Na Minščynie pabudavali zahadkavuju kaplicu. Što pra jaje viadoma?

Vandroŭniki zaŭvažyli ŭ Minskaj vobłaści niezvyčajnuju draŭlanuju kaplicu, budaŭnictva jakoj amal zavieršana. Vyklikaje ździŭleńnie toje, što kultavy abjekt uźviedzieny ŭdalečyni ad nasielenych punktaŭ — va ŭročyščy siarod paloŭ pamiž vioskami, piša vydańnie Katolik.life.

Nievialiki budynak vyhladaje zahadkava, adznačajuć vandroŭniki. Jon znachodzicca na miažy Staŭbcoŭskaha i Vałožynskaha rajonaŭ.

Žurnalisty znajšli hety punkt na kadastravaj karcie Biełarusi, na jakoj paznačana, što metavaje pryznačeńnie ŭčastka — «dla budaŭnictva i absłuhoŭvańnia kultavaha zbudavańnia — kaplicy ŭ rajonie vioski Virłavičy» ŭ Litvienskim sielsaviecie (vioska Litva).

Heta paćviardžaje, što pad katalickuju kaplicu ŭčastak vydzielili relihijnaj supolnaści.

Pakul nijakich źviestak — chto jaje zbudavaŭ, u jakich metach, da jakoj parafii jana adnosicca i jaki maje tytuł — u adkrytym dostupie niama. Nie viedajuć pra kaplicu i miascovyja vierniki. Ale voś što ŭdałosia vyśvietlić. 

Najbližejšaja da hetaha punkta dziejnaja katalickaja parafija — u vioscy Ročavičy. Joj apiakujucca ajcy franciškanie ź Ivianca. Parafija maje svaju kaplicu, ale, vierahodna, atrymała hety ŭčastak pad novy kultavy abjekt, jaki mahli pabudavać manachi dla svaich patreb. Zastajecca čakać, što paśla zaviaršeńnia rabot pra kaplicu i jaje pryznačeńnie abvieściać aficyjna.

U danych kadastravaj karty značycca, što hety ziamielny ŭčastak u Staŭbcoŭskim rajonie atrymaŭ adpaviedny status u 2019 hodzie, ale pabudavali kaplicu tolki ciapier. Na spadarožnikavych zdymkach Google Maps ad viasny 2026 hoda na ŭčastku bačny tolki nasyp pad padmurak budynka.

Kamientary da artykuła