Stała viadoma, što ciapier z hurtam Akute

U 2022 hodzie mahiloŭski hurt Akute vypuściŭ svoj šosty i na hety momant apošni albom «Napałovu tut». Z taho času — poŭnaja cišynia. Što ž zdaryłasia z hurtam — zadajucca pytańniem fanaty.

Raman Žyharaŭ i Staś Mytnik. Fota: @akutemusic / Instagram

«Hurt na paŭzie», — raspaviali «Našaj Nivie» abaznanyja krynicy.

Pry hetym vakalist i hitaryst Staś Mytnik sabraŭ pad siabie novy prajekt — jaho kancepcyja i nazva pakul trymajucca ŭ sakrecie. Ale ŭžo viadoma, što, u adroźnieńnie ad Akute, jon ruskamoŭny.

Prynamsi, na ruskaj movie hučyć kavałak pieršaha źlitaha ŭ sieciva treka. Pa pieršym uražańni ad jaho padajecca, što praciahvaješ słuchać stary dobry dyska-dekadans ad Akute, ale ŭžo nie ź biełaruskaj lirykaj i z novymi tvarami na fonie.

Nakolki zaciahniecca paŭza ŭ dziejnaści Akute, niajasna — tym bolš, hałoŭnyja ruchaviki pracesaŭ ciapier žyvuć u roznych krainach, što ŭskładniaje tvorčaje supracoŭnictva. Staś zastajecca ŭ Biełarusi, a Raman Žyharaŭ znachodzicca ŭ Polščy. Tudy ž pierajechała i eks-bubnačka Vicky Fates, partyi jakoj siońnia možna pačuć u hrupie Biaz Nazvy. Ale ciešyć, što pra kaniec Akute havorki pakul nie idzie.

Kamientary da artykuła