Što za Dźmitryj Skindzieraŭ, jaki abviaściŭ vajnu Cichanoŭskaj? Supracoŭnictva z HUBAZiKam, daŭhi ŭ Biełarusi, daŭhi ŭ Litvie
Niejki małaviadomy biełarus prosta ŭ centry Vilni kinuŭsia z kułakami na daradcu Cichanoŭskaj. Jon ža vylez pad telekamiery na sustrečy z vyzvalenymi palitviaźniami, kab abvinavacić Cichanoŭskuju ŭ pracy na KDB. Prapahanda nie naradujecca! Ale padrabiaznaje vyvučeńnie bijahrafii zbankrutavałaha pradprymalnika Dźmitryja Skindzierava daje jasny adkaz, čamu jon pavodzić siabie tak.
Partret №1. Z ułasnych słovaŭ
U pieršaj častcy hetaha narysu my apišam maštab fihury Dźmitryja Skindzierava (i jaho dasiahnieńniaŭ) tolki ź jaho ŭłasnych słovaŭ. Praŭda, treba razumieć, što amal usio skazanaje im — chłuśnia.
47‑hadovy Dźmitryj Skindzieraŭ, uradženiec vioski Arłova Viciebskaha rajona, nikoli nie raskazvaje pra rannija hady žyćcia. Adlik svajho žyćcia viadzie z 27 hadoŭ, kali jon, pa ŭłasnych słovach, staŭ bujnym viciebskim pradprymalnikam.
Skindzieraŭ apisvaje siabie jak čałavieka z pravincyi, jaki — padkreślena — zrabiŭ siabie sam, razharnuŭsia biez padtrymki dziaržavy i suviaziaŭ. I tak by cicha i raźvivaŭsia sabie dalej, kali b nie staŭ achviaraj kumaŭstva i karupcyi.
Skindzieraŭ kaža, što pieršym jaho biznesam byŭ prodaž kvietak. Potym stvaryŭ rekłamnuju kampaniju («adnu z najbolšych u Viciebsku»). Pierajšoŭ u nieruchomaść i deviełapmient, mieŭ «adnu z najbolšych u Biełarusi zapravak», adkryŭ vytvorčaść bijaŭhnajeńniaŭ («niama anałahaŭ u respublicy») i mietałaprakatny biznes («adna z najbolšych kampanij u Biełarusi»), «najlepšy ŭ Viciebsku restaran», a hałoŭnym prajektam žyćcia zrabiŭ pierabudovu byłoha «Doma bytu» u «samy sučasny ŭ Viciebsku» HC Metro Park, jaki vykupiŭ u inšych inviestaraŭ paśla amal 10 hadoŭ pieramovaŭ.
Ahułam jon užo bolš za 20 hadoŭ u biznesie, adkryŭ kala dziesiaci pradpryjemstvaŭ, stvaryŭ sotni pracoŭnych miescaŭ. Arhanizoŭvaŭ turniry pa MMA ŭ Viciebsku («adkryŭ adziny kłub u Viciebsku»), na jakija pryvoziŭ bajcoŭ z zamiežža («usio z asabistaj sponsarskaj dapamohi»), adnaŭlaŭ pomniki savieckaj epochi. «Adzin z najbujniejšych padatkapłatnikaŭ Viciebska», — nazyvaje siabie Skindzieraŭ.
Pieršy raz viciebski pradprymalnik źjaviŭsia na publicy viasnoj 2020-ha. Jon inicyjatyŭna źviarnuŭsia da Siarhieja Cichanoŭskaha, jaki tady jeździŭ pa krainie i źbiraŭ ludskija historyi. Skindzieraŭ apłaciŭ tamu bienzin za dajezd z Homiela da Viciebska, kab raskazać u efiry svoj bol.
Historyja była pra toje, jak jon, znakamity viciebski biznesmien, hadami nie moža dabicca ŭ sudzie spraviadlivaści — maŭlaŭ, jaho były biznes-partnior, raniej sudzimy Aleh Pachomienka (Skindzieraŭ zmoŭčvaje, što i sam raniej siadzieŭ) praz machinacyi z dakumientami zbankruciŭ ich sumiesnuju firmu i pakinuŭ hrošy sabie.
Skindzieraŭ navat śćviardžaŭ, što Cichanoŭski «ŭhavorvaŭ jaho bałatavacca ŭ prezidenty z harantavanaj infarmacyjnaj padtrymkaj». Ale toj ścipła admoviŭsia.
Skindzieraŭ zapisaŭ niekalki videa i samastojna.
U svajoj krytycy čynoŭnikaŭ Skindzieraŭ padkreślivaŭ, što nie maje ničoha suprać instytutaŭ, a tolki aproč asobnych ludziej, byccam by adkaznych za jaho niaŭdačy ŭ sudach — heta prakuror Viciebska, načalnik KDB Viciebska, načalnik jurydyčnaha ŭpraŭleńnia Administracyi Łukašenki.
Hetym jon vyklikaŭ na siabie ahoń i, śćviardžaje jon, jaho vyrašyli padstavić (chto dakładna — nieviadoma), jak byccam by jon apazicyjanier.
Da jaho nibyta pryjechali nieviadomyja na rasijskich numarach i prapanavali miljon dalaraŭ za ažyćciaŭleńnie pieravarotu ŭ respublicy. Skindzieraŭ hrošaj nie ŭziaŭ, ale painfarmavaŭ Cichanoŭskaha, jaki paśmiajaŭsia z prapanovy. Ale, kali pamiatajecie, paśla jaho aryštu prapahanda zajaviła, što ŭ jaho ŭ kanapie taksama znajšoŭsia miljon dalaraŭ. Pa mierkavańni Skindzierava, heta mahli być tyja ž samyja ludzi.
Paśla pasadki Cichanoŭskaha Skindzieraŭ staŭ nazyvać siabie jaho siabram. U dzień pryjezdu trya Cichanoŭskaja-Kaleśnikava-Capkała ŭ Viciebsk Skindzieraŭ zaprasiŭ ich u svoj restaran i ŭručyŭ kvietki, zaprasiŭ Cichanoŭskuju pieranačavać u svoj dom. Paśla hetaha, maŭlaŭ, u jaho pačalisia dadatkovyja prablemy ź siłavikami, jakija stali «adciskać biznes».
Pry hetym jon nie admaŭlaŭ Cichanoŭskaj va ŭvazie, i navat «kansultavaŭ jaje, jak trymacca na scenie».
U pratestach Skindzieraŭ nie ŭdzielničaŭ. Ale chadziŭ pa paślavybarčych kruhłych stałach, arhanizavanych uładami, i vystupaŭ tam.
Na toj momant departavanaja ź Biełarusi Śviatłana Cichanoŭskaja pačynała arhanizoŭvać palityčnuju baraćbu ź Vilni.
«Śviatłana zvaniła mnie, kazała: «Pryjedź, Dzima, dapamažy». Ja kazaŭ, Śviatłana, kali patrebna niejkaja dapamoha — zvani. Jana mnie zvaniła, kali ja znachodziŭsia ŭ Biełarusi. Potym jana mnie pačała kazać žudasnyja rečy i: «Pryjazdžaj, pryjazdžaj, pryjazdžaj». Ja pajechaŭ tudy pa jaje prośbie niepasredna», — tak apisvaŭ Skindzieraŭ pieradumovy svajho vyjezdu ź Biełarusi.
Adnačasova z hetym, śćviarždaje Skindzieraŭ, KDB źbiraŭ na jaho materyjały i rychtavaŭ aryšt. Tamu jon zrabiŭ chitry chod: pabyŭ navahodnija śviaty doma, tamu što siłaviki, maŭlaŭ, nie pracujuć pa vychodnych, i vylecieŭ za miažu 7 studzienia 2021-ha.
«A 8 studzienia jany [orhany] źbilisia z noh [šukajučy mianie]: «Dzima, treba sustrecca na kavu», «Źjechaŭ 7-ha, a 8‑ha ŭžo ŭvieś Viciebsk šukaŭ», — apisvaŭ jon abstaviny svajho vyjezdu.
«Ja pa prośbie Cichanoŭskaj pryjechaŭ u štab», — paŭtaraje Skindzieraŭ.
U emihracyi Skindzieraŭ, pa jahonych słovach, «staŭ naładžvać rabotu Ofisa [Cichanoŭskaj]. I razam z hetym finansava padtrymlivaŭ «Radyjo 97».
Ale pačalisia niuansy.
U štabie Cichanoŭskaj, pavodle Skindzierava, jon sustreŭ šmat niezrazumiełych dla siabie ludziej, jakich jon abahulniaje pad słovami «dzieci» i «prafiesijnyja hrantajedy».
Jaho ŭłasnyja idei byccam by błakavalisia Franakam Viačorkam i Alaksandram Dabravolskim, a taksama inšymi ludźmi vakoł Cichanoŭskaj, jakaja była b i rada słuchać Skindzierava, kali b nie ŭpłyŭ daradcaŭ.
Mieniedžarskija zdolnaści Skindzierava ŭ vyniku nie spatrebilisia, i jon sam syšoŭ z pravobraza štaba, plunuŭ i zaniaŭsia tym, čym moža zaniacca ŭ luboj krainie — zarablańniem hrošaj. Adkryŭ kampanii ŭ Litvie i Polščy.
Ale kryŭda na Cichanoŭskuju ŭ jaho zastałasia, tamu što nibyta pa jaje voli jon akazaŭsia ŭ mihracyi, straciŭ usio ŭ Biełarusi i nie maje mahčymaści bačycca ź siamjoj, a jaho plamieńnik staŭ raźmiennaj manietaj u palityčnych hulniach i sieŭ u Biełarusi ŭ turmu dla akazańnia cisku na Skindzierava ŭ zamiežžy.
Tamu, pa jaho słovach, «paralelna ź viadzieńniem biznesu ŭ ES», Skindzieraŭ zaaktyŭničaŭ u Forumie demakratyčnych siłaŭ — arhanizacyi krytykaŭ Cichanoŭskaj, u jakuju sabralisia Volha Karač, Anatol Kotaŭ, ślady jakoha źniknuć na jachcie ŭ tureckim Trabzonie, Dźmitryj Bałkuniec, Valeryj Capkała.
Siabie Skindzieraŭ padavaŭ jak «miecenata» i «siabra Siarhieja Cichanoŭskaha».
Skindzieraŭ dabivaŭsia hrošaj ad jeŭrapiejskich fondaŭ — na stvareńnie «adzinaha pa-sapraŭdnamu niezaležnaha ŚMI», jakoje b uličvała ŭvieś śpiektr palityčnych mierkavańniaŭ.
«Ja daviedaŭsia, kali sam sprabavaŭ prabić finansavańnie… kab zrabić sapraŭdnaje niezaležnaje ŚMI, kab usim bakam davać abaraniać svaju pazicyju: i jabaćkam, i nam, bečebešnikam. Heta akazałasia vialikaja prablemaj. Atrymańnie hrošaj akazałasia vialikaj prablemaj», — narakaŭ jon na adnym z kruhłych stałoŭ «Forumu demakratyčnych siłaŭ».
U vyniku ŭsio źviałosia da niačastych intervju svaim tavaryšam, u jakich Skindzieraŭ asprečvaŭ lehitymnaść Cichanoŭskaj. Čałaviek staŭ zabyvacca.
Ale apošnija miesiacy Skindzieraŭ rezka intensifikavaŭ svaju dziejnaść.
«Čučała, kali my pajedziem dadomu? Ja biełarus. Ja ŭ vyšuku Interpała, u mianie 12 kryminalnych spravaŭ. Kali my pajedziem dadomu? Kolki hrošaj admyli? Jakaja tvaja dola? Zaraz ja tabie ŭłamlu», — nakinuŭsia jon na daradcu Cichanoŭskaj Dzianisa Kučynskaha ŭ vilenskim kafe 26 studzienia 2026 hoda. Zdymajučy ŭsio na videa.
Videa stała znachodkaj dla minskaj prapahandy. Praz dva dni paśla hetaha Skindzieraŭ zavioŭ TikTok, u jakim staŭ publikavać kamplimientarnyja dla Łukašenki i abraźlivyja dla apazicyi roliki z hučnymi zahałoŭkami.
«Ty mrazota», «Dyktatura», «Pasiniełyja palcy», «Zdradniki» — zahałoŭki nie pra kaho vy padumali, a pra Śviatłanu Cichanoŭskuju.
Na siońnia asnoŭnyja tezisy Skindzierava, jakija jon paŭtaraje — apošni raz u strymie ź Siarhiejem Piatruchinym — takija:
— Apazicyja admyła $380 miljonaŭ — «ja vałodaju infarmacyjaj — ja havaryŭ ź ludźmi, a na patreby biełarusaŭ syšło tolki 10-15%»;
— U Łukašenki jość padtrymka ŭnutry Biełarusi, a ŭ Cichanoŭskaj niama padtrymki navat siarod mihrantaŭ.
— Cichanoŭskaja zavierbavanaja KDB. Jaje ciapierašniaje bližniaje atačeńnie pryjechała da jaje ŭ 2020 paśla kamandy śpiecsłužbaŭ («Ja mahu raskazać pra kožnaha čałavieka sa štaba, heta sistemnyja rabotniki śpiecorhanaŭ Biełarusi»).
— Łukašenka «nie budzie razmaŭlać z adščapiencami», tamu treba vyhnać Cichanoŭskuju ź Jeŭropy i vybrać novaha lidara.
— Vyhaniać Cichanoŭskuju nieabchodna praź cisk i vychady na masavyja manifiestacyi biełarusaŭ u Jeŭropie, a kali chto bačyć jaje ci ludziej ź jaje kamandy — treba chacia b «ablivać ich sa šklanki».
Skindzieraŭ navat śćviardžaje, što «heta nie Łukašenka nas [biełarusaŭ] sadzić [u turmu], a Cichanoŭskaja».
Skindzieraŭ taksama napisaŭ niekalki zvarotaŭ u polskuju i litoŭskuju prakuratury z prośbaj pravieryć na zakonnaść pašpart Novaj Biełarusi.
U sakaviku mužčyna zavioŭ sabie i telehram-kanał, u jakim płanuje «aśviatlać suśvietnyja palityčnyja naviny, dzialicca svaim mierkavańniem ab padziejach, a taksama raskazvać pra dziejnaść Ofisa Śviatłany Cichanoŭskaj».
A taksama pryjšoŭ na sustreču apošniaj partyi departavanych palityčnych u Vilni, padčas čaho naviaźliva čaplaŭsia da Dzianisa Kučynskaha i na kamieru abvinavačvaŭ apazicyju zhodna ź pieraličanymi vyšej tezisami. Paśla taho, jak na pravakatara vyklikali palicyju, Skindzieraŭ źnik, nie čakajučy jaje pryjezdu i ŭłasna vyzvalenych palitviaźniaŭ.
Partret №2. Praviarajem fakty
Dźmitryj Skindzieraŭ kaža: «Ja», «Mnie», «Majo», «Maje», ale nikoli nie raskazvaje pra krynicy svajho nibyta isnujučaha kapitału, ale i pra svaju siamju. I heta niespraviadliva.
Dźmitryj Skindzieraŭ naradziŭsia ŭ siamji Leanida i Natalli Skindzieravych.
Natalla Skindzierava da 2016 hoda pracavała ŭ Viciebskim abłasnym centry hihijeny i epidemijałohii, a potym uziała na siabie administracyjnyja spravy ŭ kampanijach muža.
A baćka Skindzierava heta asoba pa-sapraŭdnamu nieardynarnaja. U padvale svajho doma maje majsterniu, u jakoj remantuje i źbiraje techniku. Stary «Ikarus» pierarabiŭ na mabilnaje kafe, adrestaŭravaŭ KrAZ, sabraŭ traktar.
Choć jamu ŭžo na vośmy dziasiatak, jon, prynamsi, jašče niadaŭna, apracoŭvaŭ 35 sotak ziamli, trymaŭ śviniej, kurej, husiej, koz. Navat asła!
U dadatak Leanid Skindzieraŭ patryjot savieckaj spadčyny — adnaŭlaje skulptury časoŭ svajho dziacinstva i stavić miemaryjały na miescach bajoŭ Druhoj suśvietnaj.
Leanid za savietami pačynaŭ pracavać ekskavatarščykam na «Viciazi», a vyras da hałoŭnaha inžyniera ciapličnaha kambinata. U 1994 hodzie jon pajšoŭ ź dziaržaŭnaj raboty, pradaŭ u Polščy «Žyhuli» i staŭ zajmacca kamiercyjaj: niešta pierapradać, sabrać, dabudavać. Z 1994 hoda maje IP, vid dziejnaści — zdača ŭ arendu techniki.
Syn Leanida, Dźmitryj Skindzieraŭ, choć i ros pry pradprymalnym baćku, vybraŭ inšuju darohu.
«U 90‑ia pałova vioski Arłova padałasia ŭ błatnyja. Dzimka chacieŭ nie adstavać. Byŭ u jaho susied Vadzim Kyrniała — baksior. Dzima chacieŭ być da jaho padobnym, prasiŭsia ŭsiudy, i ŭ vyniku daprasiŭsia — pasadzili. A Kyrniału nie pasadzili, Kyrniała vyjechaŭ u Francyju», — skazaŭ «Našaj Nivie» čałaviek, infarmavany pra junyja hody žyćcia Dźmitryja Skindzierava.
Dźmitryj Skindzieraŭ tłumačyć, što «sieŭ ni za što», kali apieratyŭniki patrabavali ad jaho pakazańniaŭ na niejkich nienazvanych siabroŭ, čaho jon rabić nie staŭ. Kyrniała «Našaj Nivie» patłumačyŭ koratka: «My hreli adzin adnaho».
Bazy Belpol paćviardžajuć, što ŭ 2002 hodzie Dźmitryja Skindzierava asudzili pa č. 3 artykuła 208 Kryminalnaha kodeksa (vymahalnictva ŭ składzie arhanizavanaj hrupy, abo ź ciažkimi nastupstvami, abo ŭ bujnym pamiery). Jon atrymaŭ piać hadoŭ kałonii z kanfiskacyjaj majomaści.
«Na zonie ŭ jaho była mianuška «Toŭsty». Jon trochu pastukvaŭ (supracoŭničaŭ z administracyjaj — NN), tamu chutka vyjšaŭ», — śćviardžaje inšy surazmoŭca, jaki pierasiakaŭsia sa Skindzieravym.
Skindzieraŭ trapiŭ pad dźvie amnistyi, i ŭ lipieni 2004 jamu zamianili pakarańnie na vypraŭlenčyja pracy. Zamiest piaci hadoŭ u kałonii jon pravioŭ mienš za dva.
Pakul Skindzieraŭ adbyvaŭ pakarańnie, los Vadzima Kyrniały zrabiŭ kruty pavarot. Chłopiec pastupiŭ na słužbu ŭ Francuzski lehijon, byŭ paranieny padčas apieracyi Opération Licorne u Kot-dJIvuary ŭ 2003 hodzie. Praktyčna heta aznačała pašpart za pralituju kroŭ.
Za hetaje ranieńnie jon nieŭzabavie atrymaŭ francuzski pašpart i hrašovuju kampiensacyju ad dziaržavy. U Biełaruś jon viartacca nie staŭ, abžyŭsia ŭ Francyi i adkryŭ achoŭnaje ahienctva. Staŭšy na nohi, jon pačaŭ inviestavać u Biełaruś.
Nieŭzabavie paśla vyzvaleńnia, u 2006-m, Dźmitryj Skindzieraŭ adkryŭ IP. U 2007 hodzie ažaniŭsia. Nijakaj infarmacyi ab najaŭnaści ŭ jaho vyšejšaj adukacyi ŭ bazach niama. Žyŭ i dziejničaŭ Dźmitryj pry baćku, karystaŭsia tym ža juradrasam, što i baćka.
A sam Leanid, pakul syn siadzieŭ, zajmaŭsia drobnym łakalnym biznesam. Ale raptam adkryłasia pierśpiektyva.
U 2007‑m hodzie Leanid Skindzieraŭ staŭ suakcyjanieram AAT «Biellenmiet». Pradpryjemstva zajmałasia vyrabam budaŭničych mietałakanstrukcyj. Leanid Skindzieraŭ pačaŭ z doli 40%, jakaja ŭ nastupnym była ŭrezanaja da 30%.
Druhi suzasnavalnik — hramadzianin Rasii Mikałaj Klimienka (1961). Uradženiec vioski Viroŭla Haradockaha rajona Viciebskaj vobłaści. I bahaty svajak Skindzieravych.
Vajskovy piensijanier, paśla vychadu na piensiju Klimienka zaniaŭsia aptovym handlem mietaličnaj aharodžaj u Rasii. Sumiesnaje ź Leanidam Skindzieravym-baćkam pradpryjemstva mieła vyrablać aharodžu. Ale «Biellenmiet» nie ŭźlacieŭ.
2009‑2010 hady pradpryjemstva praviało ŭ sudach, vybivajučy daŭhi, i nieŭzabavie faktyčna spyniła dziejnaść.
U toj samy čas Klimienka adkryŭ anałahičnuju vytvorčaść u Rasii, TAA «Zavod Lenkom». Tam spravy išli narmalna, i partniory pasprabavali jašče raz.
U kancy 2011 hoda ŭ Viciebsku było adkryta TAA «Zavod BiełLenKom». Pa sutnaści, cech pa vyrabie mietaličnaha płotu chutkaj ustanoŭki i punkt realizacyi pradukcyi razam z servisam pa mantažy.
Pałova naležała Leanidu Skindzieravu, a pałova — žoncy Dźmitryja Skindzierava, Alesi Šnarkievič. U nastupnym Klimienka jašče nie raz stanie asnoŭnym inviestaram u biźniesy Alesi.
Ale «BiełLenKom» taksama pravaliŭsia.
«Piensijny viek ja sustreŭ dyrektaram firmy, dzie pracavała 40 čałaviek, było šmat budaŭničaj techniki. Praŭda, praz ekanamičnyja kryzisy pryjšłosia začynicca. Ale ja ŭsio adno nie siadžu biez spravy — jak pradprymalnik pracuju na svajoj technicy pa zamovach», — tak Leanid Skindzieraŭ raskazvaŭ rajoncy pra trajektoryju svajho pradpryjemstva ŭ 2018-m.
Što da Skindzierava-syna, to jon u hetyja hody aktyŭna šukaŭ siabie na hrošy Klimienki. Hetuju historyju pošukaŭ my možam dakładna adsačyć u biznes-bazach. Skindzieraŭ udzielničaŭ u vializnaj kolkaści biznesaŭ, ale amal paŭsiul — zusim patrochu.
Tak, naprykład, TAA «Kontry», jakoje Dźmitryj nazyvaje «svajoj rekłamnaj kampanijaj, druhoj paśla Minska» — heta ŭ realnaści inviestycyja Klimienki ŭ viciebskaha rekłamščyka Alaksandra Artamonava. U 2008 hodzie Klimienka daŭ Artamonavu hrošy i atrymaŭ dolu ŭ 75%, Artamonavu naležała 25%.
U 2013 hodzie Klimienka zapuściŭ Dźmitryja Skindzierava ŭ dolu, toj staŭ minarytaryjem z 16%. Heta pieršy zafiksavany fakt udziełu Dźmitryja Skindzierava jak akcyjaniera ŭ niejkim biznesie. Ale i hetaja kampanija paśpiachovaj nie stała i pajšła ŭ likvidacyju.
«Jahonaja», sa słova Skindzierava, kaviarnia «Miełanž» (AAT «Šakaład) u Viciebsku ŭ realnaści na 40% naležała Klimienku, na 10% — Alesi Šnarkievič, a astatniaje — treciaj asobie.
Mažarytarnym akcyjanieram TAA «RosBiełKantrakt» (restaran «Šahał», u jakim Skindzieraŭ prymaŭ Cichanoŭskuju) u realnaści była maci Vadzima Kyrniały. Jana pradała hetuju kampaniju u kastryčniku 2020-ha.
Pačynajučy z 2007 hoda, Mikałaj Klimienka aktyŭna inviestavaŭ u Biełarusi nie tolki ŭ Leanida Skindzierava. Jon taksama zacikaviŭsia zapravačnym biźniesam, znajšoŭ partniora Aleha Pachomienku.
Pachomienka byŭ u adnosinach ź ludźmi, jakija vałodali niedabudavanaj zapraŭkaj u Smalavickim rajonie, a hrošaj dabudavać nie mieli. Pachomienka ž byŭ padradčykam na budoŭli hetaj zapraŭki, tamu mieŭ niepasredny intares u tym, kab jana była skončana.
U vyniku Pachomienka i Klimienka stali ŭłaśnikami TAA «Aeros» pa 50%. Pachomienka harantavaŭ vykup, damoviŭšysia z papiarednim ułaśnikam, što zapłacić jamu, kali zapraŭku ŭviaduć u ekspłuatacyju i pačnuć zarablać. Toj pahadziŭsia. Klimienka dafinansoŭvaŭ budaŭnictva.
Adnačasova z hetym Skindzieraŭ źvioŭ novaha partniora svajho svajaka z Vadzimam Kyrniałam, kab pabudavać — z nula — jašče adnu zapraŭku pad Brestam.
Pachomienka pahadziŭsia. Tam taksama była prablemnaja kampanija, TAA «Šelf», jakuju Pachomienka vykupiŭ napałam z Kyrniałam.
Z hetych prajektaŭ atrymaŭsia tolki skandał. Partniory pierasvarylisia litaralna praz dva hady, zapraŭka pad Brestam nikoli nie była pabudavana, zapraŭku ŭ Smalavickim rajonie zabraŭ Pachomienka ŭ košt pahašeńnia daŭhoŭ za paliva.
U adkrytym dostupie lažyć vializny masiŭ danych pa hetaj spravie, apublikavany Pachomienkam, jaki imknuŭsia dakazać, što Skindzieraŭ chłusić.
Voś cytaty z dakumientaŭ.
«Budaŭnictva [zapraŭki «Šelf» pad Brestam] adbyvałasia za košt hrašovych srodkaŭ, jakija daŭ Pachomienku Kyrniała. Apošni daŭ Pachomienku $300 tysiač. […] Taksama ŭ budaŭnictva zapraŭki hrošy ŭkładvaŭ Pachomienka. Usiaho im na budaŭnictva vydatkavana 2 miljardy [niedenaminavanych] rubloŭ», — z pakazańniaŭ Skindzierava na vočnaj staŭcy z Pachomienkam.
«Pachomienka patłumačyŭ, što dla budaŭnictva zapraŭki [«Aeros» u Smalavickim rajonie] nieabchodnyja hrašovyja srodki ŭ pamiery kala $200 tysiač. My damovilisia, što ja pieradam jamu ŭkazanuju sumu i jon za hetyja hrošy budzie budavać zapraŭku», — z pakazańniaŭ Klimienki na vočnaj staŭcy z Pachomienkam.
Taksama viadoma, što niejki pieryjad padčas raźbiralnictvaŭ partnioraŭ Pachomienka siadzieŭ u SIZA. I ŭ hety čas — pavodle zajavy žonki Pachomienki, — Skindzieraŭ vymahaŭ ź jaje hrošy, jakija nibyta jon taksama davaŭ jaje mužu.
Ciapier užo składana skazać, chto kaho chacieŭ kinuć i chto kaho kinuŭ u hetych siabroŭ-babroŭ. Ale ŭvahu źviartaje inšy momant.
U 2020‑m Skindzieraŭ inicyjatyŭna danios HUBAZu na svajho partniora pa futbolnaj kamandzie, jaki ci to ŭ žart, ci to ŭsurjoz prapanavaŭ zabić Pachomienku i źniać prablemu.
«Ja pajechaŭ u HUBAZ minski, skazaŭ, što mnie prapanavali zabić čałavieka… «Kali łaska, davajcie adpracujem, budzie vielmi cikava!» Mnie skazali: «Zapišy na dyktafon». Ale ŭličvajučy toje, što ja hetym nikoli nie zajmaŭsia, pry zapisie razmovy ja trochu spaliŭsia. Jon zrazumieŭ, što niešta nie toje, i kaža «dobra, dobra… davaj nie budziem ciapier, davaj paźniej». I čałaviek saskočyŭ», — raskazaŭ Skindzieraŭ na svaim jutub-kanale.
Kali ž z HUBAZiKam nie skłałasia, Skindzieraŭ staŭ pisać u KDB. Pa jaho słovach, jon adrasavaŭ vialiki list Valeryju Vakulčyku, tahačasnamu staršyni ŭ KDB.
Dyj uvohule dla Skindzierava heta nie čužyja ludzi.
«U desantnych vojskach mianie jak najlepšaha kiroŭcu bryhady pieraviali ŭ asoby adździeł — heta i jość KDB. Ja praz heta viedaju mnohich inšych paradačnych supracoŭnikaŭ», — pryznavaŭsia jon.
Jašče adzin, sa słovaŭ, vialiki prajekt Dźmitryja Skindzierava — nikoli nie zdadzieny handlovy centr Metro Park u Viciebsku.
Nasamreč za hetym prajektam praz TAA «Viciebski dvor» stajali były kiraŭnik rasijskaha Dziaržcyrka Vadzim Hahłojeŭ i viciebski šansańje Illa Smunioŭ. Jany i vyjhrali aŭkcyjon na rekanstrukcyju byłoha Doma bytu ŭ 2007 hodzie.
Baćka Skindzierava byŭ padradčykam na hetym abjekcie, i ź im nie raźličylisia. Potym dziaržava adabrała u Hahłojeva budynak, a Leanid Skindzieraŭ uvajšoŭ u kampaniju-zabudoŭšyka (u 2019 hodzie) jak minarytarny akcyjanier u nadziei takim čynam skončyć i viarnuć sabie doŭh. Inšyja dva akcyjaniery — Michaił Marcinovič i mažarytaryj Jaŭhien Žukoŭski.
Budoŭla nie była skončanaja, handlovy centr nie zdadzieny i pa siońnia. Adnak Dźmitryja Skindzierava nikoli nie było ŭ składzie akcyjanieraŭ.
Zajmalny fakt, choć, chutčej za ŭsio, heta čystaje supadzieńnie: partnior Leanida Skindzierava pa TAA «Viciebski dvor» Jaŭhien Žukoŭski — heta biznes-partnior Rusłana Piatrova, syna Kurmanbieka Bakijeva, jaki ŭziaŭ inšaje proźvišča. Razam jany bienieficyjary ŭ inšych kampanijach.
A Viačasłaŭ Japiška (na fota sprava) z capkałaŭskaha Foruma demakratyčnych sił letaś prapanoŭvaŭ Cichanoŭskamu čyjeści 200 tysiač jeŭra. Da vyjezdu za miažu jon pracavaŭ dyrektaram niežyvoj kampanii «Skajndbresthrup», u jakoj minarytaryjem byŭ Dźmitryj Skindzieraŭ. Kampanija praisnavała paru hadoŭ, pastaviła ŭ Baranavicki centr sacyjalnaha absłuhoŭvańnia dźvie viešałki dla šapak i pajšła ŭ likvidacyju.
Inšy saŭładalnik «Skajndbresthrup» — Uładzimir Asiadoŭski, vałodaŭ mašynaj, jakuju jamu pradaŭ abo padaryŭ Rusłan Piatroŭ, toj samy syn Bakijeva, a tamu, u svaju čarhu, hetaja mašyna dastałasia ad kamandzira čaści raźviedki HRU, blizkaha da tajamniča źnikłaha Anatola Kotava pałkoŭnika Uładzimira Papova. Pryroda suviaziaŭ Skindzierava-starejšaha ź biznesmienami vakoł Bakijeva nieviadomaja. Ale ź Japiškam Skindzieraŭ-małodšy adnaznačna byŭ znajomy jašče da 2020-ha.
Źviartaje ŭvahu, što ŭ 2022‑-2023 Žukoŭskaha aryštoŭvali. Imavierna, pa ekanomicy. Ciapier jon vyjšaŭ na svabodu.
Z vytvorčaściu bijahumusu, jakomu «niama anałahaŭ», pavodle Dźmitryja Skindzierava, taksama pierabolšvańnie. Kampanija TAA «BijaBiełHrupp» była adkryta ŭ rodnaj vioscy Mikałaja Klimienki, u Viroŭli, u 2016 hodzie. Akcyjaniery — 50/50 maci Vadzima Kyrniały i Dźmitryj Skindzieraŭ. Roŭna praz dva hady kampanija pierajšła da inšych ludziej.
Takim čynam, Dźmitryj Skindzieraŭ zusim nie toj značny pradprymalnik, jakim jon pradstaŭlajecca.
U Skindzierava jašče było IP. I na pačatak 2020 hoda Skindzieraŭ byŭ u strašnych daŭhach i tolki pa zafiksavanych vykanaŭčych vytvorčaściach byŭ vinavaty kala 400 tysiač rubloŭ (amal $180 tysiač pa kursie na toj momant).
Takim čynam, da momantu vybarčaj kampanii 2020‑ha Skindzieraŭ padychodziŭ bankrutam, biez ustojlivych krynic prybytku. Jon chłusiŭ Cichanoŭskamu, raskazvajučy pra toje, jak u jaho ŭsio kałasicca.
Čaho jon chacieŭ dasiahnuć svaimi vystupami na kanale «Kraina dla žyćcia», dla čaho jon tudy prabivaŭsia — pytańnie.
U kožnym razie, Skindzieraŭ sam paśla zapisaŭ niezvyčajny dla taho času videazvarot pad nazvaj «Chto rychtuje dziaržpieravarot u Biełarusi». Svajho rodu pakajańnie.
«Niechta zachacieŭ źmianić uładu i źviazaŭsia sa mnoj. Zajavu ab hetym fakcie ja napisaŭ u adpaviednyja struktury i adnios. Prykładvaju fotazdymak, što ja adnios. A mienavita, mnie prapanavali ŭzbrojeny pieravarot ułady, zrabić tut Majdan, jak było va Ukrainie, źmianić całkam uładu ŭ Respublicy. Ja nie apazicyjanier, ja nie palityk […]. Usio staŭleńnie majo da palityki heta tolki jak vybarščyka, jaki apuścić biuleteń. Prašu bolej i napierad nie padychodzić da mianie z pytańniami pieravarotaŭ, zmovaŭ, čahości što budzie suprać kanstytucyjnaha stroju Respubliki Biełaruś […]», — začytaŭ u kadry Skindzieraŭ, prykłaŭšy fota ź milicejskaha kabinieta.
Skindzieraŭ znoŭ uźnik u časie vybarčaj kampanii, kali trya pryjazdžała ŭ Viciebsk.
Paśla sfalsifikavanych vybaraŭ 2020 hoda Vadzim Kyrniała z Francyi zapisaŭ emacyjny videazvarot da ministra ŭnutranych spraŭ Karajeva, u jakim abvinavaciŭ taho, što supracoŭniki MUS «pieratvarylisia ŭ banderaŭskich karnikaŭ».
Skindzieraŭ śćviardžaje, što ŭ pratestach jon nie ŭdzielničaŭ. Tym nie mienš 1 listapada 2020 hoda Dźmitryja Skindzierava ŭnieśli ŭ bazu «Biesparadki» jak «arhanizatara i kaardynatara pratestnych akcyj» — mahčyma, heta byŭ vynik klaŭzaŭ Pachomienki.
Na nastupny dzień, 2 listapada, na Dźmitryja Skindzierava, pavodle bazy AIS «Pašpart», była zaviedziena pravierka pa č. 2 art 243 i č. 4 art. 210 (uchileńnie ad spłaty padatkaŭ u bujnym pamiery, kradziož šlacham złaŭžyvańnia słužbovymi paŭnamoctvami ŭ składzie hrupy abo ŭ asabliva bujnym pamiery).
Adnak kryminalnaja sprava stanam na leta 2021‑ha zaviedzienaja tak i nie była.
28 listapada 2020 hoda (a nie ŭ studzieni 2021, jak jon sam śćviardžaje) Skindzieraŭ, pavodle danych bazy «Pasažyrapatok», vyjechaŭ ź Biełarusi ŭ Litvu.
U Vilni jon, nazyvajučy siabie «siabrom Cichanoŭskaha», pasprabavaŭ trapić u kamandu Cichanoŭskaj, jakaja tolki farmiravałasia.
Skindzieraŭ, jak uspaminajuć aktyvisty, prychodziŭ i vystupaŭ na schodach tady jašče budučaha Ofisa, vałancioraŭ «Krainy dla žyćcia», «Bajsoła» i inšych, jakija zimoj 2020‑ha raźmiaščalisia pa adnym adrasie.
Skindzieraŭ nie ŭtojvaŭ svajoj asoby i nie šyfravaŭsia.
«Šmat usiaho inicyjatyŭna prapanoŭvaŭ. Pa bolšaj častcy — duraści. Pavodziŭ siabie kanfliktna. Adnoj ź jaho inicyjatyŭ, naprykład, było pryciahnuć u ofis rasijskaha Andreja Iłaryjonava — byłoha pamočnika Pucina i zaciataha krytyka Zialenskaha. U cełym nasiadaŭ na toje, što jon paśpiachovy biznesmien, tamu jamu treba davieryć kiravańnie hrašyma i kadrami», — prypaminaje naš surazmoŭca.
U jaho słovy, što jon «siabar Cichanoŭskaha», chutka pierastali vieryć.
«Da vyjezdu ŭ Litvu ja ź im sustrakałasia adzin raz, padčas vybarčaj kampanii u Viciebsku, dzie jon naša trya pryhoža pryniaŭ. Da hetaha ja jaho viedać nie viedała. Jon pazicyjanavaŭ siabie jak dobry znajomy Cichanoŭskaha, a pravieryć u mianie nie było mahčymaści, bo Siarhiej užo byŭ u turmie. Užo ŭ Vilni jon pačaŭ prychodzić u ofis, aktyŭna chacieŭ va ŭsim udzielničać. Uvieś čas zvaniŭ, sprabavaŭ pasiabravać, zaprašaŭ dadomu, maŭlaŭ, «ja ž siabra Siarhieja», — raskazała «Našaj Nivie» Śviatłana Cichanoŭskaja.
«Skindzieraŭ? Pa-mojmu, adzin z mnohich i mnohich ludziej, jakija niekali vystupali na maim kanale», — skazaŭ Siarhiej Cichanoŭski «Našaj Nivie».
21 śniežnia 2020 hoda Hienprakuratura i Śledčy kamitet zaviali dadatkovyja kryminalnyja spravy suprać Śviatłany Cichanoŭskaj i prezidyuma KR za «zakliki da dziejańniaŭ, nakiravanyja na naniasieńnie škody nacyjanalnaj biaśpiecy», a taksama za «zmovu z metaj zachopu dziaržaŭnaj ułady».
A praz try dni paśla hetaha, 24 śniežnia 2020 hoda, Dźmitryj Skindziereŭ, zhodna z danymi bazy «Pasažyrapatok», viarnuŭsia ź Vilni ŭ Biełaruś. Pry hetym niama infarmacyi, kab Skindziereva zatrymlivali ci ŭ ramkach zaviedzienaj raniej ekanamičnaj pravierki, ci ŭ ramkach spravy Cichanoŭskaj, vakoł jakoj jon kruciŭsia, chacia jaho aktyŭnaść tam nie była sakretam, bo tam ža krucilisia tady jašče nieraskrytyja pravakatary i ahienty — naprykład, Illa Biahun i Artur Hajko.
30 śniežnia 2020 hoda Skindzieraŭ vystupiŭ na pasiedžańni ŭ Viciebskim harvykankamie.
Publičnaja viersija Skindzierava ŭ tym, što jon vyjechaŭ ź Biełarusi 7 studzienia 2021 hoda, a 8 studzienia 2021 hoda jaho ŭžo «šukaŭ uvieś Viciebsk». Ale, zhodna z danymi «Pasažyrapatoku», Dźmitryj Skindzieraŭ vylecieŭ rehularnym rejsam Minsk-Kijeŭ 15 studzienia 2021 hoda.
Datu druhoha źjaŭleńnia Skindzierava ŭ Vilni nichto nie pamiataje. Ale viadoma, što ŭ Ofis Cichanoŭskaj na toj momant jaho pierastali puskać — navat u tyja časy idealizmu i naiŭnaści jon staŭ vyklikać padazreńni.
«Jon tady chadziŭ, vyprošvaŭ hrošy na niejkija kryptaabmieńniki i prasiŭ pazyčyć jamu na žyćcio. Jak ja zrazumieŭ, kvateru ŭ Vilni jamu zdymaŭ Kyrniała, tolki ja nie razumieŭ pryrody adnosin pamiž imi», — raskazaŭ «Našaj Nivie» surazmoŭca, jaki nie viedaŭ, što Skindzieraŭ u junactvie mocna Kyrniału dapamoh, prykryŭ.
«Naša Niva» znajšła zarehistravanyja na Kipry pustyja kampanii, u jakich Skindzieraŭ adzin z akcyjanieraŭ. Płanavałasia, što na ich buduć aformleny kryptaabmieńniki ŭ Litvie, ale inviestara ŭ prajekt nie znajšłosia.
Paralelna Skindzieraŭ raspracoŭvaŭ i inšuju temu — manietyzacyi emihracyjnych miedyja.
Tady byŭ taki pieryjad, što hrošy na vyrab kantentu na chvali entuzijazmu moh znajści kožny, chto vyrablaŭ choć jaki bolš-mienš adekvatny kantent.
«Skindzieraŭ zachacieŭ pryvatyzavać «Radyjo'97», jakoje rabiŭ Maks Morysan. U domie, jaki zdymaŭ Skindzieraŭ, adbyvalisia zapisy, jon ža kupiŭ aparaturu — jak vyśvietliłasia paźniej, nie na svaje hrošy, — i ŭ vyniku zachacieŭ, što na jaho pavinny pierapisać jurydyčnuju asobu. Kalektyŭ admoviŭsia. Skindzieraŭ pajšoŭ u sud i vyjhraŭ praces. Ale tolki ŭ toj častcy, što abstalavańnie na 5 tysiač jeŭra treba jamu viarnuć», — raskazaŭ nam śviedka padziej.
Potym u Skindzierava była sprava z «Płatformaj 375», na jakim Azaronak dyskutavaŭ z Bałkuncom. Hety prajekt u 2025 hodzie pryznali ekstremisckim i aryštavali jaho viadučaha, Kiryłu Paźniaka, jaki ŭvieś hety čas znachodziŭsia ŭ Biełarusi, a taksama jaho 20‑hadovuju dačku Janinu.
Kali kryptaabmieńniki nie dziejničajuć, to na što Skindzieraŭ žyvie?
Jon sam kaža, što jamu navat nie treba vučyć movy, «jon viedaje jak i ŭmieje zarablać u luboj krainie, havoračy pa-rusku». U intervju Piatruchinu Skindzieraŭ kazaŭ, što vałodaje dźviuma kampanijami ŭ Polščy i kampanijaj u Litvie.
Što da kampanij u Polščy, to heta prosta chłuśnia. U hetaj krainie adkryty rehistr — u Skindzierava tam kampanij niama.
A ŭ Litvie kampanija nasamreč jość. Jana nazyvajecca UAB Bovaja, ułaśniki — Dźmitryj Skindzieraŭ i Michaił Marcinovič (toj samy, jaki byŭ u doli z baćkam Skindzierava ŭ AAT «Viciebski dvor» na budaŭnictvie Metro Park).
Kampanija była zarehistravana letam 2021‑ha i prapanuje klijentam z SND kupić mašynu ź Jeŭropy. Mašyny prapanujucca z Francyi. Pa infarmacyi «Našaj Nivy», heta była apošniaja sproba Vadzima Kyrniały dapamahčy svajmu siabru dziacinstva.
Ale kampanija chranična zatrymlivaje padatkovyja vypłaty, maje admoŭny kapitał (minus 186 tysiač jeŭra) i kožny hod dziejnaści hienieravała straty — 213 tysiač jeŭra stanam na kaniec 2024 hoda (spravazdačnaść za 2025 pakul nie zdadzienaja). Kampanija vinavataja kredytoram 236 tysiač jeŭra, ź ich 111 tysiač jeŭra treba było viarnuć u 2025 hodzie.
Ale naŭrad ci heta adbyłosia — «Naša Niva» bačyć u litoŭskich bazach, što vypiskami pa UAB Bovaja niadaŭna cikavilisia dźvie kalektarskija kampanii.
Faktyčna Skindzieraŭ paŭtaryŭ usio toje, što było ŭ Biełarusi, dzie ŭ jaho byli vialikija daŭhi.
I ŭsplosk publičnaj aktyŭnaści Dźmitryja Skindzierava (užo z chłuślivaj krytykaj apazicyi) supaŭ pa časie ź pierśpiektyvaj čarhovaha bankructva.
Minuły raz Skindzieraŭ vyjechaŭ ad svaich daŭhoŭ u Litvu, a kudy pajedzie zaraz?
Cikava, što Skindzieraŭ kantaktuje ź biespartyjnym litoŭskim deputatam u Jeŭraparłamiencie Piatrasam Hražulisam. U dzień krykaŭ na adras Dzianisa Kučynskaha ŭ vilenskim kafe Skindzieraŭ znachodziŭsia tam razam z Hražulisam.
U dzień sustrečy apošniaj partyi palitviaźniaŭ u Vilni Skindzieraŭ iznoŭ byŭ tam u kampanii Piatrasa Hražulisa i pajechaŭ adtul razam ź im.
Piatras Hražulis niadaŭna naviedaŭ biełaruskaje pasolstva ŭ Bielhii i vykazaŭsia, što Litvie treba inicyjavać pieramovy z Łukašenkam, a Jeŭraparłamient pavinien padšturnuć Litvu da hetaha.
«Naša Niva» zapytałasia ŭ Hražulisa, jak jon paznajomiŭsia z Skindzieravym i što ich źviazvaje ciapier.
«Ja nie mahu ŭspomnić, jak ja ź im paznajomiŭsia, — adkazaŭ nam Hražulis. — Vy viedajecie, ja ź vielmi mnohimi znajomy. Moža być, jon sam moh by skazać? My prosta abmiarkoŭvajem roznyja rečy. Jon vielmi niezadavoleny Cichanoŭskaj».
Hražulis taksama adznačyŭ, što niekatoryja rečy ŭ Skindzieravie jaho zasmučvajuć.
«Ja zaŭvažyŭ adnu reč. Tak, jon krytykuje Cichanoŭskuju. Ale Łukašenku, Pucina jon nie krytykuje. Heta mnie niejak u hałavu strelnuła. Čamu ty tak? Baišsia abo chočaš, kab źniali kryminalnyja spravy?» — zadajecca pytańniem Hražulis.
«Ja nijak tut ni pry čym, što tam jon robić ciapier», — skazaŭ «Našaj Nivie» Vadzim Kyrniała.
«Naša Niva» — bastyjon biełaruščyny
Anžalika Mielnikava paśla źniknieńnia nabyła dźvie kvatery ŭ Minsku90
Anžalika Mielnikava paśla źniknieńnia nabyła dźvie kvatery ŭ Minsku
«Ź piaci varyjantaŭ try kvatery zdavalisia tolki hramadzianam Biełarusi». Rasijanie pierajechali ŭ Homiel paśla ataki USU na Bransk — što ich dzivić?2323
Kamientary