Jak u biełaruskich škołach abšukvajuć dziaciej VIDEA
Z pačatku novaha navučalnaha hoda supracoŭniki Departamienta achovy atrymali prava pravodzić u škołach vybaračny nadhlad asabistych rečaŭ i zaplečnikaŭ navučencaŭ. Jak hetaja pracedura pracuje na praktycy, pakazali na prykładzie himnazii № 1 Viciebska.
Skryn videa: vitbichi.by / Instagram
U videa vydańnia «Vićbičy» demanstrujuć, što pravierka navučencaŭ nosić vybaračny charaktar. Tak, z troch chłopčykaŭ, jakija prachodziać praz turnikiet na ŭvachodzie, uvahu achoŭnika pryciahvaje tolki adzin.
Na nastupnych kadrach bačna, što vučań staić nasuprać čatyroch darosłych: imavierna, nastaŭnicy i troch asob u formie. Adzin z mužčyn prosić adkryć zaplečnik. Nastaŭnica i dva supracoŭniki Departamienta achovy nachilajucca i zazirajuć unutr. Pry hetym adzin z achoŭnikaŭ rukoj prytrymlivaje kraj zaplečnika, a inšaj padśviečvaje źmieściva kišennym lichtarykam. Čuvać, jak jon prosić vučnia prypadniać i adsunuć padručniki.
Skryn videa: vitbichi.by / Instagram
Mety i padrabiaznaści novaŭviadzieńnia rastłumačyŭ načalnik Viciebskaha abłasnoha ŭpraŭleńnia Departamienta achovy, pałkoŭnik milicyi Siarhiej Muraškin. Pavodle jaho słoŭ, nadhlad uviedzieny ŭ adpaviednaści z pastanovaj Savieta ministraŭ dla pavyšeńnia biaśpieki va ŭstanovach adukacyi, dzie niasuć słužbu supracoŭniki viedamstva.
Muraškin adznačyŭ, što nadhlad pravodzicca abaviazkova ŭ prysutnaści piedahahičnych rabotnikaŭ i heta «nie pakarańnie»:
«Heta nie dla taho, kab kahości tam pakryŭdzić ci nie prapuścić u navučalnuju ŭstanovu. Nadhladavyja mierapryjemstvy — heta biaśpieka niepasredna dzietak, niepasredna piedahohaŭ. I takija miery my budziem pravodzić. Vybaračna, zrazumieła, heta nie ŭ dačynieńni da kožnaha navučenca».
Jak zapeŭniŭ Muraškin, uvieś piersanał prajšoŭ praktyčnuju i tearetyčnuju padrychtoŭku, tamu kožny achoŭnik na pastu viedaje dakładny ałharytm dziejańniaŭ, kab paźbiahać kanfliktnych situacyj.
Raskazaŭ milicejski načalnik i pra toje, što budzie ŭ vypadku vyjaŭleńnia zabaronienych pradmietaŭ:
«Asoby buduć vyvučacca, budziem paviedamlać baćkam hetuju infarmacyju, nu i budziem raźbiracca ŭ cełym dalej, kab takich faktaŭ nie było».
Čytajcie taksama:
«Heta navat u ruki ahidna brać». Baćki «chvalacca», jakija padručniki vydali ŭ škole ich dzieciam
Łukašenka zahadaŭ «dobra strasianuć» školnikaŭ i «čaho b heta ni kaštavała, całkam strasianuć» škoły