«Hazpram» nie admoviŭsia ad płanaŭ budavać u Biełarusi zavod pa vytvorčaści ZPH

Try hady tamu stała viadoma, što «Hazprom» płanuje naładzić u Biełarusi vytvorčaść zvadkavanaha pryrodnaha hazu (ZPH). Pra toje, na jakim etapie ciapier znachodzicca hety prajekt, raskazaŭ ministr enierhietyki Biełarusi Dzianis Maroz, piša Office Life.

Zdymak ilustracyjny. Fota: vecteezy.com

Pavodle słoŭ ministra, praca nad prajektam praciahvajecca. U pryvatnaści, ciapier abmiarkoŭvajecca miesca, dzie moža być pabudavany zavod. Inšyja padrabiaznaści pakul nie raskryvajucca, ale ŭ najbližejšy čas čakajecca padpisańnie aficyjnych kantraktaŭ.

Pahadnieńnie ab budaŭnictvie ŭ Biełarusi zavoda pa vytvorčaści ZPH padpisali ŭ 2023 hodzie na Pieciarburhskim mižnarodnym hazavym forumie. Adnak u 2024‑m u «Hazpramie» paviedamlali, što realizacyi prajekta pieraškadžaje adsutnaść nieabchodnaha zakanadaŭstva. Prablemu prapanavali vyrašyć za košt raźmiaščeńnia pradpryjemstva ŭ zonie z asablivym pravavym režymam — Kitajska-Biełaruskim industryjalnym parku «Vialiki kamień».

Płanavałasia, što biełaruski zavod budzie źviazany z anałahičnym pradpryjemstvam u Vałhahradskaj vobłaści. Prajektnaja mahutnaść kompleksu aceńvałasia ŭ 3360 ton ZPH.

Mierkavałasia, što asnoŭnym spažyŭcom zvadkavanaha hazu stanie technika MAZa i BiełAZa. Akramia taho, ZPH źbiralisia vykarystoŭvać dla zapraŭki aŭtamabilaŭ na trasie M-1, jakaja złučaje Brest i Maskvu.

Kamientary da artykuła