Tesla vypuściła na vulicy robataksi biez rula i piedalaŭ. Ci navažacca ludzi ŭ ich sieści?
Sprabujučy dahnać kankurentaŭ na rynku bieśpiłotnych taksi, Iłan Mask pajšoŭ na krok, na jaki pakul navažvalisia niamnohija. Dla Tesla heta moža stać adnym z samych važnych ekśpierymientaŭ apošnich hadoŭ.
Tesla Cybercab na vulicach Ościna. 3 vieraśnia 2026 hoda. Fota: AP Photo / Eric Gay
Apošnija hady dla aŭtamabilnaha biznesu Iłana Maska byli niaprostymi. Prodažy Tesla letaś skaracilisia druhi hod zapar, prybytak kampanii ŭpaŭ, a pieršynstvo na suśvietnym rynku elektramabilaŭ pierajšło da kitajskaj BYD.
Tamu budučyniu Tesla Mask usio čaściej źviazvaje nie tolki z prodažam elektramabilaŭ. Adnoj z hałoŭnych stavak kampanii stali mašyny, zdolnyja samastojna vazić pasažyraŭ.
Servis bieśpiłotnych taksi Tesla pracuje ŭ Ościnie (štat Techas) z červienia minułaha hoda, a paźniej źjaviŭsia jašče ŭ piaci haradach Techasa i Fłarydy. Spačatku ŭ mašynach znachodzilisia strachavyja kiroŭcy, hatovyja pierachapić kiravańnie ŭ vypadku prablem. Ciapier častka robataksi ŭžo jeździć bieź ich.
Pavodle źviestak sajta RobotaxiTracker, takich mašyn u Tesla bolš za 200. Heta, adnak, našmat mienš, čym u hałoŭnaha kankurenta — kampanii Waymo, jakaja naležyć toj ža karparacyi, što i Google. U jaje bolš za 4000 bieśpiłotnych taksi ŭ 14 haradach.
Dahetul, adnak, navat robataksi Tesla biez strachavoha kiroŭcy zastavalisia aŭtamabilami sa zvykłymi orhanami kiravańnia — rulom i piedalami. Ciapier Mask vyrašyŭ admovicca i ad ich.
Jak piša Associated Press, u čaćvier Tesla vypuściła na vulicy Ościna dziasiatki Cybercab — bieśpiłotnych taksi, u jakich niama ni rula, ni piedalaŭ. Kali niešta pojdzie nie tak, pasažyr fizična nie zmoža pierachapić kiravańnie.
«Nijakaha rula, nijakich piedalaŭ», — tak u akaŭncie Tesla Robotaxi ŭ X anansavali zapusk novych aŭto. Sam Mask apublikavaŭ vyjavu hihanckaha Cybercab nad Ościnam, a paźniej napisaŭ: «Bura Cybercabs».
Pakul niezrazumieła, jak chutka Tesla źbirajecca razhortvać novy servis. Ale, jak adznačaje AP, Masku treba śpiašacca: pa kolkaści mašyn i pajezdak jaho kampanija istotna adstaje ad Waymo.
Adroźnivajecca i techničny padychod kankurentaŭ. Tesla robić staŭku na kamiery: mienavita ź ich dapamohaj aŭtamabil pavinien raspaznavać darohu, inšyja mašyny i piešachodaŭ. Waymo i jašče adzin kankurent, Zoox ad Amazon, akramia kamier vykarystoŭvajuć radary i lidary, jakija vyznačajuć adlehłaść da navakolnych abjektaŭ pry dapamozie łazieraŭ.
Tesla ciapier treba dakazać, što jaje sistema zdolnaja biaśpiečna aryjentavacca ŭ składanym haradskim ruchu i biez takoha dadatkovaha abstalavańnia.
Ale ci zachočuć ludzi sadzicca ŭ mašynu biez rula?
Navat kali technałohija budzie pracavać biezdakorna, zastajecca jašče adna prablema — davier pasažyraŭ.
Apytańnie Pew Research Center, praviedzienaje ŭ lutym, pakazała, što siem ź dziesiaci darosłych amierykancaŭ adčuvali b siabie niekamfortna ŭ bieśpiłotnym aŭtamabili. Tolki 7% zajavili, što adčuvali b siabie ŭ takoj mašynie vielmi abo nadzvyčaj kamfortna, jašče 16% — u peŭnaj stupieni kamfortna.
Adnak płany Maska značna šyrejšyja za niekalki dziasiatkaŭ Cybercab u Ościnie. U pierśpiektyvie jon choča zrabić bieśpiłotnymi sotni tysiač užo vypuščanych Tesla pry dapamozie abnaŭleńnia prahramnaha zabieśpiačeńnia.
Pavodle jaho zadumy, uładalnik zmoža adpraŭlać svoj aŭtamabil pracavać taksi ŭ toj čas, kali sam im nie karystajecca.
Na šlachu da hetaha jość jašče adna pieraškoda — rehulatary. U bolšaści krain Jeŭrasajuza Tesla dahetul nie atrymała dazvołu navat na vykarystańnie svajoj sistemy častkova aŭtanomnaha kiravańnia. A ŭ ZŠA, dzie jana ŭžo vykarystoŭvajecca, rehulatary pravodziać niekalki rasśledavańniaŭ, źviazanych ź jaje biaśpiekaj.
Ale inviestaraŭ ryzyki pakul nie pałochajuć. U dzień zapusku Cybercab akcyi Tesla vyraśli bolš čym na 5%.
Čytajcie taksama:
Tesla vyvodzić na rynak svoj revalucyjny elektryčny hruzavik Semi. Asabliva ździŭlaje kabina
Zavod Tesla całkam pieraabstalujuć pad vytvorčaść čałaviekapadobnych robataŭ