Va Ukrainie zaviali spravu za pieradaču Biełarusi prahramy dla vajskovych avijacyjnych trenažoraŭ

Va Ukrainie raspačali kryminalnuju spravu suprać hramadzianina krainy, jakoha padazrajuć u niezakonnaj pieradačy Biełarusi prahramnaha zabieśpiačeńnia dla vajskovaha avijacyjnaha trenažora, piša «Radyjo Svaboda».

Ukrainski transpartny samalot Ił-76. Zdymak ilustracyjny. Fota: facebook.com/UkraineNatoMission

Pavodle infarmacyi «Radyjo Svaboda», ukrainiec, abychodziačy sankcyjnyja abmiežavańni i parušajučy praviły mižnarodnaj pieradačy tavaraŭ i technałohij padvojnaha pryznačeńnia, pieradaŭ biełaruskim partnioram prahramu dla stacyjanarnaha kompleksnaha trenažora «KTS-21M». Hety trenažor vykarystoŭvajecca dla padrychtoŭki piłotaŭ vajskovych samalotaŭ MiH-29.

U spravie mohuć fihuravać niekalki hramadzian Ukrainy. Adzin ź ich, pavodle krynicy, pracuje ŭ Biełarusi ŭ ZAT «Hrupa vytvorčych technałohij i avijacyjnaha mašynabudavańnia «Aeramaš», raźmieščanym u Mačuliščach pad Minskam.

Pradpryjemstva zajmajecca raspracoŭkaj, vytvorčaściu, ramontam i madernizacyjaj avijacyjnaj techniki, a taksama stvareńniem i absłuhoŭvańniem avijacyjnych trenažoraŭ. Na bazie «KTS-21M» rychtujuć piłotaŭ bajavych samalotaŭ MiH-29.

Ukrainskija śledčyja ličać, što pieradača prahramnaha zabieśpiačeńnia adbyłasia nie paźniej za červień 2025 hoda praz adzin ź miesiendžaraŭ. Za pieradadzienuju infarmacyju padazravany, jak miarkujecca, atrymaŭ 1000 dalaraŭ.

Ciapier sud abmiežavaŭ jaho svabodu tak zvanymi asabistymi abaviazańniami — mieraj, padobnaj da padpiski ab niavyjeździe.

Śledstva śćviardžaje, što ŭkrainiec pieradaŭ technałohiju svajmu byłomu kalehu ź Instytuta aŭtamatyzavanych sistem Akademii navuk Ukrainy. Raniej padazravany pracavaŭ kanstruktaram elektronnych avijacyjnych trenažoraŭ. Jon udzielničaŭ u raspracoŭcy kompleksaŭ dla padrychtoŭki ekipažaŭ vajskovych viertalotaŭ Mi-8 i Mi-24, źniščalnikaŭ MiH-29, a taksama transpartnych samalotaŭ Ił-76.

Padčas pieratrusaŭ u padazravanaha kanfiskavali mabilnyja telefony i roznyja elektronnyja nośbity infarmacyi. Śledčyja pavinny vyśvietlić, jakija mienavita technałohii byli pieradadzienyja Biełarusi i chto jašče moh być datyčny da hetaj schiemy.

Sprava maje značeńnie ŭ kantekście vajskovaha supracoŭnictva Biełarusi z Rasijaj. Paśla pačatku poŭnamaštabnaha rasijskaha ŭvarvańnia va Ukrainu biełaruskija ŭłady dazvolili Rasii vykarystoŭvać biełaruskuju vajskovuju infrastrukturu i pavietranuju prastoru. Akramia taho, biełaruskija pradpryjemstvy ŭdzielničajuć u vykanańni rasijskich vajskovych zakazaŭ.

Kamientary da artykuła