73‑hadovaha afhanca asudzili pa dźviuch palityčnych kryminałkach
Kanstancinu Kachnoŭskamu inkryminiravali «raspalvańnie varožaści» i «sadziejničańnie ekstremizmu».
Kanstancin Kachnoŭski. Fota ź jahonaj staronki ŭ «Adnakłaśnikach»
Kanstancinu Kachnoŭskamu 73 hady. Jon žyvie ŭ Vaŭkavysku, choć u profilach paznačaŭ i Hrodna.
Mužčyna skončyŭ Vajskovy inžynierna-techničny ŭniviersitet u Leninhradzie (VITU). U 1980‑ia hady jon prajšoŭ praz vajnu ŭ Afhanistanie — słužyŭ u Kabule aficeram vajskovaj čaści 26190 (5131‑ia baza vyrabu žalezabietonnych vyrabaŭ u składzie 40‑j armii) i kiravaŭ cecham, jaki vyrablaŭ kanstrukcyi dla patreb savieckaha kantynhientu.
Ciapier jon na piensii.
Byłoha vajskoŭca sudzili ŭ Hrodzienskim abłasnym sudzie. Jamu pastavili ŭ vinu častku 1 artykuła 130 (raspalvańnie sacyjalnaj varožaści), a taksama častki 1 i 2 artykuła 361‑4 KK (sadziejničańnie ekstremicskaj dziejnaści). Heta typovyja artykuły, jakija vykarystoŭvajucca dla biespadstaŭnaha palityčnaha pieraśledu. Što kankretna inkryminavali byłomu afhancu — pakul nieviadoma.
Kachnoŭskamu prysudzili chatniuju chimiju.
Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ.
«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.