U honar Tejłar Śvift nazvali novy vid aŭstralijskich kłapoŭ

Navukoŭcy z Kalifarnijskaha ŭniviersiteta ŭ Ryviersajdzie nazvali adkryty imi rod aŭstralijskich kłapoŭ u honar amierykanskaj śpiavački Tejłar Śvift. Artykuł, pryśviečany hetym kuzurkam, apublikavaŭ navukovy časopis Insect Systematics and Evolution, piša vydańnie Variety.

Tejłar Śvift. Fota: Matt Winkelmeyer/Getty Images for The Recording Academy

Usiaho navukoŭcy vyjavili 12 novych vidaŭ raślinnajednych nasiakomych. Adzin z novych rodaŭ atrymaŭ nazvu Swiftiephylus — u honar Tejłar Śvift i jaje prychilnikaŭ. U hety rod uklučyli čatyry vidy, nazvy jakich taksama źviazanyja sa śpiavačkaj i jaje albomami: Swiftiephylus taylorae nazvany niepasredna ŭ honar Śvift, Swiftiephylus amator — u honar alboma Lover, Swiftiephylus intrepidus — u honar alboma Fearless, a Swiftiephylus poetorum — u honar alboma The Tortured Poets Department.

Adna z aŭtarak daśledavańnia Sara Šroder patłumačyła, što źjaŭlajecca prychilnicaj Tejłar Śvift ź dziacinstva, tamu takoje najmieńnie stała dla jaje naturalnym i ščyrym sposabam ušanavać śpiavačku. Akramia taho, jana chacieła pryciahnuć uvahu da vielizarnaj raznastajnaści nasiakomych, mnohija ź jakich navukoŭcam jašče tolki treba adkryć.

Kłapy stali nie pieršymi kaziurkami, jakim dali nazvy ŭ honar Tejłar Śvift. Raniej tak atrymali nazvy adzin ź vidaŭ mnahanožak — Nannaria swiftae, viadomy pad anhlijskaj nazvaj Swift twisted-claw millipede, i pavuk Castianeira swiftay, vyjaŭleny ŭ Kosta-Rycy.

Kamientary da artykuła