Bujnaja rasijskaja sietka miedycynskich łabaratoryj adkryje pieršuju kliniku ŭ Biełarusi

Rasijskaja sietka miedycynskich łabaratoryj Invitro płanuje sioleta adkryć u Biełarusi miedycynski centr novaha farmatu — «Invitro Klinika». Dla hetaha ŭžo padadzienaja zajaŭka na rehistracyju adpaviednaha tavarnaha znaka ŭ Biełarusi, piša Office Life.

Fota: Office Life

Heta budzie nie zvyčajny łabaratorny ofis, a šmatprofilnaja klinika, dzie ŭ adnoj sistemie buduć pracavać łabaratornaja dyjahnostyka, pryjom daktaroŭ i instrumientalnyja daśledavańni. U Rasii pad takim brendam užo pracujuć kala 430 klinik.

Pieršuju biełaruskuju kliniku płanujuć raźmiaścić u mikrarajonie Kamiennaja Horka ŭ Minsku. U kampanii tłumačać, što śviadoma vybrali žyły rajon, a nie centr horada. Tut žyvie šmat siemjaŭ ź dziećmi, ludziej pracazdolnaha ŭzrostu i starejšych hramadzian, dla jakich važnaja mahčymaść atrymać roznyja miedycynskija pasłuhi pobač z domam.

Invitro pracuje ŭ Biełarusi bolš za 12 hadoŭ. Siońnia sietka maje 61 ofis u 20 haradach, ale asnoŭnym napramkam jaje dziejnaści tut zastajecca łabaratornaja dyjahnostyka.

Adkryćcio novaj kliniki zapłanavanaje da kanca 2026 hoda. Kančatkovyja terminy buduć zaležać ad zaviaršeńnia licenzijnych pracedur i padrychtoŭki pamiaškańnia.

Kamientary da artykuła