U Biełarusi z 1 vieraśnia ŭ škołach pačnuć nadhladać vučniaŭ, baćkoŭ i nastaŭnikaŭ
Jak supracoŭniki milicyi, tak i storažy ciapier mohuć pravodzić nadhlad jak niepaŭnaletnich, tak i absalutna ŭsich, chto zachodzić u škoły.
Z 1 vieraśnia ŭ biełaruskich škołach źmienicca paradak propusku ŭ budynki.
Supracoŭniki i rabotniki Departamienta achovy atrymajuć prava pravodzić vybaračny nadhlad ručnoj pakłažy ŭsich, kaho paličać nieabchodnym, u tym liku niepaŭnaletnich. Pry hetym prysutnaść baćkoŭ pry praviercy dziciaci ciapier nie patrabujecca.
Pra novyja praviły ŭ efiry «Radyjo Minsk» raskazaŭ pieršy namieśnik načalnika Maskoŭskaha adździeła achovy stalicy, padpałkoŭnik milicyi Alaksandr Siach.
Jon paviedamiŭ, što nadhladać mohuć nie tolki školnikaŭ, ale i ŭsich, chto zachodzić va ŭstanovu adukacyi: baćkoŭ, inšych naviednikaŭ, supracoŭnikaŭ škoły.
«Ad praviadzieńnia nadhladnych mierapryjemstvaŭ i niedapuščeńnia pranosu va ŭstanovy adukacyi zabaronienych pradmietaŭ nie vyzvalajecca nivodnaja katehoryja hramadzian», — zajaviŭ Siach.
Vybaračny nadhlad, pavodle jaho słoŭ, nie budzie biespadstaŭnym. Padstavaj dla pravierki školnika mohuć stać jaho pavodziny abo infarmacyja, atrymanaja ad piedahohaŭ.
«My možam pahavaryć pra takoje paniaćcie, jak prafajlinh, kali my vyjaŭlajem niepaŭnaletnich pavodle ich pavodnickich asablivaściaŭ z metaj vyznačyć, ci mohuć u ich być niejkija zabaronienyja pradmiety abo namiery ździejśnić supraćpraŭnyja dziejańni», — skazaŭ jon.
Adnak u bolšaj stupieni, pavodle jaho słoŭ, achova budzie abapiracca na infarmacyju, atrymanuju ad nastaŭnikaŭ i kłasnych kiraŭnikoŭ, jakija viedajuć asablivaści svaich vučniaŭ.
Pry nadhladzie niepaŭnaletniaha abaviazkova pavinien prysutničać pradstaŭnik piedahahičnaha kalektyvu. Baćki pry hetym mohuć nie prysutničać.
Novyja praviły źviazanyja z pastanovaj Savieta ministraŭ №307 «Ab ažyćciaŭleńni achoŭnaj dziejnaści», pryniataj 19 červienia 2026 hoda. Pavodle słoŭ pradstaŭnika achovy, hety dakumient admianiŭ raniejšyja narmatyŭnyja akty i ŭvioŭ novyja paŭnamoctvy dla supracoŭnikaŭ i rabotnikaŭ achovy.
Na pastach achovy ŭ škołach taksama pavinny być raźmieščanyja pieraliki pradmietaŭ, zabaronienych da pranosu va ŭstanovu adukacyi. Siarod ich — ahniastrelnaja zbroja, pradmiety, padobnyja da jaje, bojeprypasy, vybuchovyja rečyvy, chałodnaja zbroja i inšyja pradmiety, jakija mohuć być vykarystanyja dla naniasieńnia cialesnych paškodžańniaŭ.
Kali ŭ niepaŭnaletniaha padčas pravierki znojduć zabaronieny pradmiet, jaho ŭ prysutnaści piedahoha pieradaduć pradstaŭniku ŭstanovy adukacyi. Dalejšaje rašeńnie, u tym liku pytańnie ab infarmavańni baćkoŭ, budzie prymać administracyja škoły.
Pradstaŭnik Departamienta achovy zapeŭniŭ, što novaŭviadzieńni nie pavinny ŭsprymacca jak prajava niedavieru da dziaciej abo naviednikaŭ škoł.
«Ja ŭpeŭnieny, što my ŭ lubym vypadku pryzvyčaimsia da taho, što adbyvajecca, i budziem usprymać heta jak normu», — skazaŭ milicyjant.
«Kajłas, ja idu». Što za biełaruska źnikła ŭ žudasnym sieli ŭ Niepale6
Kamientary