Stali viadomyja novyja padrabiaznaści lutaŭskaha žorstkaha napadu na siamju pad Smalavičami

Śledčy kamitet zaviaršyŭ rasśledavańnie hučnaha napadu na siamju ŭ ahraharadku Budahova Smalavickaha rajona, jaki adbyŭsia 16 lutaha 2026 hoda. U spravie vyśvietlilisia novyja abstaviny, u tym liku padrabiaznaści zamoŭnaha charaktaru złačynstva, piša «Minskaja praŭda».

Fota: Śledčy kamitet

Ranicaj kala čaćviortaj hadziny haspadar doma pačuŭ brech sabak i zaŭvažyŭ u dvary troch mužčyn u ciomnaj vopratcy i maskach. Kali jany nablizilisia da doma, jon paśpieŭ nacisnuć tryvožnuju knopku. Napadniki hetaha nie zaŭvažyli, vybili akno i pranikli ŭ budynak.

U domie znachodzilisia 63‑hadovy haspadar, jaho 65‑hadovaja žonka i 67‑hadovy brat. Złamyśniki byli ŭzbrojenyja pistaletami, bitaj, nažom i inšymi pradmietami. Jany źbivali ludziej, pahražali im zbrojaj, prymušali stajać na kaleniach i patrabavali nazyvać asabistyja źviestki. Usio adbyvałasia pad videazapis.

Paźniej vyśvietliłasia, što napad mieŭ zakazny charaktar. Troje maładych rasijan atrymali zadańnie praz Telegram: znajści peŭny dom, źbić mužčynu i žančynu, nie zabivajučy ich, a vynik źniać na videa. Za heta im abiacali hrošy. Napadnikami byli dvoje 18‑hadovych žycharoŭ horada Kstova Nižaharodskaj vobłaści i 17‑hadovy padletak ź Nižniaha Noŭharada.

Pavodle pakazańniaŭ adnaho z padazravanych, spačatku havorka išła pra 50 tysiač rasijskich rubloŭ (kala 590 dalaraŭ), potym pra 150 tysiač (kala 1500 tysiač dalaraŭ), a paśla pryjezdu ŭ Biełaruś — užo pra 300 tysiač (kala 3000 dalaraŭ dalaraŭ) na traich. Adzin z udzielnikaŭ raniej zajmaŭsia boksam i pahadziŭsia na pracu, bo mieŭ finansavyja prablemy.

Jak padazraje śledstva, zakazčykam moža być rasijanin, jaki byŭ sužycielem dački paciarpiełych. Adnojčy jon źbiŭ žančynu i taja napisała zajavu ŭ palicyju. Paśla hetaha mužčyna pahražaŭ raspravaj nad jaje svajakami.

Padčas napadu haspadara niekalki razoŭ udaryli bitaj, u tym liku pa śpinie i nazie. Jaho brata ŭdaryli ŭ vobłaść skivicy. Žančynu taksama źbivali bitaj pa ruce, a paśla zasunuli joj u rot skručanuju tkaninu, kab jana nie kryčała. Usie troje paciarpiełych atrymali roznyja traŭmy i byli dastaŭlenyja ŭ balnicu.

Situacyja mahła skončycca značna ciažej, kali b haspadar doma nie paśpieŭ padać sihnał tryvohi. Supracoŭniki milicyi, jakija prybyli na vyklik, pačuli šum baraćby i zabłakavali budynak. Padčas zatrymańnia napadniki akazali supraciŭ, tamu supracoŭniki Departamienta achovy vykarystali ahniastrelnuju zbroju. Dvuch złamyśnikaŭ zatrymali na miescy, treciaha nieŭzabavie znajšli ŭ Smalavickim rajonie.

Śledstva taksama atrymała videazapis z telefona adnaho z udzielnikaŭ, jaki dazvoliŭ udakładnić realnuju kolkaść naniesienych udaraŭ.

Pavodle viersii abvinavačanych, jany nibyta chacieli tolki napałochać paciarpiełych i nie mieli namieru pryčynić im ciažkija traŭmy. Śledčyja ličać hetyja śćviardžeńni sprobaj źmiakčyć adkaznaść.

Dvum fihurantam vystaŭlena abvinavačańnie ŭ zamachu na naŭmysnaje pryčynieńnie ciažkich cialesnych paškodžańniaŭ. Treciamu, jaki niepasredna padtrymlivaŭ suviaź z zakazčykam, dadatkova stavicca ŭ vinu jašče adzin artykuł Kryminalnaha kodeksa.

Paśla zaviaršeńnia rasśledavańnia kryminalnaja sprava pieradadzienaja ŭ prakuraturu.

Kamientary da artykuła