U niepalskaj katastrofie cudam acaleŭ biruzovy dom, na jaki abrynuŭsia sielevy patok. Jak jamu heta ŭdałosia?
U rajonie Tryšuli ŭ Niepale paśla mahutnaj pavodki acaleŭ adzin z damoŭ, jaki ciapier u sacyjalnych sietkach nazyvajuć «cuda-domam» i «biruzovym domam». Vada, hraź, kamiani i abłomki razburyli navakolnyja budynki, ale žalezabietonnaja kanstrukcyja hetaha doma vytrymała ŭdar stychii, piša Independent.
Skrynšot ź videa
Na videa, jakija raspaŭsiudžvajucca ŭ internecie, vidać, jak burnyja patoki vady pranosiacca praź nižnija pavierchi, zryvajuć dźviery i vokny i zapaŭniajuć pamiaškańni brudam. Žychary tym časam chavalisia na vierchnich pavierchach i ŭ vyniku nie paciarpieli.
U domie znachodzilisia 45‑hadovy Prakaš Pandej Pjakiureł, jahonaja žonka, dvoje dziaciej i pažyłyja baćki. Kali pačałasia pavodka, muž i žonka byli ŭ susiedniaj kramie. Ich siamihadovy syn pajšoŭ u škołu za 15 chvilin da hetaha, a 11‑hadovaja dačka tolki źbirałasia vychodzić.
Siamja paśpieła viarnucca ŭ dom, dzie amal dźvie hadziny zastavałasia ŭ pastcy. Ludzi nazirali, jak ledzianaja vada, nasyčanaja hraźziu i abłomkami, bje pa budynku z usich bakoŭ i prymušaje jaho dryžać. Žančyna pryznałasia, što jany ŭžo rychtavalisia da śmierci, ale ŭ vyniku ŭsie zastalisia žyvyja.
Paźniej adzin z členaŭ siamji pačaŭ machać čyrvonym ściaham, kab pryciahnuć uvahu vyratavalnaha viertalota.
U videaroliku, apublikavanym u akaŭncie Architecture Presentation u X, vykazvajecca mierkavańnie, što biruzovy dom acaleŭ dziakujučy niezvyčajnaj dla Himałajaŭ kanstrukcyi.
Bolšaść žyłych damoŭ u Niepale ŭźviedzienyja z kamiennych muroŭ. Takija budynki dobra vytrymlivajuć viertykalnuju nahruzku, ale pry mocnym bakavym udary ich ścieny mohuć razburacca, a dachi — abvalvacca.
Acaleły dom maje žalezabietonny karkas, zmacavany bietonam i armaturaj. Tamu, kali na jaho abrynuŭsia mahutny sielevy patok, jon vymyŭ častku mura sa ścien i prajšoŭ dalej, ale asnoŭny karkas budynka zastaŭsia cełym.
Mienavita tryvałaja karkasnaja kanstrukcyja, jak miarkujuć inžyniery, i dazvoliła domu vytrymać udar stychii.
Pavodka pačałasia kala 8:32 ranicy pa miascovym časie paśla taho, jak častka himałajskaha ledavika adarvałasia i abrynułasia ŭ dalinu kala miažy Niepała i Kitaja. Mahutny patok panios z saboj vielizarnyja kamiani, drevy i hraź, razburajučy pasieliščy, darohi, masty i linii suviazi.
Pa stanie na paniadziełak kolkaść zahinułych u Niepale i Kitai vyrasła da 908 čałaviek, jašče kala 5 tysiač ličacca źnikłymi bieź viestak.
Stychija paškodziła 19 mastoŭ i kala 40 kiłamietraŭ aŭtamabilnych daroh, a taksama vyvieła z ładu bolš za 10% mahutnaściaŭ pa vytvorčaści elektraenierhii ŭ Niepale.
Na fonie maštabnych razbureńniaŭ acaleły dom staŭ dla mnohich simvałam vyžyvańnia i nahadvańniem pra toje, nakolki važnymi mohuć być jakasnaje prajektavańnie i tryvałaja kanstrukcyja budynkaŭ.
Čytajcie taksama:
U hrazievym patoku ŭ Niepale zahinuła ci źnikła 5700 čałaviek
U Niepale pachavali 229 nieapaznanych cieł. Sotni achviar pavodki mohuć tak i zastacca nieapaznanymi
«Ja straciŭ 140 susiedziaŭ». Reparciory pabyvali ŭ zonie pavodki ŭ Niepale
«Kajłas, ja idu». Što za biełaruska źnikła ŭ žudasnym sieli ŭ Niepale