U Mali zajavili, što Rasija im zdradziła. Padziei raźvivajucca pa siryjskim scenary

U Mali, dzie z suboty iduć bai ŭradavych sił i rasijskaha «Afrykanskaha korpusa» z paŭstancami i isłamistami, praciahvaje abvastracca situacyja. Pavodle zajavaŭ paŭstancaŭ i vajennych błohaŭ, malijskija i rasijskija vajskoŭcy praciahvajuć pakidać nasielenyja punkty. Na hetym fonie Minabarony Rasii ŭ aŭtorak adspravazdačyłasia ab praduchileńni dziaržpieravarotu ŭ Mali siłami «Afrykanskaha korpusa», a ananimny vysokapastaŭleny malijski čynoŭnik zajaviŭ, što rasijskija vajskoŭcy «zdradzili» ŭładam krainy, piša «Ahientstvo». 

U aŭtorak paŭstancy zajavili ab zachopie haradoŭ Tesalit, Tesit, Ahielchok, Bier i Mienaka, a taksama załatoha radovišča Intachaka, paviedamiŭ telehram-kanał Directorate 4, jaki manitoryć ekstremisckija i paŭstanckija hrupy ŭ Afrycy i na Blizkim Uschodzie. Paŭstancy śćviardžajuć, što siły malijskaj armii i «Afrykanskaha korpusa» pakinuli harady paśla pieramoŭ. Taksama kanał apublikavaŭ, jak śćviardžajecca, videa z paŭstancami ŭ Tesalicie i na Intachacy.

Paśla adstupleńnia z horada Kidal («Afrykanski korpus» zajaviŭ pra heta ŭ paniadziełak ranicaj) «pačała sypacca abarona na ŭsioj poŭnačy krainy», napisaŭ u aŭtorak blizki da rasijskaha Minabarony z-kanał «Rybar». Jon paviedamiŭ ab pierachodzie horada Łabiezanha pad kantrol hrupoŭki «Isłamskaja dziaržava ŭ pravincyi Sachiel» i sprahnazavaŭ adstupleńnie «Afrykanskaha korpusa» z Tesalita. Jak piša «Rybar», hety horad «adyhryvaŭ ci nie hałoŭnuju rolu va ŭtrymańni poŭnačy». Kanał nie vyklučyŭ «zdaču Aniefisa i Mienaki».

Pakul malijskaja armija była adciahnuta na arhanizacyju abarony na poŭnačy Mali, u horad Mienaka na paŭnočnym uschodzie krainy niepadalok ad miažy ź Nihieram uvajšli bajeviki «Isłamskaj dziaržavy ŭ pravincyi Sachiel», paviedamiŭ u aŭtorak Reuters sa spasyłkaj na piać krynic. Hrupoŭka nie ŭdzielničała ŭ apieracyjach suprać malijskaj armii i «Afrykanskaha korpusa» ŭ vychodnyja.

«Afrykanski korpus» uviečary ŭ aŭtorak zajaviŭ ab adsutnaści paŭstancaŭ u Mienacy, vulicy jakoj rasijskija vajskoŭcy, zhodna z zajavaj, patrulujuć razam z armijaj Mali. Pry hetym u kanale «Afrykanskaha korpusa» pryznali, što abstanoŭka ŭ Mali «praciahvaje zastavacca napružanaj».

Paŭstancy z hrupoŭki «Džamaat Nusrat al-Isłam val-Muślimin» (JNIM) u aŭtorak zajavili ab pačatku abłohi stalicy Mali Bamako.

U aŭtorak upieršyniu z pačatku nastupleńnia paŭstancaŭ na publicy źjaviŭsia prezident Mali Asimi Haita, jaki sustreŭsia z rasijskim pasłom u krainie Iharam Hramykam.

Minabarony Rasii za dźvie hadziny da pasta «Rybara» ŭ aŭtorak zajaviła, što 25 krasavika «Afrykanski korpus» praduchiliŭ dziaržpieravarot u Mali. Taksama ŭ zajavie viedamstva havorycca, što ŭ zdadzienym «Afrykanskim korpusam» horadzie Kidali rasijskija vajskoŭcy «bolš za sutki viali bai ŭ poŭnym akružeńni suprać šmatrazova pieraŭzychodziačaj hrupoŭki i adbili čatyry masiravanyja ataki».

Rasija napiaredadni taksama ŭpieršyniu aficyjna pryznała straty «Afrykanskaha korpusa» padčas bajoŭ u Mali. Pra straty zajaviŭ u Saviecie Fiederacyi namieśnik kiraŭnika MZS RF Hieorhij Barysienka.

«Rasija adviarnułasia ad sajuźnika»

Vysokapastaŭleny malijski čynoŭnik, kamientujučy zdaču horada Kidal, zajaviŭ francuzskaj radyjostancyi RFI, što «rasijanie nam zdradzili». Pavodle jaho słoŭ, hubiernatar pravincyi papiaredziŭ rasijskich najmitaŭ ab padrychtoŭcy napadu «za try dni da jaho», ale «jany ničoha nie zrabili», dadaŭšy, što ich adychod, vidać, byŭ uzhodnieny zahadzia.

Prynamsi 400 rasijskich vajskoŭcaŭ z Kidala pad kanvojem «Frontu vyzvaleńnia Azavada» byli evakuiravany ŭ Tesalit (300 km na poŭnač), paviedamiŭ pradstaŭnik paŭstancaŭ francuzskaj haziecie Le Monde. Pavodle jaho ž słoŭ, jany pavinny buduć samastojna pakinuć krainu. Takim čynam, chunta ŭbačyła, jak jaje samy vierny sajuźnik adviarnuŭsia ad jaje, piša Le Monde.

Infarmahienctva «Afrykanskaja inicyjatyva», jakoje kuryruje FSB, u aŭtorak napisała, što «vajavać zamiest US 30‑miljonnaj krainy ŭ składzie adnoj niapoŭnaj bryhady nichto nie płanavaŭ».

Vyhladaje, što situacyja ŭ Mali raźvivajecca pa siryjskim scenary. Za malijskimi paŭstancami mohuć stajać Siryja i Francyja. A Rasija vymušanaja skancentravać usie svaje resursy na Ukrainie i ničym nie moža dapamahčy svaim staŭlenikam u Bamako, jak raniej — Bašaru Asadu.

• 8
• 0
• 21
• 0
• 0
• 1
• 0
• 0