U niekatorych miescach u Biełarusi zabaroniać rabić videanazirańnie

U Biełarusi chočuć bolš dakładna rehłamientavać vykarystańnie videanazirańnia i aŭdyjazapisu pry apracoŭcy piersanalnych źviestak. Adpaviedny zakonaprajekt užo ŭniesieny va ŭrad. Pra heta paviedamiŭ dyrektar Nacyjanalnaha centra abarony piersanalnych danych Andrej Hajeŭ, piša BiełTA.

Zdymak ilustracyjny. Fota: «Naša Niva»

Pavodle słoŭ čynoŭnika, ciapier zakanadaŭstva rehuluje hetyja pytańni tolki častkova. Vykarystańnie videazapisaŭ u śfiery hramadskaj biaśpieki ŭžo maje vyraznyja pravavyja ramki, ale ŭ inšych situacyjach uźnikajuć pytańni, chto, kali i na jakoj padstavie maje prava vieści zdymku.

Prajekt praduhledžvaje zabaronu na videanazirańnie ŭ miescach, dzie zakranajecca asabistaje žyćcio čałavieka. Da ich adnosiacca, naprykład, pamiaškańni dla pryjomu ježy, pieraadziavańnia i vykanańnia inšych štodzionnych asabistych spraŭ. U takich vypadkach videanazirańnie budzie ličycca praźmiernym.

Asobnyja normy prapanujecca ŭvieści i dla aŭdyjazapisaŭ. Naprykład, zapis razmovy budzie dazvoleny pry zvarotach u ekstrannyja słužby i inšyja arhanizacyi, kali takaja mahčymaść praduhledžanaja zakonam. Pry hetym ludziej pavinny zahadzia infarmavać pra viadzieńnie aŭdyjazapisu.

Jašče adna častka zakonaprajekta tyčycca rašeńniaŭ, jakija prymajucca z dapamohaj štučnaha intelektu i całkam aŭtamatyzavanaj apracoŭki piersanalnych źviestak. Dla hetaha spatrebicca adpaviednaja norma zakona abo inšaja pravavaja padstava.

Andrej Hajeŭ padkreśliŭ, što navat pry raźvićci štučnaha intelektu i technałohij vialikich danych čałaviek pavinien zastavacca ŭdzielnikam pracesu pryniaćcia važnych rašeńniaŭ. Kali pastanovu prymaje sistema, naprykład pry akazańni miedycynskaj dapamohi abo pry pryjomie na pracu, čałaviek pavinien mieć mahčymaść zapiarečyć i paŭpłyvać na vynik.

Kamientary da artykuła