Na terytoryi Biełarusi vyjavili čatyry retranślatary dla rasijskich dronaŭ
Na praciahu minułaha i hetaha tydnia na terytoryi Biełarusi ŭ rajonach nasielenych punktaŭ Chojniki, Dzierbinka i Machnavičy Mazyrskaha rajona i Buda-Safijeŭka Lelčyckaha rajona byli vyjaŭlenyja čatyry retranślatary, jakija zabiaśpiečvali suviaź i kiravańnie reaktyŭnymi bieśpiłotnymi latalnymi aparatami, paviedamlaje ŭkrainski manitorynhavy kanał «jeRadar».
Na karcie paznačanaje prybliznaje raźmiaščeńnie ŭsich čatyroch vyjaŭlenych retranślataraŭ
Razhornutaja sietka retranślataraŭ značna pavialičyła dalokaść palotu bieśpiłotnikaŭ i dazvoliła im dasiahać terytoryi kala polskaj miažy.
Pavodle najaŭnaj infarmacyi, mienavita dziakujučy hetym retranślataram apieratary mahli kiravać bieśpiłotnikami ŭ režymie realnaha času. Jak śćviardžajecca, heta dazvoliła nanieści ŭdary pa ciahniku i zapravačnych stancyjach pablizu polskaj miažy.
Źviartajecca ŭvaha i na adlehłaść ad adnaho z vyjaŭlenych retranślataraŭ: ad apošniaha zafiksavanaha ŭ rajonie Budy-Safijeŭki da centra Vałynskaj vobłaści Łucka — krychu bolš za 250 kiłamietraŭ.
Pytańnie biełaruskich retranślataraŭ užo ŭzdymałasia ŭkrainskimi ŭładami raniej. 21 červienia prezident Ukrainy Uładzimir Zialenski zajaviŭ, što jaho publičnaje patrabavańnie da Minska demantavać abstalavańnie, jakoje rasijskija vajskoŭcy vykarystoŭvajuć dla atak pa Ukrainie, stała apošnim etapam. Da hetaha, pavodle jaho słoŭ, Kijeŭ nieadnarazova praz raźviedvalnyja kanały pieradavaŭ Alaksandru Łukašenku infarmacyju ab nieabchodnaści spynić techničnuju padtrymku hetaj sistemy.
24 červienia Zialenski paviedamiŭ, što retranślatary ŭ Biełarusi, jakija vykarystoŭvalisia dla karektavańnia ŭdaraŭ rasijskaha vojska pa Ukrainie, bolš nie pracujuć.
Adnak 30 červienia były hałoŭnakamandujučy Uzbrojenych sił Ukrainy Alaksandr Syrski zajaviŭ, što hetyja retranślatary na terytoryi Biełarusi nie byli demantavanyja. Apošnim časam ža pradstaŭniki roznych ukrainskich słužbaŭ zajaŭlajuć, što hetyja retranślatary aktyvizavalisia i ŭ tym liku dapamahajuć rasijskim dronam atakavać zachodnija vobłaści Ukrainy.
Čytajcie taksama:
Na poŭdni Biełarusi znoŭ zapracavali retranślatary dla naviadzieńnia rasijskich dronaŭ