Rasija rychtuje novuju sieryju vyprabavańniaŭ «latajučaha Čarnobyla»

Pavodle infarmacyi Barents Observer, u kancy žniŭnia rasijskija vajskoŭcy pačali pierakidvać na archipiełah Novaja Ziamla śpiecyjalnuju avijacyju i techniku. Mienavita tam, na palihonie Pankova, raźmieščanyja abjekty, pryznačanyja dla vyprabavańniaŭ «Buravieśnika» — rakiety ź jadziernym ruchavikom, piša The Moscow Times.

Fota ilustracyjnaje

22—23 žniŭnia na aeradrom Rahačova na Novaj Ziamli prybyli dva samaloty Ił-967 SKIP, jakija vykarystoŭvajucca dla kantrolu i atrymańnia telemietryi padčas rakietnych zapuskaŭ. Taksama tudy pierakinuli samalot radyjołakacyjnaj raźviedki A-50U i niekalki transpartnych samalotaŭ ź viertalotami.

Adnačasova pačali ruch sudny ŭ Barancavym i Karskim morach, jakija mohuć vykarystoŭvacca padčas vyprabavańniaŭ. Rasija taksama zakryła dla palotaŭ pavietranuju prastoru kala Novaj Ziamli.

«Buravieśnik» — jadziernaja kryłataja rakieta, jakuju Uładzimir Pucin upieršyniu pradstaviŭ u 2018 hodzie jak adnu z novych rasijskich stratehičnych raspracovak. Na Zachadzie jaje nazyvajuć «latajučym Čarnobylem», pakolki rakieta pavinna vykarystoŭvać jadziernuju enierhietyčnuju ŭstanoŭku i patencyjna moža stvarać radyjacyjnuju niebiaśpieku padčas palotu abo ŭ vypadku avaryi.

Papiarednija vyprabavańni rakiety mieli prablemy. Pavodle amierykanskich raźviedvalnych acenak, da 2018 hoda Rasija praviała 13 sprob, jakija skončylisia niaŭdała. U 2019 hodzie rakieta ŭpała ŭ Barancava mora, a padčas apieracyi pa jaje ŭźniaćci adbyŭsia vybuch. Zahinuli siem čałaviek, u tym liku śpiecyjalisty rasijskaha jadziernaha centra ŭ Sarovie. Paśla avaryi ŭ rehijonie było zafiksavana pavyšeńnie radyjacyjnaha fonu.

Rasija raniej zajaŭlała pra nibyta paśpiachovyja vyprabavańni «Buravieśnika». U 2025 hodzie Uładzimir Pucin śćviardžaŭ, što rakieta paśpiachova pralacieła kala 14 tysiač kiłamietraŭ za 15 hadzin. Adnak Ministerstva abarony Rasii nie apublikavała videa samoha zapusku. U mai 2026 hoda Pucin zajaviŭ, što raspracoŭka rakiety znachodzicca na zaviaršalnaj stadyi.

Ciapierašniaje pieramiaščeńnie avijacyi, sudnaŭ i zakryćcio pavietranaj prastory kala Novaj Ziamli mohuć śviedčyć pra padrychtoŭku da čarhovaha etapu vyprabavańniaŭ.

Kamientary da artykuła