Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana
Pošuki praciahvajucca amal tydzień.
Maksim Palanski i Mikałaj Śvirydaŭ. Fota: magadan.by
Troje daśviedčanych turystaŭ — dvoje ź Biełarusi i adzin ź Litvy — źnikli ŭ harach Kyrhyzstana paśla ŭzychodžańnia na pik Karumdu. 1 žniŭnia a 10:30 jany padnialisia na viaršyniu. Išli paŭnočnym hrebieniem. 2 žniŭnia paviedamili, što 4 žniŭnia buduć hatovyja da vyjezdu. Bolš suviazi nie było. Kiroŭca pryjazdžaŭ u damoŭlenaje miesca 4 i 5 žniŭnia, ale hrupa nie vyjšła.
Maksimu Palanskamu 43 hady. Jon žyvie ŭ Kałodziščach. Skončyŭ fakultet radyjotechniki i elektroniki Biełaruskaha dziaržaŭnaha ŭniviersiteta infarmatyki i radyjoelektroniki. Pa prafiesii — inžynier-kanstruktar.
Maksim lubić aktyŭny adpačynak. Jon šmat padarožničaŭ pa Biełarusi na rovarach, bajdarkach, łyžach i pieššu. Jeździŭ i za miažu ŭ hory.
60‑hadovy Mikałaj Śvirydaŭ z Salihorska. Maje vyšejšuju techničnuju adukacyju, pracuje inžynieram.
Mikałaj Śvirydaŭ. Fota ź jahonaha fejsbuka
U Mikałaja zvańnie kandydata sportu pa turyźmie i pieršy razrad pa alpiniźmie (prynamsi na 2016 hod). Zajmajecca alpinizmam z maładości i sam vodzić ekśpiedycyi. Akramia hetaha, biehaje marafony, chodzić u šmatdzionnyja pachody i spłaŭlajecca pa rekach.
Abodva mužčyny majuć tytuł «Śniežny bars», to-bok jany padnialisia na ŭsie piać siamitysiačnikaŭ, raźmieščanych na terytoryi byłoha SSSR.
Adkryty hrašovy zbor na dapamohu ŭ pošuku.