Rasija ŭdaryła dniom pa Zaparožžy i vakolicach

Rasijskija vojski nanieśli čarhovyja ŭdary pa Zaparožžy i Zaparožskim rajonie. U vyniku ataki ŭ abłasnym centry paciarpieli try čałavieki, a ŭ siale Ležyna ratavalniki praviarajuć infarmacyju pra mahčymych ludziej pad zavałami razburanych budynkaŭ, piša «Ukrainskaja praŭda».

Fota ilustracyjnaje

Pa słovach kiraŭnika Zaparožskaj abłasnoj vajskovaj administracyi Ivana Fiodarava, spačatku rasijski bieśpiłotnik udaryŭ pa terytoryi pradpryjemstva charčovaj pramysłovaści ŭ Zaparožžy. U vyniku ataki ŭźnik pažar: zaharelisia vytvorčyja pamiaškańni i aŭtamabili.

Miedycynskaja dapamoha spatrebiłasia trom paciarpiełym — 33‑hadovaj žančynie, a taksama mužčynam va ŭzroście 25 i 41 hoda. Infarmacyi pra ich stan pakul nie paviedamlajecca.

Kala 16:50 miascovyja ŭłady papiaredzili žycharoŭ Zaparožskaj vobłaści pra pahrozu novych udaraŭ kiravanymi avijacyjnymi bombami.

Nieŭzabavie stała viadoma, što rasijskaja avijacyja naniesła ŭdar kiravanymi avijabombami pa siale Ležyna ŭ Zaparožskim rajonie. Pavodle papiarednich źviestak, u vyniku razbureńnia žyłych damoŭ pad ich zavałami mohuć znachodzicca ludzi. Na miescy pracujuć ekstranyja słužby, praciahvajucca pošukava-vyratavalnyja raboty, udakładniajucca maštaby razbureńniaŭ i kolkaść paciarpiełych.

Kamientary da artykuła