Biełaruskija kanaistki zavajavali zołata čempijanatu śvietu

Biełaruski duet Julii Truškinaj i Iny Niadzielkinaj staŭ čempijonam śvietu ŭ kanoe-dvojcy na dystancyi 200 mietraŭ.

Julija Truškina i Ina Niadzielkina

Čempijanat śvietu pa viesłavańni na bajdarkach i kanoe ŭ hetyja dni prachodzić u polskim Poznani. U finalnym zajeździe biełaruskam spatrebiłasia dla pieraadoleńnia dystancyi 42,26 siekundy. Jany apiaredzili na 0,26 siekundy pradstaŭnic Uźbiekistana, a kitajskuju paru — na 0,39 siekundy.

Dla Truškinaj i Niadzielkinaj heta ŭžo treci zapar miedal čempijanataŭ śvietu. U 2024 hodzie jany taksama stali čempijonkami śvietu na hetaj dystancyi, a ŭ 2025‑m zavajavali srebra.

Jašče adnu ŭznaharodu dla Biełarusi ŭ hety dzień pryniesła Alena Nazdrova, jakaja stała bronzavaj pryziorkaj u kanoe-adzinočcy na dystancyi 500 mietraŭ.

Učora ž biełarusy zdabyli na hetym čempijanacie dva bronzavyja miedali. 

Na dystancyi 200 m u kanoe-adzinočcy trecim pryjšoŭ da finišu Andrej Žołabaŭ z vynikam 41,15 siekundy. Dla jaho heta pieršy miedal na darosłym ČS.

Taksama ŭ kanoe-dvojkach na 500 m bronzu zavajavali Anhielina Bardanoŭskaja i taja ž Ina Niadzielkina z vynikam 2 chviliny i 02,67 siekundy.

Kamientary da artykuła