U Biełarusi praciahvaje raści kolkaść elektramabilaŭ i zaradnych stancyj

U Biełarusi ŭ lipieni 2026 hoda praciahnuŭsia rost parka elektratranspartu i sietki elektrazaradnych stancyj. Pavodle danych Biełaruskaj asacyjacyi raźvićcia elektratranspartu (BETA), na kaniec miesiaca ŭ krainie byli zarehistravanyja 65 551 elektramabil i hibryd, što na 5,2% bolš, čym miesiacam raniej.

Fota: Lookby.media

Z pačatku 2026 hoda kolkaść aŭtamabilaŭ na novych vidach paliva pavialičyłasia na 16 tysiač, abo na 32,2%. Pry hetym kala 68% pryrostu prypała na całkam elektryčnyja aŭtamabili, a jašče 32% — na hibrydnyja madeli.

U ahulnym parku takoha transpartu pieravažajuć elektramabili. Ich naličvajecca 46 176, što składaje 70% ad ahulnaj kolkaści. Hibrydnych aŭtamabilaŭ zarehistravana 19 375, abo kala 30%.

Praciahvaje raźvivacca i infrastruktura dla zaradki elektratranspartu. Za lipień kolkaść elektrazaradnych stancyj usich apierataraŭ pavialičyłasia na 4,3% i dasiahnuła 2 307. Ź ich 1 758, abo bolš za try čverci, — heta chutkasnyja zaradnyja stancyi, a jašče 549 — pavolnyja.

Pavodle prahnozaŭ, da kanca 2026 hoda kolkaść elektramabilaŭ u Biełarusi moža vyraści da 75 tysiač, što budzie prykładna na 51% bolš, čym hodam raniej.

Kamientary da artykuła