Piekła ŭ Jeŭropie: samy haračy červieński dzień u historyi ŭ Hiermanii i Vialikabrytanii, admienieny kancerty, kolkaść zahinułych raście

Adrazu niekalki dziaržaŭ kantynienta zafiksavali samyja haračyja červieńskija dni ŭ historyi: takija rekordy byli pastaŭleny ŭ Hiermanii, Bielhii i Niderłandach. U Vialikabrytanii novyja rekordy tempieratury červienia staviacca ŭžo treci dzień zapar, piša Bi-bi-si.

U Hiermanii samaja vysokaja tempieratura ŭ historyi była zafiksavana ŭ horadzie Saarbrukien na paŭdniovym zachadzie krainy (jon znachodzicca kala miažy z Francyjaj). Tam u piatnicu słupok termomietra padniaŭsia da 41,3 hradusa Celsija.

U susiedniaj Francyi pikavyja tempieratury, jak i ŭ Vialikabrytanii, adznačalisia try dni zapar. Choć śpiakota tam, vierahodna, užo dasiahnuła maksimalnaj adznaki, ministr achovy zdaroŭja Stefani Rys zajaviła, što mnohija ludzi pamirajuć z-za śpioki ŭ svaich damach.

Aficyjnaja pradstaŭnica Suśvietnaj mietearałahičnaj arhanizacyi Kłer Nulis papiaredziła, što takoje nadvorje «vielmi mocna ŭpłyvaje» na zdaroŭje ludziej, ekasistemy, sielskuju haspadarku i situacyju na pracoŭnych miescach. «Na žal, nam daviadziecca da hetaha pryvyknuć», — adznačyła jana.

Śpioka ruchajecca na ŭschod Jeŭropy

U piatnicu chvala śpioki ŭ Jeŭropie pačała pieramiaščacca na poŭnač i ŭschod kantynienta.

Bielhijskija mietearołahi nieaficyjna paćvierdzili, što ŭ horadzie Klajne-Brohiel kala miažy ź Niderłandami była zafiksavana tempieratura 40 hradusaŭ Celsija. U paŭdniova-ŭschodniaj pravincyi Limburh u Niderłandach jana skłała 39,4 hradusa. Tym časam u Vialikabrytanii ŭ piatnicu najciaplej było ŭ hrafstvie Safałk: 37,3 hradusa. Heta čarhovy pabity červieński tempieraturny rekord, jaki da hetaha hoda trymaŭsia 50 hadoŭ.

Z-za śpiakoty ŭ piatnicu było admieniena šmat ciahnikoŭ, zakryta kala 600 škoł, pra krytyčnuju situacyju i vialikuju kolkaść pacyjentaŭ paviedamili šeść rehijanalnych adździaleńniaŭ Nacyjanalnaj sistemy achovy zdaroŭja. Kolkaść vyklikaŭ chutkaj dapamohi ŭ Łondanie na fonie śpioki vyrasła na 50%.

Pavodle danych ahienctva AFP, u piatnicu na jeŭrapiejskim kantyniencie prynamsi 150 miljonaŭ čałaviek pieražyvali tempieraturu vyšej za 35 hradusaŭ Celsija.

Mietearołahi ŭ Čechii ličać, što ŭ subotu moža być pabity rekord 40,4 hradusa, ustanoŭleny ŭ 2012 hodzie. Ich kalehi ŭ Aŭstryi prahnazujuć novy tempieraturny rekord u niadzielu.

Rekordnaja śpiakota taksama nazirajecca na Bałkanach: u Sierbii ŭ vychadnyja čakajecca da 39 hradusaŭ.

U Šviejcaryi atamnaja elektrastancyja Biecnau była adklučana ad nacyjanalnaj enierhasistemy, bo tempieratura vady ŭ race Are, jakaja vykarystoŭvajecca dla astudžeńnia, dasiahnuła 25 hradusaŭ. Ličycca, što heta zanadta vysoki pakazčyk dla efiektyŭnaha astudžeńnia reaktaraŭ.

Jeŭropie stanovicca składaniej za ŭsio

Pavodle śpiecyjalistaŭ mižnarodnaha navukovaha kansorcyuma World Weather Attribution, u Francyi, Hiermanii, Italii, Ispanii i na poŭdni Anhlii tempieratury pieravyšajuć zvyčajnyja siezonnyja pakazčyki na 5—12 hradusaŭ Celsija. Pryčynaj stała vobłaść pavyšanaha atmaśfiernaha cisku.

Kansorcyum ustanaviŭ, što tempieratury červienia rastuć chutčej, čym u inšych miesiacach hoda, i ciapierašniaja chvala śpioki stała «samaj ekstremalnaj z usich zafiksavanych raniej».

Klimatyčnyja źmieny pryvodziać da pavyšeńnia tempieratury va ŭsim śviecie, ale asabliva heta datyčycca Jeŭropy. Pavodle Słužby klimatyčnaha manitorynhu ES Copernicus, kantynient nahravajecca ŭdvaja chutčej, čym u siarednim pa śviecie.

Z-za mocnaj śpiakoty ranicaj u piatnicu vyjšaŭ z ładu ciahnik Eurostar, jaki ruchaŭsia z Kiolna ŭ Paryž: jon spyniŭsia na ŭschod ad Brusiela. U ciahniku było kala 400 pasažyraŭ, troje byli špitalizavanyja ŭ jakaści miery zaściarohi, paviedamlaje ahienctva Belga.

U Paryžy admienieny dva maštabnyja publičnyja mierapryjemstvy, jakija pavinny byli adbycca ŭ vychodnyja. Miascovyja ŭłady zajavili, što balnicy pierapoŭnienyja i resursy treba nakiravać na dapamohu najbolš uraźlivym.

Siarod admienienych padziej — paryžski prajd (parad ŁHBT-supolnaści), jaki pieranieśli na vierasień, a taksama muzyčny fiestyval Solidays. Jašče adno mierapryjemstva — spabornictvy pa lohkaj atletycy na stadyjonie «Stad Šarlety» — adbudziecca ŭ niadzielu, ale paźniej, u bolš prachałodny čas.

U Niderłandach hledačy ŭžo pryjechali na fiestyval Defqon.1, ale jaho admianili paśla abviaščeńnia čyrvonaha ŭzroŭniu niebiaśpieki. Paśla hetaha pačalisia biesparadki, jakija daviałosia spyniać palicyi.

U Hiermanii taksama admieniena šmat mierapryjemstvaŭ, u tym liku paŭmarafon u Hamburhu.

Śmierci ŭ Francyi i Ispanii

Ministr achovy zdaroŭja Francyi papiaredziła, što ekstremalnaja śpiakota pryviadzie da śmierciaŭ ludziej. Ułady padrychtavali ekstranyja płany dla ŭsich balnic Paryža i vakolic.

Tym časam u Marsieli pamiorła 18‑miesiačnaje dzicia, jakoje znajšli ŭ mašynie. Heta nie adziny taki vypadak: raniej u Francyi zahinuli dzieci ŭ padobnych abstavinach.

Z pačatku śpiakoty ŭ Francyi taksama patanuli 55 čałaviek, dźvie traciny ź ich — u miescach biez ratavalnikaŭ.

U Ispanii ad vysokaj tempieratury ź niadzieli pa čaćvier zahinuli 327 čałaviek, pryčym bolšaja častka śmierciaŭ prypała na apošnija dni. Adnak śpiakota tam užo pačała słabieć.

Tym časam navukoŭcy ŭ Šviejcaryi papiaredžvajuć, što da paniadziełka moža rastać uvieś zimovy zapas lodu, paśla čaho pačniecca rastavańnie samich lednikoŭ. Zvyčajna heta adbyvajecca ŭ žniŭni, ale ciapier praces idzie značna chutčej — jak u 2022 hodzie, kali było stračana da 6% abjomu lednikoŭ.

U Biełarusi ŭčora maksimalnaja tempieratura była amal +31°S. u vakolicach Bresta i ŭ Kobrynie.

Pavialičyć

Ale samaja śpioka prypadzie na vychodnyja i paniadziełak. Siońnia ŭ Bresckaj vobłaści čakajecca da +35°S, u Minsku da +29°S.

U Bresckaj vobłaści ŭ paniadziełak moža być da +39°S, u Minsku da +35°S. U krainie abviaścili apošni čyrvony ŭzrovień niebiaśpieki.

• 2
• 0
• 0
• 0
• 3
• 4
• 0
• 0