Minzdaroŭja pamianiała pieralik chvarob, pry jakich zabaroniena kiravać aŭtamabilem

Ministerstva achovy zdaroŭja Biełarusi abnaviła pieralik zachvorvańniaŭ i supraćpakazańniaŭ, pry jakich zabaroniena kiravać aŭtamabilami, traktarami, samachodnymi mašynami i małamiernymi matornymi sudnami. Adpaviednuju pastanovu apublikavaŭ Nacyjanalny pravavy partał.

Zdymak ilustracyjny. Fota: Lookby.media

Źmieny praduhledžvajuć u šerahu vypadkaŭ bolš šyroki dopusk da kiravańnia. U pryvatnaści, skaročanyja terminy zabarony na kiravańnie paśla ŭstanoŭki elektrakardyjostymulatara abo kardyjaviertera-defibrylatara, a taksama paśla niaŭskładnienaha infarktu mijakarda.

Kiravać traktaram ciapier zmohuć i ludzi z amputacyjaj adnoj nižniaj kaniečnaści vyšej za ŭzrovień pieradplusna-pluśnievaha sustava, kali jany karystajucca pratezam.

Ź pieraliku supraćpakazańniaŭ vyklučyli ciažarnaść.

Adnačasova ŭ pieralik dadali adzinkavy sutarhavy prystup — pry vykanańni peŭnych umoŭ dla dopusku da kiravańnia. Taksama ŭličvajecca ŭžyvańnie psichaaktyŭnych rečyvaŭ, navat kali jano jašče nie pryviało da vyjaŭlenych nastupstvaŭ dla zdaroŭja.

Ludziej, jakija ŭžyvajuć psichaaktyŭnyja rečyvy, u niekatorych vypadkach mohuć dapuścić da kiravańnia pry ŭmovie štokvartalnych miedycynskich prafiłaktyčnych ahladaŭ. Dla hetaha spatrebicca zaklučeńnie ŭračebna-kansultacyjnaj kamisii, a ahlad budzie pravodzicca raz na hod. Taksama praduhledžanaja mahčymaść spynić abaviazkovyja miedahlady na padstavie zaklučeńnia psichijatra-narkołaha.

U Ministerstvie achovy zdaroŭja adznačyli, što novyja praviły dazvolać niekatorym kiroŭcam paśla pieraniesienych zachvorvańniaŭ sardečna-sudzinnaj sistemy i aporna-ruchalnaha aparatu viartacca da pracy paśla pieryjadu časovaj niepracazdolnaści biez straty prafiesii. Pry hetym uklučeńnie ŭ pieralik abmiežavańniaŭ, źviazanych z užyvańniem psichaaktyŭnych rečyvaŭ, pavinna pavysić biaśpieku darožnaha ruchu.

Pastanova Ministerstva achovy zdaroŭja №83 ad 10 lipienia 2026 hoda nabyła moc 16 žniŭnia.

Kamientary da artykuła