Fatohrafku ź Minska asudzili za «sadziejničańnie ekstremisckaj dziejnaści»
38‑hadovaj Złacie Skobnikavaj dali chatniuju chimiju.
Złata Skobnikava. Fota ź jaje staronki Ukantakcie
Złata Skobnikava naradziłasia ŭ 1988 hodzie ŭ Minsku. U 2008 hodzie jana skončyła Architekturna-budaŭničy kaledž pa śpiecyjalnaści «technik-architektar» i pracavała ŭ BiełNDIPhoradabudaŭnictva.
Viadoma, što ŭ Złaty jość muž i syn. Paśla vychadu z dekretu žančyna ŭsurjoz zaniałasia fatahrafijaj: prajšła šerah prafiesijnych kursaŭ, zdymała partrety, siemji i viasielli ŭ styli fine art.
Złatu zatrymali sioleta i, miarkujučy pa pierapynku ŭ anłajnie, da suda pratrymali ŭ SIZA kala čatyroch miesiacaŭ.
Skobnikavu sudzili ŭ Minskim haradskim sudzie pa č. 1 i č. 2 art. 361‑4 KK («sadziejničańnie ekstremisckaj dziejnaści»). Dakładnyja akaličnaści kryminalnaj spravy nieviadomyja.
Złacie Skobnikavaj prysudzili chatniuju chimiju.
Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ.
«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.
Čytajcie taksama:
Redaktarku dziaržaŭnaha vydaviectva asudzili za «sadziejničańnie ekstremisckaj dziejnaści»