«Džon Uik pryjdzie pa ciabie». Amierykaniec raźbiŭ svaju Tesla, a praz hod znajšoŭ jaje ŭ Biełarusi — i moh dystancyjna joj kiravać
Amierykaniec Endru Tren atrymaŭ dystancyjny kantrol nad aŭtamabilem, jaki znachodzicca ŭ Hrodnie. Firma, što pradaje bityja aŭto z ZŠA ŭ Biełaruś, nie adklučyła mašynu ad Tesla-akaŭnta byłoha ŭłaśnika, piša Hrodna.life.
Endru zmoh pabačyć dakładnaje miesca znachodžańnia svajho byłoha aŭto — Tesla Model 3 znajšłasia na vulicy Hrandzickaj u Hrodnie.
«U minułym hodzie moj stary aŭtamabil raźbiŭsia ŭščent. Moj ulikovy zapis tak i nie adviazali ad jaho… Siońnia ja atrymaŭ list, što mašynu padpisali na Premium Connectivity. Ja pahladzieŭ — i jana ŭ… Biełarusi», — napisaŭ jon u Threads.
Pasłuha Premium Connectivity ad Tesla kaštuje $9,99 u miesiac i dazvalaje karystacca palepšanymi mapaj i navihataram, funkcyjami biaśpieki i nazirańnia, a taksama strymić muzyku i videa niepasredna ŭ mašynu.
Endru zaŭvažyŭ, što dziakujučy nie skasavanamu ŭlikovamu zapisu jon moh adkryvać i zakryvać dźviery ŭ mašynie, apuskać šyby, sihnalić, uklučać i vyklučać fary. I ŭsio heta, znachodziačysia za 9700 kiłamietraŭ ad svajho staroha aŭto.
«Mužyk, nie leź da hetych chłopcaŭ. Pamiataj, Džon Uik byŭ dziciom Biełarusi»
Karystalniki Threads adrazu pačali davać jamu parady, jak pažartavać z novaha ŭłaśnika aŭto.
Adnyja prapanoŭvali ŭklučać padahreŭ siadzieńnia na maksimum, inšyja — uklučyć «režym viečarynki». Byli prapanovy abmiežavać chutkaść aŭto abo ŭklučyć na poŭnuju hučnaść pieśni «Pahonia» i «My vyjdziem ščylnymi radami».
Ale bolšaść raiła prosta być prystojnym čałaviekam, vydalić aŭto sa svajho akaŭnta i nie čapać novaha ŭłaśnika.
Niekatoryja vykarystoŭvali miem pra papularnaha hieroja Kianu Ryŭza.
«Mužyk, nie leź da hetych chłopcaŭ. Pamiataj, Džon Uik byŭ dziciom Biełarusi».
«Kali ty sapraŭdy chočaš niešta zrabić z toj mašynaj, pamiataj, što Džon Uik nasamreč ź Biełarusi».
«Džon Uik idzie pa ciabie».
Amierykancu taksama rastłumačyli, što takija padarožžy bitych amierykanskich mašyn — zvyčajnaja sprava.
«Amierykanskaje paniaćcie «raźbity ŭščent» u inšych krainach aznačaje «trochi paškodžana, možna adramantavać»», — napisali ŭ kamientaryjach. Maŭlaŭ, kali ramantavać aŭto ŭ ZŠA ekanamična niavyhadna, a tańniej kupić novuju, to ŭ Biełarusi, uličvajučy značna nižejšy košt pracy, bitaje aŭto nie tak i składana viarnuć da žyćcia. A kali mašyna była zastrachavana, to tym bolš u Amierycy jaje nie buduć ramantavać — strachavaja kampanija prosta pradaść jaje z aŭkcyjonu.
«Pieradajcie novamu ŭłaśniku padziaku»
Nieŭzabavie Endru dapoŭniŭ svoj post:
«Ja ŭžo vydaliŭ mašynu sa svajho akaŭnta. Ja ŭschvalavaŭsia tolki tamu, što moj ulikovy zapis vykarystoŭvaŭsia dla padpiski, na jakuju ja nie zhadžaŭsia. Akramia admieny padpiski, ja ničym bolš dystancyjna nie kiravaŭ», — zapeŭniŭ amierykaniec.
Ahułam jon vielmi rady, što jaho staraja mašyna atrymała novaje žyćcio. U svoj čas jon nazvaŭ jaje Nova ŭ honar piersanaža z kampjutarnaj hulni StarCraft.
«Heta była lubimaja mašyna, jakuju ja tak doŭha chacieŭ nabyć, i jana była sa mnoj u radaści i ŭ hory. Dvojčy prajechaŭ na joj praz usiu Amieryku, ad akijana da hor, ad pustyń da śniahoŭ».
Endru paprasiŭ u karystalnikaŭ Threads, kali jany znojduć novaha ŭładalnika, padziakavać jamu za toje, što jon daŭ mašynie novaje žyćcio.
Endru Tren — 40‑hadovy amierykaniec vjetnamskaha pachodžańnia. Jon kiraŭnik u halinie praduktu i dyzajnu. Pracavaŭ u śfiery achovy zdaroŭja, štučnaha intelektu, virtualnaj realnaści ŭ roznych kampanijach — ad startapaŭ da hłabalnych karparacyj. Zaraz pracuje ŭ kampanii Meta.
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty49
Kamientary