Stali viadomyja žachlivyja abstaviny śmierci byłoha vučonaha sakratara Instytuta historyi. Jamu było 45 hadoŭ
Jak daviedałasia «Naša Niva», susiedzi pakinuli nieprytomnaha historyka Andreja Sałaŭjanava pamirać u lifcie, bo vyrašyli, što toj p‘jany.
Andrej Sałaŭjanaŭ. Skrynšot z STB, palepšany z dapamohaj štučnaha intelektu
Učora kala 9 viečara Andrej Sałaŭjanaŭ — historyk, viadučy navukovy supracoŭnik Akademii kiravańnia pry prezidencie i były šmathadovy vučony sakratar Instytuta historyi Nacyjanalnaj akademii navuk Biełarusi — viartaŭsia damoŭ.
Jon žyŭ u Minsku ŭ domie 101A na vulicy Adojeŭskaha, na 16 paviersie, padymaŭsia ŭ svaju kvateru na lifcie — i tam jamu stała drenna. Na videa z kamier nazirańnia bačna, jak Andrej upaŭ na padłohu. Vyjści na svaim paviersie mužčyna nie zmoh — tak i zastaŭsia lažać.
Toj samy dom 101A na vulicy Adojeŭskaha. Fota: kvartiranasutki.by
Inšyja žychary doma vyklikali lift — ale kali pabačyli ŭ im susieda biez prytomnaści, to zamiest dapamohi pačali aburacca. Jany vyrašyli, što mužčyna mocna pjany. Jechać ź im razam nie zachacieli, tamu vyrašyli vyklikać inšy lift. A technična kab heta zrabić, nieabchodna było adpravić lift z Sałaŭjanavym na inšy pavierch. Tamu jany prosta nacisnuli vypadkovuju knopku.
U hety momant u padjeździe źjaviłasia žančyna z maleńkim dziciom. Jana pačuła, jak aburanyja susiedzi abmiarkoŭvajuć «pjanaha, jaki zasnuŭ u lifcie». Maŭlaŭ, takim ludziam dapamahać — tolki atrymać sabie prablemy, bo niećviarozy čałaviek moža być davoli ahresiŭnym.
U vyniku žančyna ź dziciom i jašče adnoj susiedkaj dačakalisia lifta z čałaviekam na padłozie i vyklikali chutkuju dapamohu.
Kali pryjechali miedyki, Sałaŭjanaŭ byŭ jašče žyvy — kali jaho dastali ź lifta, mužčyna byŭ fijaletavaha koleru. Historyka sprabavali reanimavać u padjeździe, ale jon pamior. Imavierna, pryčyna była ŭ sardečnym prystupie. Jak vyśvietliłasia, Andrej byŭ ćviarozym.
Vučonamu było ŭsiaho 45 hadoŭ. U 2003‑m jon skončyŭ histaryčny fakultet Viciebskaha dziaržaŭnaha ŭniviersiteta imia P. M. Mašerava, paśla vučyŭsia ŭ aśpirantury BDU. Paśla jaje zakančeńnia pryjšoŭ na pracu ŭ Instytut historyi NANB, z 2012 pa 2022 hady byŭ vučonym sakratarom hetaj ustanovy.
U 2022 hodzie pierajšoŭ na pracu ŭ Akademiju kiravańnia pry prezidencie, rektaram jakoj tady byŭ były dyrektar Instytuta historyi NANB Viačasłaŭ Daniłovič. Zajmaŭ tam pasadu spačatku staršaha, a paśla viadučaha navukovaha supracoŭnika Navukova-daśledčaha instytuta teoryi i praktyki dziaržaŭnaha kiravańnia.