Zabity ŭ Polščy rasijski mastak adnu z karcin pradaŭ za $20 tysiač i zadanaciŭ USU. Voś što raskazaŭ jaho znajomy biełarus Bochan
Błohier Uładzisłaŭ Bochan, jaki byŭ znajomy ź Siamionam Skrapieckim niekalki hadoŭ i pierapisvaŭsia litaralna napiaredadni trahiedyi, raskazaŭ «Biełsatu», čym žyŭ mastak, jak zarablaŭ na tvorčaści i čamu apošnija hady rehularna atrymlivaŭ pahrozy.
Jašče za niekalki hadzin da hibieli Siamion Skrapiecki abmiarkoŭvaŭ z Uładzisłavam Bochanam novyja akcyi suprać rasiejskaha režymu. Pavodle jaho słoŭ, u noč z suboty na niadzielu Skrapiecki prapanavaŭ arhanizavać supolnuju akcyju ŭ Bierlinie abo Varšavie paśla svajho niadaŭniaha pierformansu kala rasiejskaj ambasady ŭ Hiermanii. Kančatkovych płanaŭ jany vypracavać nie paśpieli.
Błohier byŭ znajomy sa Skrapieckim z 2022 hoda. Jany paznajomilisia na vystavie «ReBelarus» u Varšavie, jakaja prachodziła niezadoŭha da pačatku poŭnamaštabnaj vajny va Ukrainie. Tam rasiejski mastak pradstaŭlaŭ svaje pracy z vostraj palityčnaj tematykaj. Pavodle Bochana, paśla hetaha jany padtrymlivali suviaź, choć i nie byli blizkimi siabrami. Stasavalisia pieravažna vakoł mastactva, palityki i hramadskaj dziejnaści.
«Jak čałaviek jon byŭ davoli składany. Ź im časam było ciažka stasavacca, bo jon byŭ vielmi emacyjny i rezki ŭ svaich vykazvańniach. Nie zaŭsiody ja byŭ zhodny z tym, što jon kazaŭ. Ale jak mastak jon byŭ sapraŭdnym hienijem», — kaža Bochan.
Na jaho dumku, nichto z sučasnych mastakoŭ nie pieradavaŭ tak dakładna atmaśfieru «hłybinnaj Rasii» za miežami Maskvy. Skrapiecki byŭ rodam z Ałtajskaha kraju i časta źviartaŭsia ŭ svajoj tvorčaści da žyćcia rasiejskaj pravincyi.
Pavodle Bochana, apošnija miesiacy mastak pastajanna atrymlivaŭ pahrozy. Asabliva paśla taho, jak pačaŭ aktyŭna vyśmiejvać kiraŭnika Čačni Ramzana Kadyrava. Skrapiecki navat publikavaŭ u svaim Telegram-kanale skrynšoty ahresiŭnych paviedamleńniaŭ ad prychilnikaŭ Kadyrava.
Akramia taho, u adnym z dopisaŭ jon paviedamlaŭ, što kala jaho doma dziažurać palicejskija. Bochan miarkuje, što heta mahło być źviazana sa zvarotam mastaka ŭ pravaachoŭnyja orhany z-za pahrozaŭ. Pry hetym pra niejkija kankretnyja niebiaśpieki ŭ asabistych razmovach Skrapiecki nie raskazvaŭ.
«Vakoł jaho mastactva isnavała vialikaja supolnaść ludziej»
Skrapiecki udzielničaŭ nie tolki ŭ rasiejskich antypucinskich akcyjach, ale i padtrymlivaŭ biełaruskuju dyjasparu ŭ Polščy. Pavodle Bochana, mastak naviedvaŭ biełaruskija akcyi salidarnaści ŭ Biełaj-Padlašskaj, a taksama ŭdzielničaŭ u supolnych pratestach kala rasiejskaj ambasady ŭ Varšavie.
Bochan taksama raskazaŭ, što Skrapiecki žyŭ pieravažna za košt svajoj tvorčaści. Pavodle jaho słoŭ, mastak atrymlivaŭ kala 500 dołaraŭ štomiesiac ad manietyzacyi kantentu ŭ YouTube i sacyjalnych sietkach. Asnoŭny ž prybytak prynosiŭ prodaž karcin. Pry hetym niekatoryja jaho raboty kaštavali vielmi doraha.
Skrapiecki zajmaŭsia palityčnaj satyraj bolš za piatnaccać hadoŭ. Adzin sa svaich tvoraŭ jon, pavodle Bochana, pradaŭ prykładna za 20 tysiač dalaraŭ i achviaravaŭ hetyja hrošy na padtrymku Ukrainy i Uzbrojenych sił Ukrainy.
«U jaho zaŭsiody byli klijenty, vakoł jaho mastactva isnavała vialikaja supolnaść ludziej, jakija jaho padtrymlivali», — adznačyŭ błohier.
Navina pra hibiel mastaka stała dla Bochana poŭnaj niečakanaściu. Pračytaŭšy paviedamleńni pra stralaninu ŭ Biełaj-Padlašskaj, jon adrazu ŭspomniŭ pra Skrapieckaha, jaki žyŭ u hetym horadzie. Paśla błohier sprabavaŭ źviazacca ź im i jaho žonkaj, ale nie atrymaŭ adkazu. Tady jon pačaŭ supastaŭlać infarmacyju i fotazdymki ź miesca zdareńnia z materyjałami, jakija mastak publikavaŭ u svaich sacyjalnych sietkach.
«Usio supadała — i ŭzrost, i hramadzianstva, i miesca. Tak ja zrazumieŭ, što, chutčej za ŭsio, havorka idzie mienavita pra jaho», — raskazaŭ Bochan.
Ciapier čytajuć
35 maładych biełarusaŭ i biełarusak, za jakimi varta sačyć: apublikavany pieršy śpis Next 3522
Kamientary