Aryna Sabalenka stała ambasadarkaj jašče adnaho brenda

Pieršaja rakietka śvietu Aryna Sabalenka stała ambasadarkaj izrailskaj kampanii Moroccanoil, jakaja vypuskaje srodki dla dohladu za vałasami. Biełaruskaja tenisistka ŭžo apublikavała sumiesny z brendam post u Instagram, piša Office Life.

Aryna Sabalenka. Fota: Moroccanoil

Historyja Moroccanoil, pavodle lehiendy, pačałasia ŭ 2006 hodzie. Budučaja zasnavalnica kampanii Karmen Tal padčas pajezdki ŭ Izrail naviedała sałon, dzie joj sapsavali vałasy. U inšym sałonie prablemu vyrašyli z dapamohaj arhanavaha aleju. Paśla hetaha Tal nabyła fłakon aleju, pryviezła jaho ŭ Kanadu i razam z mužam i izrailskim cyrulnikam Majkam Sabaham zasnavała biznes pa vytvorčaści srodkaŭ dla vałasoŭ.

U kampanii zajavili, što Sabalenka i Moroccanoil idealna padychodziać adno adnamu. Tenisistka ŭvasablaje ŭpeŭnienaść, siłu i indyvidualnaść, jakija adpaviadajuć kaštoŭnaściam brenda.

U jakaści ambasadarki Sabalenka budzie ŭdzielničać u hłabalnych rekłamnych kampanijach Moroccanoil i stvarać ekskluziŭny kantent dla kampanii. Finansavyja ŭmovy partniorstva nie raskryvajucca.

Sama Sabalenka raskazała, što daŭno karystajecca pradukcyjaj Moroccanoil i ličyć jaje častkaj svajho štodzionnaha dohladu.

Brend užo maje suviazi z tenisam: niekalki hadoŭ Moroccanoil byŭ aficyjnym partnioram pa dohladzie za vałasami turniru Miami Open.

Sabalenka praciahvaje pašyrać śpis bujnych rekłamnych partnioraŭ. Raniej kantrakty ź joj zaklučyli Gucci, Stella Artois, Emirates Airlines i ńju-jorkskaja juvielirnaja kampanija Material Good.

Pavodle rejtynhu Sportico, za pieryjad z 1 červienia 2025 hoda pa 1 lipienia 2026‑ha Sabalenka zarabiła $35,9 miljona, zaniaŭšy piataje miesca siarod samych vysokaapłatnych tenisistak śvietu. Z hetaj sumy $13,9 miljona skłali pryzavyja, a jašče $22 miljona — dachody ad rekłamnych kantraktaŭ.

Kamientary da artykuła