Navapołacki NPZ rychtujecca da płanavaha ramontu. Heta kiepskaja navina dla Rasii
Vosieńniu rasijski rynak paliva moža znoŭ sutyknucca z deficytam. Na vierasień prypadajuć płanavyja ramonty adrazu na niekalkich bujnych rasijskich naftapierapracoŭčych zavodach, a taksama na Navapołackim NPZ «Naftan». Heta moža adbycca jakraz u pieryjad tradycyjnaha vosieńskaha rostu popytu na bienzin i dyzielnaje paliva, piša «Kommiersant».
Biełaruś apošnim časam aktyŭna kampiensavała skaračeńnie vytvorčaści na rasijskich NPZ. U lipieni biełaruskija pradpryjemstvy pastavili ŭ Rasiju rekordnyja abjomy paliva: kala 212 tysiač ton bienzinu i 162 tysiač ton dyzielnaha paliva.
Adnak užo ŭ pačatku žniŭnia biełaruskija pastaŭki pačali istotna skaračacca. Pavodle acenki adnoj z halinovych krynic, z 20 lipienia pa 12 žniŭnia pa čyhuncy ŭ Rasiju było realizavana tolki kala 21 tysiačy ton biełaruskaha bienzinu. Dla paraŭnańnia, z 22 červienia pa 17 lipienia hety pakazčyk składaŭ 165 tysiač ton.
Padobnaja situacyja skłałasia i z dyzielnym palivam: abjom čyhunačnych pastavak źniziŭsia sa 115,9 tysiačy da 8,5 tysiačy ton. Udzielniki rynku, jak miarkujecca, skaracili zakupki biełaruskaha paliva, raźličvajučy, što situacyja z rasijskaj vytvorčaściu palepšycca ŭ žniŭni.
Mazyrski i Navapołacki NPZ razam majuć značnyja vytvorčyja mahčymaści, adnak ich praca maje važnaje značeńnie nie tolki dla Biełarusi, ale i dla rasijskaha rynku. Značnaja častka biełaruskaha paliva ekspartujecca, pryčym Rasija źjaŭlajecca adnym z asnoŭnych kirunkaŭ.
Płanavy ramont «Naftana» najpierš moža adbicca na spažyŭcach u Pavołžy. Navapołacki zavod nie maje ŭłasnaj sietki AZS u Rasii, tamu značnaja častka jaho pradukcyi pradajecca praź niezaležnych trejdaraŭ. Skaračeńnie pastavak moža ŭ vyniku ŭdaryć mienavita pa ich.
Častkova niedachop biełaruskich pastavak Rasija moža pasprabavać kampiensavać impartam paliva ź Indyi. U pačatku žniŭnia ŭ Murmansk užo prybyła partyja kala 60 tysiač ton indyjskaha bienzinu kampanii Nayara Energy. Pavodle acenak, ahulny štomiesiačny impart paliva ŭ Rasiju moža dasiahać 400 tysiač ton.
Adnak indyjskaje paliva, vierahodna, budzie pastupać pieravažna na zapraŭki bujnych viertykalna intehravanych naftavych kampanij, a nie na svabodny biržavy rynak. Heta aznačaje, što niezaležnyja rasijskija AZS mohuć adčuć deficyt macniej.
Pry hetym ceny na bienzin u Rasii ŭžo rastuć. Z pačatku hoda da siaredziny lipienia siaredniaja roźničnaja cana litra AI-92 pavialičyłasia na 7,4% i dasiahnuła 67,03 rasijskaha rubla (kala 0,79 dalara), a AI-95 — taksama vyrasła na 7,4%, da 72,14 rubla (0,85 dalara). Dyzielnaje paliva padaražeła jašče bolš — na 12,1%, da 86,85 rubla (1,02 dalara) za litr.
U lipieni Rasija jašče bolš pavialičyła zakupki paliva ŭ Biełarusi
Cichanoŭskaja: Mazyrski NPZ — nahladny i balučy prykład taho, jak pamyłki Łukašenki rujnujuć ekanomiku i dabrabyt biełarusaŭ
Mazyrski NPZ trapiŭ pad sankcyi ES
U najbujniejšy pakiet sankcyj ES za apošnija čatyry hady ŭvajšli NPZ Biełarusi i Rasii
U Indyi skazali, što lišniaha bienzinu dla Rasii ŭ ich niama
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1414
Kamientary