Biełaruś papiaredziła Polšču pra nibyta rychtavany na jaje terytoryi terakt
Biełaruski bok paviedamiŭ Polščy pra mahčymuju padrychtoŭku terarystyčnaha akta na polskaj terytoryi. Adpaviednaja infarmacyja była pieradadziena ŭ Ministerstvie zamiežnych spraŭ Biełarusi padčas sustrečy z časovym pavieranym u spravach Polščy ŭ Biełarusi Kšyštafam Ažanaj, paviedamiła pres-słužba MZS.
Ministerstva ŭnutranych spraŭ Biełarusi. Fota: Belarus.by
Jak paviedamlajecca, źviestki pra mahčymy terakt biełaruskaje MZS atrymała ad siłavych struktur u miežach damoŭlenaściaŭ ab supracoŭnictvie ŭ baraćbie sa złačynnaściu.
Pavodle pieradadzienaj infarmacyi, mierkavany arhanizatar rychtavanaha napadu — čałaviek, jaki znachodzicca ŭ Polščy i raniej byŭ asudžany ŭ Biełarusi pa niekalkich artykułach Kryminalnaha kodeksa. Paviedamlajecca, što niadaŭna polskija ŭłady pazbavili jaho dadatkovaj abarony i prava žyć u krainie.
Biełaruski bok śćviardžaje, što metaj mahčymaha napadu mohuć stać niepaŭnaletnija dzieci biełaruskaj aktyvistki, jakaja žyvie ŭ Polščy. Matyvam nibyta pavinna stać pomsta za toje, što žančyna, pavodle viersii biełaruskich uładaŭ, niedastatkova spryjała zachavańniu dla hetaha čałavieka adpaviednaha statusu ŭ Polščy.
Pradstaŭniku polskaj dypłamatyčnaj misii taksama paviedamili, što dadatkovaja infarmacyja pa hetym pytańni pry nieabchodnaści budzie pieradavacca praz kanały ŭzajemadziejańnia pamiž kampietentnymi orhanami dźviuch krain.