Stali viadomyja padrabiaznaści ataki dronaŭ na hruzaviki na rasijska-biełaruskaj miažy

Nastupstvy ataki bieśpiłotnikaŭ na hruzavyja aŭtamabili na rasijska-biełaruskaj miažy možna pabačyć na videa. Videazapis zdareńnia apublikavała tureckaje infarmacyjnaje ahienctva IHA, a źniali jaho tureckija kiroŭcy, jakija stali śviedkami ataki, piša Reform.news.

Skrynšot ź videa

Na kadrach bačnaja fura, jakaja haryć na ŭzbočynie, a taksama hruzavik z paškodžanaj kabinaj na stajancy kala miažy. Adzin z kiroŭcaŭ raskazvaje, što bieśpiłotnik trapiŭ u aŭtamabil, paśla čaho jon zahareŭsia. Pavodle jaho słoŭ, ludzi apynulisia litaralna ŭ epicentry bajavych dziejańniaŭ i byli vymušanyja ŭciakać. Jon taksama śćviardžaje, što heta ŭžo była treciaja ci čaćviortaja mašyna, pa jakoj nanieśli ŭdar.

Pavodle infarmacyi tureckich ŚMI, u vyniku ataki jość zahinułyja i paranienyja, siarod ich hramadzianie Irana i Biełarusi.

Raniej paviedamlałasia, što punkt propusku «Čyrvony Kamień» na rasijska-biełaruskaj miažy časova nie pracavaŭ paśla ataki bieśpiłotnikaŭ. U vyniku ŭdaru zaharelisia dźvie fury.

Śviedki zdareńnia raskazali, što spačatku bieśpiłotniki atakavali dva iranskija hruzaviki, paśla čaho byŭ paškodžany biełaruski aŭtamabil. Adzin z tureckich kiroŭcaŭ zajaviŭ, što padčas ataki, pavodle jaho nazirańniaŭ, byli paranienyja dvoje biełaruskich vajskoŭcaŭ. Sami tureckija kiroŭcy zdoleli pakinuć niebiaśpiečnuju zonu.

Skrynšot ź videa

Jašče adzin vidavočca paviedamiŭ, što ataka pačałasia prykładna a 7‑j hadzinie ranicy, kali mnohija kiroŭcy jašče spali ŭ svaich mašynach. Paśla vybuchaŭ kala iranskich hruzavikoŭ ludzi ŭbačyli nad saboj bieśpiłotniki i pasprabavali źjechać sa stajanki. Pa darozie jany zaŭvažyli, što ŭdary pryjšlisia i pa inšych aŭtamabilach.

Kamientary da artykuła