamiŭ staršynia Mahiloŭskaha abłvykankama Anatol Isačanka. Pavodle jaho słoŭ, zamiest chołdynhu buduć dziejničać asobnyja haspadarki sa svaimi kiraŭnikami, štatam, terytoryjaj i raźlikovymi rachunkami. Sam ahrachołdynh budzie skasavany, a pradpryjemstvy pieradaduć u kamunalnuju ŭłasnaść.

U najbližejšy čas samastojnymi stanuć haspadarki «Novaharadziščanskaje», «Lubiničy-Ahra» i «Vialikija Słavieni».

Razam z tym Kiraŭnictva spravami Łukašenki praciahnie realizacyju ŭžo pačatych prajektaŭ. U Škłovie praciahniecca budaŭnictva sučasnaha małočnaha zavoda i ahraservisnaha kompleksu. Paśla ŭviadzieńnia ich u ekspłuatacyju taksama płanujecca pieradać hetyja abjekty ŭ kamunalnuju ŭłasnaść.

Jak adznačyŭ Isačanka, raniejšaja praca chołdynhu nibyta dazvoliła ŭmacavać materyjalnuju bazu haspadarak, ale ciapier dla ich dalejšaha raźvićcia bolš efiektyŭnaj ličycca samastojnaja madel kiravańnia.

Pavodle słoŭ Łukašenki, pieršapačatkova ahrachołdynh stvaraŭsia, kab zabiaśpiečyć syravinaj novy małočny zavod u Škłovie. Adnak zadumany farmat pracy nie apraŭdaŭ čakańniaŭ, tamu było pryniata rašeńnie viarnucca da asobnaha funkcyjanavańnia haspadarak. Pry hetym jany i nadalej buduć pastaŭlać małako na novy zavod u Škłovie, miasa — na Mahiloŭski miasakambinat, a lon — na madernizavany lnozavod.

Ahrachołdynh «Kupałaŭskaje» byŭ stvorany ŭ červieni 2017 hoda pavodle ŭkaza № 232 «Ab stvareńni haspadarčaha tavarystva». U jaho skład uvajšli abjadnanyja akcyjaniernyja tavarystvy Škłoŭskaha rajona — «Amkador-Škłoŭ», «Vialikija Słavieni» i «Novaharadziščanskaje».

Płanavałasia, što chołdynh stanie placoŭkaj dla ŭkaranieńnia sučasnych ahrarnych technałohij, adnak hetyja nadziei nie apraŭdalisia. Mienavita ŭ adnoj z haspadarak chołdynhu ŭ sakaviku 2019 hoda adbyŭsia šyroka viadomy vypadak, kali Łukašenka źviarnuŭ uvahu na «abasranuju karovu» i nazvaŭ fiermu, dzie jana ŭtrymlivałasia, «Aśviencimam». Paśla hetaha svaje pasady stracili tahačasnyja ministr sielskaj haspadarki i charčavańnia Leanid Zajac i vice-premjer Michaił Rusy.

U 2020 hodzie Kamitet dziaržaŭnaha kantrolu adznačaŭ, što miery pa raźvićci «Kupałaŭskaha» akazalisia nieefiektyŭnymi, a asnoŭnyja pakazčyki pradpryjemstva paharšalisia. Pradpryjemstvu nieadnarazova musili akazvać dziaržaŭnuju padtrymku. 

Kamientary da artykuła