Śpiavak Ap$ent vypuściŭ novuju pieśniu na biełaruskaj movie. I paabiacaŭ, što takich budzie bolš
Biełaruski muzyka Ap$ent (Arsienij Kiślak) vypuściŭ novuju pieśniu na biełaruskaj movie «Ślady» 29 traŭnia. U razmovie z telekanałam «Biełsat» jon anansavaŭ jašče bolš biełaruskamoŭnych piesień i raskazaŭ, što dahetul nie adčuvaje siabie zorkaj.
«Mnie padabajecca, jak hučyć biełaruskaja mova»
Ap$ent kaža, što napisaŭ «Ślady» na biełaruskaj movie prosta tamu, što heta prynosić jamu zadavalnieńnie:
«Mnie padabajecca, jak heta hučyć, adčuvajecca dačynieńnie da reanimavańnia biełaruskaj kultury. Usio ž ja biełarus, mnie padabajecca biełaruskaja kultura, ja jaje pavažaju, caniu. I kali ja dziejač kultury, značycca, pavinien taksama ŭnosić niejkuju leptu. Praŭda?»
Niekatoryja sa svaich piesień muzyka nazyvaje «Frankienštejnami», tamu što jany pisalisia častkami i mohuć być źviazanyja z roznymi pieryjadami žyćcia. «Ślady» ž atrymalisia adrazu, praŭda, z muzykaj było niaprosta.
«Ja zrabiŭ piać roznych aranžyrovak, kab zrazumieć, jakoha nastroju pavinna być hetaja pieśnia: ad rehi da epičnaj instrumientalnaj. U mianie jość pieśni, jakija čakajuć svajho vychadu navat 20 hadoŭ. I kali zjaŭlajecca biełaruskamoŭnaja pieśnia, ja starajusia jaje chutčej zrabić, bo mnie padabajecca, jak hučyć biełaruskaja mova. Navat dla ruskamoŭnych, jakija pavažajuć inšyja kultury, heta hučyć jak zamiežnaja muzyka», — kaža Ap$ent.
Surazmoŭca adznačaje, što i jahonaja žonka Maryja była inicyjataram taho, kab pieśnia «Ślady» była daroblenaja i vyjšła raniej za inšyja:
«Kožny dzień ja niejkija novyja materyjały pišu, časam pakazvaju i hetak dalej. Jana niešta čuje i kaža «voś heta treba vypuścić». Ja nie supraciŭlajusia, dla mianie vialikaj roźnicy niama, što vypuskać. Kali druhi hołas zjaŭlajecca za hetuju pieśniu, ja pačynaju nad joj pracavać».
«Jak byccam sutnaść tvorčaści trošački pamianiałasia»
Pry hetym vialikaha fidbeku ad aŭdytoryi «Ślady» nie vyklikali, pryznajecca muzyka, adnak jon nie sumuje.
«Pry raniejšych abjomach, viadoma, heta vyhladaje nie tak mocna, ale ja ž zadekłaravaŭ u Threads, što budu iści da miljarda [prasłuchoŭvańniaŭ. — Red] ź biełaruskamoŭnaj pieśniaj. Hetaja nie miljard, ale, moža, nastupnaja budzie miljard. Ja apošnim časam nie zacyklivajusia na ličbach. Baču, mnohija muzyki kamientujuć: «mała ličbaŭ, mała ličbaŭ». Jak byccam sutnaść tvorčaści trošački pamianiałasia. Usie za ličbami honiacca, a nie za samavyjaŭleńniem», — praciahvaje Ap$ent.
Jon kaža, što ŭžo atrymaŭ papularnaść, i ŭ cełym maje vialikija pakaźniki na YouTube, u tym liku za košt pieśni «Možna ja z taboj», tamu ciapier fakusujecca jakraz na camavyjaŭleńni.
«Ciapier usie fidbeki nie asabliva mocnyja. Pa-pieršaje, YouTube u Rasii zabłakavany, a ŭ mianie tam šmat słuchačoŭ. Pa-druhoje, na biełaruskaj movie taksama adrazu advalvajecca vialikaja kolkaść ludziej. Pa-treciaje, styl. Vielmi šmat ludziej padpisałasia [u sacsietkach i na roznych servisach. — Red.] paśla «Možna ja z taboj». Mabyć, jany siadziać i čakajuć, što ja napišu druhuju «Možna ja z taboj».
Kali na ličbach nie zacyklivacca, to, moža, z časam heta ŭsio roŭna pryniasie vyniki. Niachaj pryvykajuć. Biełaruskamoŭnych piesień budzie bolš!», — kaža muzyka.
«Pa-anhlijsku śpiavać ja niešta saromiejusia»
Pry hetym ruskamoŭny materyjał, jaki ŭžo jość, ale nie vyjšaŭ, taksama ŭbačyć śviet. Mahčyma, heta budzie adzin albom abo asobnyja pieśni.
«Ja heta nazyvaju padhrebci chvasty. Ja rychtavaŭsia. U niejki momant ja zrazumieŭ, što huču drenna, i mnie daviałosia pavučycca, kab hučańnie vyjšła na inšy ŭzrovień. Chaču hetuju pracu darabić», — havoryć śpiavak.
Jon adznačaje, što siarod novych piesień moža zjavicca navat pieśnia na polskaj movie.
«Pa-anhlijsku śpiavać ja niešta saromiejusia. Słuchaju, jak astatnija śpiavajuć pa-anhlijsku, i heta niejak hučyć nie aŭtentyčna, druhasna, ja b navat skazaŭ. Adzinaja mova, na jakoj biełarusy razmaŭlajuć biez akcentu — heta biełaruskaja. Chočacca hučać maksimalna naturalna», — adznačaje jon.
Pad kaniec hutarki muzyku nahadali, što dva hady tamu jon raskazaŭ «Zierkału», što nie adčuvaje siabie zorkaj. Heta zastałosia niaźmiennym, kaža Ap$ent:
«Ja prosta nie razumieju, što aznačaje adčuvać siabie zorkaj. Voś u subotu zajšoŭ u adnu ŭstanovu — dziaŭčyna padyšła, byłaja palitźniavolenaja, padziakavała za pieśniu. U bar chadziŭ — fotkalisia sa mnoj ludzi.
Ja jak byccam nie razumieju hetaha. Nie staić u mianie pad voknami tysiača čałaviek i nie skanduje «Ap$ent, Ap$ent». Ja nie viedaju, jak naohuł ludzi ŭsprymajuć siabie zorkaj, što heta značyć? Ja zajmajusia tvorčaściu, a nie samalubavańniem».
Śpiavak Ap$ent: U adroźnieńnie ad viasiołkavych poni kštałtu Kaleśnikavaj ja nikoli nie zabudu žeść 2020‑2022 hadoŭ
Śpievaka Ap$ent abvinavacili, što jon kinuŭ muzykaŭ na hrošy. U taho inšaja viersija
AP$ENT zajaviŭ, što bolš nie budzie vypuskać pieśni pa-biełarusku: «jany kiepska forsiacca»
AP$ENT vydaŭ chit «Možna ja z taboj» na anhielskaj
Ciapier čytajuć
«Ni tady, ni siońnia ja nie liču, što zrabiŭ štości kiepskaje». Dziadok ščyra raskazaŭ pra byłyja adnosiny z 16‑hadovaj dziaŭčynaj7
Kamientary
https://dck8xvlq18iei.cloudfront.net/353530 ("Historyk Cimoch Akudovič razvažaje, jak pryciahvać ludziej da biełaruskaści i čym tut karysnyja ruskamoŭnyja prajekty")