Daŭhi jeŭrapiejskaha biznesu Dźmitryja Skindzierava, jakoha Litva pazbaŭlaje prytułku, dasiahnuli 354 tysiač jeŭra
Kampanija Bovaja demanstruje cudy admoŭnaha rostu.
Dźmitryj Skindzieraŭ
«Naša Niva» aznajomiłasia z buchhałtarskaj spravazdačnaściu kampanii UAB Bovaja za 2025 hod. Jaje suzasnavalnikam źjaŭlajecca pradprymalnik ź Viciebska Dźmitryj Skindzieraŭ, u jakim Litva niadaŭna ŭbačyła pahrozu nacyjanalnaj biaśpiecy.
«Naša Niva» pryśviačała jamu padrabiaznaje rasśledavańnie.
Čytajcie taksama: Što za Dźmitryj Skindzieraŭ, jaki abviaściŭ vajnu Cichanoŭskaj? Supracoŭnictva z HUBAZiKam, daŭhi ŭ Biełarusi, daŭhi ŭ Litvie
Litva paličyła fihuranta rasśledavańnia «Našaj Nivy» Skindzierava pahrozaj nacyjanalnaj biaśpiecy i źbirajecca pazbavić statusu ŭciekača
Buchhałtarskaja spravazdačnaść kampanii UAB Bovaja pakazvaje, što vyručka kampanii rasła:
- 66 tysiač jeŭra ŭ 2022 hodzie
- 141 tysiača jeŭra ŭ 2023 hodzie
- 722 tysiačy jeŭra ŭ 2024 hodzie
- 992 tysiačy jeŭra ŭ 2025 hodzie.
Pry hetym, nie było nivodnaha hodu, kali b kampanija spracavała ŭ plus:
- minus 59 tysiač jeŭra ŭ 2022 hodzie
- minus 25 tysiačy jeŭra ŭ 2023 hodzie
- minus 126 tysiač jeŭra ŭ 2024 hodzie
- minus 67 tysiač jeŭra ŭ 2025 hodzie.
Na kaniec 2025‑ha kampanija źjaŭlałasia techničnym bankrutam z aktyvami na 101 tysiaču jeŭra (unutry jakich pałova — debitorskaja zapazyčanaść), a daŭhoŭ mieła na 354 tysiačy jeŭra.
Admoŭny kapitał, takim čynam, minus 253 tysiačy jeŭra, što amal u dziesiać razoŭ bolš za sumu statutnaha kapitału kampanii.
Pa litoŭskich zakonach pry nastupleńni takoj situacyi kampanija pavinna na praciahu troch miesiacaŭ sklikać akcyjanieraŭ i albo vyrašyć prablemu, albo likvidavacca. Ale ŭ kampanii, dzie Skindzieraŭ suŭładalnik, takoha nie adbyvajecca. Mahčyma, jana pa sutnaści — prakładačnaja.
U joj pracujuć (zastrachavanyja) tolki dva čałavieki na minimalnych zarobkach pa 532 jeŭra.
Buchhałteryja kampanii za 2025 hod zdavałasia aby-jak i analizavać jaje składana: adnolkavyja hrafy dublujucca z roznymi ličbami ŭ ich. Kali vieryć adnym źviestkam, to kožnuju mašynu kampanija pradavała amal u vosiem razoŭ daražej za sabiekošt (što niejmavierna), kali vieryć inšaj — to rentabielnaść kala nula ci ŭ minus.
Ciapier na bałansie kampanii znachodzicca 11 mašyn — u asnoŭnym niedarahija francuzskija małalitražki, jany ž vystaŭleny na sajcie kampanii.
Taksama ŭ 2025 hodzie kampanija źmianiła jurydyčny adras. Ciapier jana apynułasia na tym samym adrasie, na jakim funkcyjanuje adna sa słužbaŭ pasolstva Rasii. Ale heta nie bolš čym supadzieńnie: tam ža dziejničaje kampjutarny kłub.
Dźmitryj Skindzieraŭ — biznesmien ź Viciebska, jaki sprabavaŭ dałučycca da vilenskaha štaba Śviatłany Cichanoŭskaj vosieńniu 2020-ha, paśla viarnuŭsia ŭ Biełaruś i znoŭ pakinuŭ jaje ŭ 2021-m.
Vyjezd ź Biełarusi supaŭ z nazapašvańniem hihanckich pazyk ad niaŭdałych biznes-prajektaŭ. Raniej ža Skindzieraŭ byŭ sudzimy za vymahalnictva.
Uvahu Skindzieraŭ pryciahnuŭ svaimi dziejańniami, skiravanymi na raskoł biełaruskaj dyjaspary.