«Tabie mała zastałosia jeździć». Kiroŭca słonimskaj maršrutki hruba abyšoŭsia z padletkam ź invalidnaściu

Niadaŭna atrymała rozhałas niepryjemnaja situacyja pamiž kiroŭcam adnaho sa słonimskich pryvatnych maršrutnych aŭtobusaŭ i 16‑hadovym pasažyram ź invalidnaściu, piša vydańnie «Słonimski vieśnik».

Zdymak ilustracyjny

Maci chłopčyka napisała ŭ sacyjalnaj sietcy, što kiroŭca maršrutki abražaŭ jaje syna i admaŭlaŭsia biaspłatna vieźci jaho ź Minska. U kancy razmovy jon skazaŭ: «Tabie mała zastałosia jeździć». Hetyja słovy mocna paranili chłopčyka.

Maci taksama ŭdakładniła, što kanflikt uźnik užo druhi raz. Padčas pieršaha vypadku kiroŭca chacieŭ vysadzić chłopčyka z aŭtobusa.

Pry hetym jość važny niuans: uładalnik pryvatnaj transpartnaj kampanii, jakaja ažyćciaŭlaje maršrutnyja pieravozki, padaryŭ usim dzieciam ź invalidnaściu prava na biaspłatny prajezd u aŭtobusach firmy. Z hetaj mahčymaści ŭžo skarystalisia sotni dziaciej.

Da kiraŭnika transpartnaj kampanii ŭ maci i jaje syna pretenzij niama. Pytańni ŭźnikli mienavita da kiroŭcy, jaki, na ich dumku, chacieŭ pazbavić chłopčyka prava na biaspłatny prajezd i pry hetym razmaŭlaŭ ź im hruba i niepavažliva.

Maci nie stała pakidać takoje staŭleńnie da syna biez uvahi. Na jaje dumku, u pracy kiroŭcy pavinny być prafiesijnaja etyka, elemientarnaja pavaha da čałavieka i čałaviečnaść. Prostaja spakojnaja razmova pamiž pasažyram i kiroŭcam, bieź lišnich niehatyŭnych emocyj z boku darosłaha, mahła b dapamahčy paźbiehnuć kanfliktu.

Sam kiroŭca rastłumačyŭ situacyju inakš. Pavodle jaho słoŭ, jon nie chacieŭ brać na siabie adkaznaść za žyćcio i zdaroŭje dziciaci, jakoje maje prablemy sa zdaroŭjem, i nastojvaŭ, kab chłopčyk jechaŭ u supravadžeńni darosłaha. Adnak u takim uzroście jon užo moža karystacca transpartam samastojna.

Što da frazy «Tabie mała zastałosia jeździć», to kiroŭca śćviardžaje, što mieŭ na ŭvazie tolki toje, što paśla dasiahnieńnia 18 hadoŭ chłopčyk stracić prava na biaspłatny prajezd. Pavodle jaho słoŭ, nijakich inšych namiokaŭ jon nie rabiŭ i jaho słovy nielha razumieć inakš.

Kiraŭnik transpartnaj kampanii asabista paprasiŭ prabačeńnia ŭ siamji i zapeŭniŭ, što ŭ budučyni padobnych situacyj bolš nie paŭtorycca.

Kamientary da artykuła