Vytvorčaść šampanskaha ŭ Francyi praź śpioku skarocicca amal udvaja

Vytvorčaść francuzskaha šampanskaha ŭ 2026 hodzie moža skaracicca amal udvaja ŭ paraŭnańni ź minułym hodam. Pryčynaj stali ekstremalnyja ŭmovy nadvorja, jakija istotna paŭpłyvali na ŭradžaj vinahradu, paviedamlaje ahienctva Bloomberg.

Zdymak ilustracyjny. Fota: vecteezy.com

Pavodle infarmacyi francuzskaha Ministerstva sielskaj haspadarki, sioleta ŭ krainie płanujuć vyrabić kala 1,34 miljona hiektalitraŭ šampanskaha — na 48% mienš, čym u 2025 hodzie.

Skarocicca i ahulnaja vytvorčaść vina. Čakajecca, što ŭ 2026 hodzie jana składzie kala 34 miljonaŭ hiektalitraŭ, što na 6% mienš za letašni pakazčyk i na 17% nižej za siaredni ŭzrovień apošnich piaci hadoŭ. Heta moža stać najhoršym vynikam francuzskaj vinarobnaj haliny z 1957 hoda.

Hałoŭnaj pryčynaj stała anamalnaja śpiakota, jakaja hetym letam achapiła Jeŭropu. Z-za vysokich tempieratur zbor vinahradu ŭ mnohich rehijonach pačali značna raniej. Sioletni ŭradžaj u Francyi moža akazacca adnym z samych słabych za apošnija try dziesiacihodździ.

Asabliva mocna paciarpieŭ sort Pino Nuar u Burhundyi — straty ŭradžaju pieravysili 50%. U Šampani zbor taksama pačali niezvyčajna rana, kab jahady nie paśpieli pieraśpieć i nazapasić zanadta šmat cukru, što mahło b pryvieści da pavyšeńnia ŭtrymańnia ałkaholu ŭ vinie. Čakajecca, što vaha hronak tut budzie najmienšaj za apošnija 20 hadoŭ.

U rehijonie Bardo situacyja lepšaja: vytvorčaść moža pavialičycca na 10% u paraŭnańni ź vielmi nizkim pakazčykam 2025 hoda. Adnak navat paśla hetaha jana budzie prykładna na 11% nižejšaj za siaredni ŭzrovień 2021—2025 hadoŭ.

Pry hetym nadvorje — nie adzinaja prablema francuzskich vinarobaŭ. Halina taksama sutykajecca sa źnižeńniem popytu na ałkahol, źmienami ŭ spažyvieckich zvyčkach i składanaj ekanamičnaj situacyjaj.

Na minułym tydni francuzski ŭrad vydzieliŭ bolš za 1 miljard jeŭra na dapamohu fiermieram, jakija paciarpieli ad letniaj śpioki i lasnych pažaraŭ.

Kamientary da artykuła