«Ministr u Biełarusi nie moža nie być saŭdzielnikam złačynstvaŭ režymu Łukašenki»: Kavieryn raskazaŭ, čamu staŭ takim radykalnym

Viadoŭca ranišniaha šou «Obyčnoje utro» Kanstancin Kavieryn u novym vypusku TOKu raskazaŭ, jak za čas pracy nad prajektam źmianilisia jaho pohlady i čamu niekatoryja jaho vykazvańni mohuć padavacca zanadta rezkimi.

Kanstancin Kavieryn. Skryn videa: TOK_talk / YouTube

«Z taho času, jak ja staŭ zajmacca «Obyčnym utrom», mnie zdajecca, ja staŭ značna bolš radykalnym u dačynieńni da Rasii. I nie tolki tamu, što jana vajuje z Ukrainaj, ale dla mianie na mnohija rečy ŭ biełaruskaj historyi raspluščylisia vočy», — raskazaŭ Kavieryn.

Kanstancin padkreśliŭ, što nie źjaŭlajecca historykam, adnak zajaviŭ, što niekatoryja dziejańni Rasii ŭ dačynieńni da biełarusaŭ jon ličyć hienacydam:

«Heta sto pracentaŭ. Heta było vyčyščeńnie nacyi. Čamu ja z taboj ciapier razmaŭlaju pa-rusku? Bo i ja pradukt hetaha vyčyščeńnia, hetaha hienacydu ŭ peŭnaj stupieni».

Pry hetym sam Kavieryn ličyć, što za apošnija hady staŭ bolš biełarusam.

«Mnie zdajecca, što ja staŭ bolš biełarusam, čym byŭ da hetaha. Voś što ja dumaju. Ja spadziajusia».

Nasta Roŭda prapanavała abmierkavać adzin z prykładaŭ radykalnych vykazvańniaŭ viadoŭcy. Niekalki hadoŭ tamu paśla zaŭčasnaj śmierci ministra transpartu Alaksieja Aŭramienki ŭ «Obyčnom utrie» prahučaŭ kamientar Kavieryna: «Adnym złačyncam mienš».

«Mnie padajecca, što na tym baku taksama šmat ludziej, jakija sprabujuć štości rabić. Što tam nie mohuć być usie złačyncy, što nie mohuć być usie kiepskija ludzi. Jak ty pra heta dumaješ?», — pacikaviłasia Roŭda.

«Voś dumaju tak. Tak i jość. Što tam jość ludzi, jakija sprabujuć… Ale jany nie znachodziacca na kiraŭničych miescach u hetaj «sacyjał-demakratyčnaj partyi». Siońniašni ministr u Biełarusi nie moža nie być saŭdzielnikam złačynstvaŭ režymu Łukašenki», — zajaviŭ jon.

«I niavažna, heta ekanomika, transpart?» — udakładniła Roŭda.

«Uvohule nie. Ty bienieficyjar aŭtamatyčna. Usio», — adkazaŭ Kavieryn.

Pavodle Kanstancina, takija jaho vykazvańni — jašče adna z pryčyn, čamu jon nie vierniecca ŭ Biełaruś. «Tamu što jany mnie hetaha nie darujuć».

Pry hetym Kavieryn pryznaŭ, što razumieje, jak jahonyja zajavy mohuć vyhladać zboku:

«Niejkamu čałavieku z tonkaj dušeŭnaj arhanizacyjaj, davoli adukavanamu, ciažka na heta hladzieć».

Kavieryn adznačyŭ, što jość ludzi, jakija, na jaho dumku, danosiać prykładna tyja ž dumki ŭ bolš prymalnaj formie. Siarod ich jon nazvaŭ Alaksandra Radnianskaha, Arcioma Šrajbmana, Alaksandra Kłaskoŭskaha i Alaksandra Frydmana.

Svaju manieru vykazvacca Kavieryn patłumačyŭ ułaścivaj jamu pramatoj.

«U svaju abaronu… Jak heta skazać? Ja prosty jak praletarskaja piaciarnia. My ž klej niuchali z pacanami. U abaronu siabie skažu: «Tak, blin, napeŭna, časam mnie nie chapaje mienavita hetaj adukavanaści, niejkaj intelihientnaści, moža być, navat pryrodžanaj. Za što prašu prabačeńnia. Ale chacia b ja nie chłušu».

Kamientary da artykuła