«Alternatyva dla Hiermanii» choča vyvieści krainu z Šenhienu i jeŭrazony
Sustaršynia pravapapulisckaj partyi «Alternatyva dla Hiermanii» (AdH) Alis Vajdel zajaviła, što ŭ vypadku prychodu jaje partyi da ŭłady Hiermanija moža vyjści ź jeŭrazony i Šenhienskaha pahadnieńnia.
Alis Vajdel. Fota: AP Photo/Martin Meissner
Pra heta palityk skazała ŭ tradycyjnym «Letnim intervju» na hramadska-pravavym telekanale ZDF. Pry hetym Vajdel rezka raskrytykavała ŭrad Hiermanii, nazvaŭšy jaho kiraŭnikoŭ «tupicami», jakija abiacajuć adno, a robiać zusim inšaje.
Vajdel taksama vystupiła suprać tak zvanaha «brandmaŭera» — damoŭlenaści pamiž asnoŭnymi palityčnymi partyjami Hiermanii nie supracoŭničać z AdH. Jana zajaviła, što hatovaja pracavać ź lubymi palityčnymi siłami, adnačasova abvinavaciŭšy ciapierašniuju kiroŭnuju kaalicyju CHDS/CHSS i sacyjał-demakrataŭ u padmanie nasielnictva i razbureńni krainy.
Kali AdH pryjdzie da ŭłady, partyja, pavodle Vajdel, «pakaža, na što zdolnaja». Jana źviazała ŭstupleńnie Hiermanii ŭ jeŭrazonu z paharšeńniem uzroŭniu žyćcia hramadzian. Akramia taho, u ramkach svajoj antymihracyjnaj palityki Vajdel pryhraziła vychadam krainy z Šenhienskaha pahadnieńnia. Pavodle jaje słoŭ, heta dazvoliła b lepš kantralavać miežy i zakryć u ich «dzirki».
Pavodle apošniaha apytańnia Allensbach, praviedzienaha pa zamovie haziety Frankfurter Allgemeine Zeitung, AdH ciapier źjaŭlajecca najbolš papularnaj partyjaj u Hiermanii. Kali b vybary ŭ Bundestah prajšli ŭ najbližejšuju niadzielu, jana mahła b atrymać 27,5% hałasoŭ. CHDS zaniała b druhoje miesca z vynikam 22,5%.
Čytajcie taksama:
U Hiermanii Rasija napiaredadni vybaraŭ zapuściła kampaniju «Matroška»
«Alternatyva dla Hiermanii» pakazała rekordna vysoki vynik u apytańniach