Vietkaŭskuju kalekcyju čakannych akładaŭ na abrazy ŭpieršyniu pradstaviać u Nacyjanalnym mastackim muziei

U Nacyjanalnym mastackim muziei 20 žniŭnia adkryjecca časovaja ekspazicyja «Žar i choład mietału. Ubrańnie vietkaŭskaha abraza» sa zboru Vietkaŭskaha muzieja staraabradnictva i biełaruskich tradycyj imia F.R. Šklarava, piša BiełTA.

Fota: vetka-museum.by

Na vystavie buduć pradstaŭlenyja 125 tvoraŭ žyvapisu, dekaratyŭna-prykładnoha mastactva, malunki i pryłady pracy majstroŭ-čakanščykaŭ. 

«Vietkaŭskaja kalekcyja čakannych akładaŭ na abrazy — zbor unikalny dla Biełarusi. Upieršyniu pradstaŭlenyja šyrokamu hledaču tvory miascovych majstroŭ XVIII — pačatku XX stahodździa, sabranyja ŭ rehijonie i adrestaŭravanyja ŭ Vietkaŭskim muziei. Majstry ŭvasobili simvoliku arnamientaŭ. Vizantyjski zavitok i vinahrad aznačaje žyćciovuju moc pryrody i simvał rajskaha ćvicieńnia. Žamčužyna ŭ chryścijanstvie — vobraz dušy praviednika. U čakannym akładzie ŭznaŭlajecca vobraz žamčužnaj chusty — ubrusa Baharodzicy», — raskazali arhanizatary.

Vialikaja častka ekspazicyi była padoranaja muzieju siamiejnaj dynastyjaj Śviaščeńnikavych. Dačka i ŭnučka čakanščykaŭ Aryna Radzivonaŭna ŭspaminała pra technałohii raboty dziadoŭ i baćki z bratami, sama paliravała akłady.

Apošnija pakaleńni žyli ŭ Klimavie Branskaj vobłaści. Prapradziedam Aryny byli pieradadzienyja technałahičnyja rukapisy XVIII-XIX stahodździaŭ z apisańniem rabot pa mietale i vyrabu finifci, emalaŭ.

«Paradaksalnyja dla sučasnaha razumieńnia sposaby myśleńnia majstroŭ, arhanizacyja imi prastory, źmieščanaj u niekalkich milimietrach mietaličnaj płaściny. Jany paŭstajuć u architekturnych pabudovach z advarotnaj i śfieryčnaj pierśpiektyvaj, u «miakkim» piejzažy, jaki złučaje staražytny simvalizm ź niepasrednym adčuvańniem natury, a taksama ŭ epičnaści naratyvu», — padkreślili ŭ muziei.

Časovaja ekspazicyja praciahniecca da 25 kastryčnika.

Kamientary da artykuła