Rasijski «Afrykanski korpus» dapamoh miascovaj chuncie zadušyć sprobu vajskovaha pieravarotu ŭ Nihiery
Armija Nihiera pry padtrymcy rasijskaha «Afrykanskaha korpusa» zadušyła sprobu vajskovaha miaciažu i viarnuła kantrol nad važnaj avijabazaj №101 u stalicy krainy Nijamiei, paviedamlaje The Moscow News.
U noč na 29 žniŭnia ŭ stalicy niekalki hadzin čulisia streły i vybuchi kala mižnarodnaha aeraporta. Kala sotni miaciežnikaŭ zachapili ŭ zakładniki vajskoŭcaŭ na bazie i adkryli ahoń pa stratehičnych abjektach. Na niekalki hadzin taksama spyniłasia dziaržaŭnaje televizijnaje i radyjoviaščańnie.
Prezidenckaja hvardyja, jakaja padtrymlivaje kiraŭnika vajskovaj chunty Abdurachmana Tyjani, pry dapamozie rasijskaha «Afrykanskaha korpusa» zdoleła adbić ataku i adnavić kantrol nad bazaj.
Pavodle słoŭ troch krynic Reuters, rasijskija vajskoŭcy adyhrali klučavuju rolu ŭ apieracyi. Adna z krynic śćviardžaje, što jany vykarystoŭvali ŭdarnyja bieśpiłotniki, u vyniku čaho zahinuli niekalki miaciežnikaŭ. Inšaja paviedamiła, što paśla ŭdaraŭ dronaŭ paŭstancy zdalisia.
Rasijskaje MZS paćvierdziła ŭdzieł svaich vajskoŭcaŭ u zadušeńni miaciažu i zajaviła pra «salidarnaść z narodam Nihiera». Dapamohu ŭradu krainy taksama akazaŭ Ałžyr, jaki nakiravaŭ čatyry źniščalniki.
Sproba pieravarotu stała surjoznym vyprabavańniem dla Tyjani, jaki sam pryjšoŭ da ŭłady ŭ vyniku vajskovaha pieravarotu ŭ lipieni 2023 hoda. Paśla hetaha Nihier pastupova admoviŭsia ad vajskovaha supracoŭnictva z zachodnimi krainami i zrabiŭ staŭku na Rasiju. Francuzskija vajskoŭcy pakinuli krainu ŭ kancy 2023 hoda, amierykanskija — vosieńniu 2024-ha, a ŭ 2025 hodzie Nihier zakryŭ niamieckuju vajskovuju bazu.
Ciapier na avijabazie №101 u Nijamiei raźmiaščajecca štab rasijskaha «Afrykanskaha korpusa», a taksama štab abjadnanych sił Aljansu dziaržaŭ Sachiela, kudy ŭvachodziać Nihier, Mali i Burkina-Faso — usiudy ciapier kirujuć prarasijskija chunty.
Nihier maje značnyja zapasy pryrodnych resursaŭ: kraina ŭvachodzić u lik najbujniejšych vytvorcaŭ uranu ŭ śviecie, a taksama ekspartuje naftu i zołata. U 2025 hodzie miascovyja ŭłady nacyjanalizavali sumiesnaje z francuzskaj kampanijaj Orano pradpryjemstva SOMAÏR.
Čytajcie taksama:
U stalicy prarasijskaha Nihiera adbylisia ŭzbrojenyja sutyknieńni
Tramp moža pačać vajennuju apieracyju ŭ Mali, dzie znachodzicca «Afrykanski korpus» Pucina
U Mali zajavili, što Rasija im zdradziła. Padziei raźvivajucca pa siryjskim scenary
U afrykanskaj dziaržavie Nihier źnikła vialikaja partyja ŭranu. Za hetym mohuć stajać Iran ci Rasija