«Heta navat u ruki ahidna brać». Baćki «chvalacca», jakija padručniki vydali ŭ škole ich dzieciam
Pačaŭsia navučalny hod. Školnikam vydali dapamožniki. Nie ŭsie atrymali knihi ŭ dobrym stanie. U niekatorych jany pašarpanyja, papisanyja i navat ź dzirkami ŭnutry. U Threads baćki dzielacca fota padručnikaŭ, jakija patrabujuć «reanimacyi» abo ŭžo joj nie padlahajuć, zaŭvažyła «Lusterka».
Dačka Kaciaryny z Hrodna ŭ hetym hodzie pajšła ŭ 6‑ty kłas. Svaju reakcyju na dapamožniki, jakija vydali školnicy dla zaniatkaŭ, mama źmiaściła ŭ čatyry słovy.
«Moj šok u šoku!» — napisała jana ŭ Threads i raźmiaściła videaahlad na kamplekt knih.
Pavodle słoŭ žančyny, z 15 padručnikaŭ try novyja, piać — «b/u, ale ŭ bolš-mienš dobrym stanie». Astatnija siem aŭtarku rolika «šakavali».
«Jak možna vydavać takija padručniki? — kaža jana ŭ videa, pakazvajučy pašarpanyja knihi pa anhlijskaj movie, matematycy. — Ceły hod ich nasić u škołu. Jak heta možna nasić? Zaklejena skotčam, skotč uvieś adklejvajecca ŭžo. Takoje adčuvańnie, što ich prosta dastali sa śmietnika. Hetyja padručniki pavinny byli ŭžo pajści ŭ makułaturu. Jak takoje možna vydavać dzieciam? Ci ja čahości ŭ hetym žyćci nie razumieju? Vy mianie papraŭcie. Nu što heta takoje? Asabliva matematyka. Heta navat u ruki ahidna brać».
U kamientarach karystalnica Taćciana skieptyčna pastaviłasia da pretenzii mamy. Pavodle jaje słoŭ, dapamožniki raźličanyja na niekalki hadoŭ, i kali vučni ich u pieršy ž hod «zabili», to pytańni da dziaciej.
«Tak, zvonku pašarpalisia i padklejenyja, ale ŭnutry tekst čytajecca, usio bačna. U čym prablema? — prakamientavała jana post Kaciaryny i jak varyjant prapanavała, kab žančyna sama kupiła dziciaci patrebnyja knihi. — A tak vam vydali ŭvieś kamplekt za 20 rubloŭ (košt kamplekta dla 1− 11‑ha kłasa 22,5 rubla, dla ilhotnikaŭ — 11,25 rubla. — Zaŭv. red.). Tak, nie idealna novy, ale jašče raz: kupicie sabie novyja i vučyciesia spakojna. Taksama ŭsie padručniki jość u elektronie — spampoŭvajcie, drukujcie».
U toj ža čas pryjšli ŭ abmierkavańnie i baćki, jakija padzialili «bol» Kaciaryny i pakazali, jakija knihi atrymali ich dzieci.
Siarod takich — karystalnica Alina.
Adhuknułasia na prablemu i ŭdzielnica hutarki Hanna.
«U tym hodzie dačce pa matematycy i anhlijskaj jašče horšyja vydali, — napisała jana. — Staronak nie chapała, abo parezanyja. Napeŭna, samyja «lubimyja pradmiety» ŭ šaścikłaśnikaŭ. Pamianiali ŭ biblijatecy na trochi lepšyja, ale taksama nie ajs».
Zdymki svajoj minułahodniaj matematyki žančyna taksama prykłała.
«Śviežymi» prykładami knih padzialiłasia i karystalnica Natalla.
«Taksama 6‑ty kłas, taja ž situacyja, — adznačyła ŭdzielnica hutarki. — Ja sfotkała i adpraviła kłasnaj, a to ž potym nie prymuć. Abiacali praź miesiac zamianić».
Niekatoryja baćki fota nie prykładvali, ale słovami apisvali ŭ kamientarach stan atrymanych knih. Voś častka ź ich:
«A vam nie skazali, što «heta ja dziaŭčatkam jašče samyja najlepšyja dała», nam tak adkazaŭ nastaŭnik. U nas prosta dakładna jak u vas»;
«Škoła ŭ Minsku, taksama 6‑ty kłas. I taksama takija razadranyja padručniki. Dačka atrymała siońnia i siadzieła doma padklejvała. Zatoje zdać ich treba budzie akuratnymi».
«Pa padručnikach bačna, što hranit navuki hryźli ŭ pramym sensie»
Temu sapsavanych dapamožnikaŭ padymała ŭ svaim Threads nie tolki Kaciaryna. U knihi pa matematycy, jakuju vydali dziciaci Śviatłany, adna staronka papisanaja, u druhoj — dzirka.
U svaim akaŭncie žančyna paviedamiła, što, «uzbroiŭšysia» skotčam, nažnicami i humkaj, pasprabavała «reanimavać» padručniki.
«Ale heta ŭžo poŭny bieźmiažniak… Pavažanyja baćki, davajcie z pavahaj stavicca jak da padručnikaŭ, tak i da nas, baćkoŭ, jakija paśla vas i vašych dziaciej atrymlivajuć viedy pry dapamozie hetych dapamožnikaŭ», — źviarnułasia jana da mam i tataŭ školnikaŭ.
Adnu sa školnych knih pakazała ŭ Threads i mama šaścikłaśnicy Volha.
«Atrymali padručniki, i praktyčna va ŭsich taki stan. Dačka skazała, što heta jany jašče ź biblijatekaram vybirali lepšyja, — prakamientavała fota žančyna. — Baćki, vy surjozna nie bačycie ci vam prosta pofih, jak dzicia stavicca da rečaŭ?! Padručnik nie stary».
Syn karystalnika Threads Alaksieja Dzień viedaŭ sustreŭ sa złamanaj nahoj, tamu jaho dapamožniki chadziŭ atrymlivać baćka. Ubačyŭšy stan knih, mužčyna adžartavaŭsia.
«Pa padručnikach bačna, što hranit navuki hryźli ŭ pramym sensie», — napisaŭ jon na svajoj staroncy i prykłaŭ fotapaćviardžeńnie.
Na zdymku zaŭvažna, što pieraploty niekatorych knih pašarpanyja, a dzie-niedzie i zusim adsutničajuć.
«Niekatoryja dzieci tak i psujuć ich z hodu ŭ hod»
U abmierkavańni situacyi z padručnikami paŭdzielničała i supracoŭnica školnaj biblijateki Taćciana. Na svaim prykładzie jana pasprabavała rastłumačyć, čamu ŭźnikajuć takija prablemy z dapamožnikami.
«Fond padručnikaŭ 19 000, pravieryć kožny pry zdačy nierealna, ale my praviarajem novyja. Kožny. Viartajem papisanyja, prymušajem adkuplać, ale heta nie ŭsim dapamahaje, niekatoryja dzieci tak i psujuć ich z hoda ŭ hod, — padzialiłasia nazirańniami jana. — Termin fandavańnia padručnikaŭ ad piaci hadoŭ, ale, na žal, ich nie zaŭsiody vydajuć svoječasova, tak i atrymałasia z padručnikami 6‑ha kłasa ŭ hetym hodzie».
Načalnica mietadyčnaha centra DUA «Akademija adukacyi» Ludmiła Ramanoŭskaja adznačała, što ŭ siarednim dapamožniki pieravydajucca raz u piać-šeść hadoŭ.
«Termin słužby zaležyć ad taho, jak časta padručnik abo vučebny dapamožnik vykarystoŭvajucca ŭ adukacyjnym pracesie, — raskazvała ekśpiertka. — Jość pradmiety, jakija ŭ raskładzie dziciaci źjaŭlajucca adzin raz na tydzień, jość — dva-try razy. U siarednim termin słužby — piać-šeść hadoŭ. Jość padručniki i dapamožniki, jakija pieravydajucca kožnyja siem hadoŭ. Nie čaściej čym raz na try hady vypuskajecca bukvar».
U inšym paście, dzie taksama aktyŭna abmiarkoŭvali stan knih, karystalnica Taćciana padzialiłasia paradaj dla siemjaŭ, jakija atrymali pašarpanyja knihi.
«Schadzicie ź dziciom u biblijateku, paprasicie zamianić. U ich zaŭsiody pavinna zastavacca ŭ najaŭnaści niekalki. U nas u škole rehularna abnaŭlajuć padručniki. Napeŭna, heta ad zavuča zaležyć, ci chto hetym zajmajecca, — padzialiłasia mierkavańniem jana. — U nas voś usie ŭ dobrym stanie. Niekatoryja [knihi] navat novyja dali. Tolki anhlijskaja mova trochi pašarpanaja, ale nidzie ničoha nie adarvana».
Jak paćviardžeńnie svaich słoŭ jana prykłała fota, na jakim stos akuratnych dapamožnikaŭ.
Pasadzili advakata Dźmitryja Łajeŭskaha, jaki abaraniaŭ Babaryku i Znaka10
Pasadzili advakata Dźmitryja Łajeŭskaha, jaki abaraniaŭ Babaryku i Znaka
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam5151
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam51
«U syna na telefonie byli naleplenyja ściah i hierb Rasii. Z hetaha ŭsio pačałosia». Baćka školnika z Baranavič raskazaŭ, jak jaho syna ckavali adnakłaśniki4646
Kamientary