U Varšavie znajšli miortvym rasijskaha apazicyjaniera

U Varšavie ŭ kvatery ŭ rajonie Makotaŭ znajšli miortvym 71‑hadovaha Siarhieja Ułasienku — člena rasijskaha apazicyjnaha abjadnańnia «Źjezd narodnych deputataŭ», paviedamlaje RMF24.

Siarhiej Ułasienka

Pa słovach pradstaŭnika akruhovaj prakuratury Varšavy Piatra Antonija Skiby, na hety momant niama prykmiet taho, što da śmierci mužčyny mahli być datyčnyja inšyja ludzi. Na miescy zdareńnia pravodzicca ahlad, a na sieradu pryznačana ŭskryćcio. Akramia hetaha, płanujucca taksikałahičnyja daśledavańni.

Siarhiej Ułasienka ŭ 1980‑ia hady byŭ deputatam miascovych orhanaŭ ułady na Dalokim Uschodzie, paźniej žyŭ u Anapie, što ŭ Krasnadarskim krai. Paśla pačatku poŭnamaštabnaj vajny Rasii suprać Ukrainy jon vyjechaŭ u Polšču. Spačatku znachodziŭsia tam pa turystyčnaj vizie, a paźniej atrymaŭ palityčny prytułak.

«Źjezd narodnych deputataŭ» abjadnoŭvaje byłych rasijskich deputataŭ i pazicyjanuje siabie jak apazicyjnuju strukturu, jakaja ŭ pierśpiektyvie pavinna stać pierachodnym parłamientam Rasii. Inicyjataram stvareńnia arhanizacyi byŭ były deputat Dziarždumy Illa Panamaroŭ. U 2023 hodzie Hienprakuratura Rasii pryznała «Źjezd narodnych deputataŭ» niepažadanaj arhanizacyjaj.

Pierad hetym, u červieni 2026 hoda, u centry horada Biełaja Padlašskaja byŭ zastreleny 44‑hadovy Siamion Skrapiecki — aŭtar antypucinskich karykatur, jaki pierajechaŭ u Polšču ŭ 2021 hodzie. Paźniej polskija ŭłady paviedamili pra zatrymańnie padazravanaha ŭ hetym zabojstvie.

Kamientary da artykuła