NPZ u Piermi spyniŭ pracu paśla ataki ŭkrainskich bieśpiłotnikaŭ

Piermski naftapierapracoŭčy zavod «Piermnaftaarhsintez», jaki naležyć «Łukojłu», spyniŭ pracu paśla ataki ŭkrainskich bieśpiłotnikaŭ 21 žniŭnia. Pra heta ahienctvu Reuters paviedamili dźvie krynicy ŭ naftavaj halinie. Pavodle ich acenak, ramont moža zaniać da dvuch tydniaŭ.

Paśla ŭdaru pa Piermskim NPZ. Fota: Exilenova+

Ranicaj 21 žniŭnia ŭkrainskija drony atakavali abjekty ŭ Piermi. Paźniej nad terytoryjaj NPZ zaŭvažyli dym. Surazmoŭcy Reuters paćvierdzili, što ŭ vyniku ataki na pradpryjemstvie ŭźnik pažar.

U vyniku była spynienaja asnoŭnaja ŭstanoŭka pieršasnaj pierapracoŭki nafty, na jakuju prypadaje kala 40% mahutnaści zavoda. Jašče adna bujnaja ŭstanoŭka, jakaja zabiaśpiečvaje kala 34% mahutnaści NPZ, nie pracuje z 29 lipienia.

«Piermnaftaarhsintez» źjaŭlajecca adnym z najbujniejšych naftapierapracoŭčych pradpryjemstvaŭ Rasii i zajmaje prykładna siomaje miesca ŭ krainie pa abjomach pierapracoŭki nafty.

Ukrainskija bieśpiłotniki niekalki razoŭ atakavali zavod ź viasny 2026 hoda. U pačatku maja pradpryjemstva ŭžo było vymušanaje prypynić pracu paśla ŭdaraŭ.

Rehularnyja ataki na rasijskuju naftavuju infrastrukturu adbyvajucca na fonie praciahłych prablem z zabieśpiačeńniem unutranaha rynku palivam. Na praciahu leta ŭ Rasii nazirajecca paliŭny kryzis: bienzin daražeje, a ŭ roznych rehijonach uvodziać abmiežavańni na jaho prodaž. Novaja chvala prablem pačałasia ŭ siaredzinie žniŭnia.

Kamientary da artykuła