Na biełaruskim Paleśsi farmujecca papulacyja redkich matylkoŭ-paruśnikaŭ

Biełaruskija navukoŭcy zaŭvažyli prykmiety farmavańnia na poŭdni krainy stabilnaj papulacyi redkaha ciepłalubivaha matylka — padaliryja. Daśledčyki źviazvajuć jaho raspaŭsiudžvańnie ŭ Biełarusi z sučasnym paciapleńniem klimatu.

Fota: NPC bijaresursaŭ NAN Biełarusi

Sioleta zaałahičnaja kalekcyja i hienietyčny bank dzikaj faŭny Nacyjanalnaj akademii navuk Biełarusi papoŭnilisia niekalkimi ekzemplarami padaliryjaŭ.

Asablivaść hetych znachodak u tym, što matylki prajšli ŭ Biełarusi poŭny cykł raźvićcia. Raniej padaliryi tut sustrakalisia vielmi redka. Na praciahu XIX i XX stahodździaŭ na terytoryi krainy zafiksavali nie bolš za dziesiać asobin letniaha pakaleńnia.

Adnak tolki sioleta ŭ Homielskaj vobłaści navukoŭcy vyjavili bolš padaliryjaŭ, čym było adznačana za ŭsie papiarednija dva stahodździ. Akramia darosłych matylkoŭ, daśledčyki znajšli asobin viasnovaha pakaleńnia, kładki jajek i ślady žyćciadziejnaści vusieniaŭ.

Usio heta śviedčyć pra toje, što na poŭdni Biełarusi, u tym liku na Paleśsi, padaliryi ŭžo mohuć nie prosta časova źjaŭlacca, a razmnažacca i farmavać ustojlivuju papulacyju.

Padaliryi naležać da siamiejstva paruśnikaŭ. Heta bujnyja pryhožyja matylki z razmacham kryłaŭ da 72 milimietraŭ. Ich kryły majuć śvietła-žoŭty asnoŭny koler, čorny ŭzor u vyhladzie klinavatych pałos i błakitnuju ablamoŭku.

Svaju nazvu vid atrymaŭ u honar Padaliryja — hieroja staražytnahreckaj mifałohii, znakamitaha doktara, syna Asklepija i Epijony.

Kamientary da artykuła