«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk
Prezident Ukrainy adznačyŭ, što pakul nie atrymaŭ na jaho nijakaj reakcyi ad Łukašenki.
Uładzimir Zialenski patłumačyŭ, čamu vyrašyŭ vystavić publičny ŭltymatum Łukašenku.
Pavodle słoŭ ukrainskaha prezidenta, patrabavańnie demantavać retranślatary dla rasijskich dronaŭ u Bresckaj i Homielskaj abłaściach jon pieradavaŭ praź nieaficyjnyja kanały ŭžo daŭno. Adnak reakcyi nie było.
«Kali ja niešta rablu publična, ja pierad hetym rablu peŭnyja kroki pa deeskałacyi niepublična. Heta maja stratehija. Na ŭzroŭni raźviedak i vajskoŭcaŭ Biełaruś na ŭzroŭni kiraŭnictva atrymlivała infarmacyju: pierastavajcie dapamahać ruskim.
Historyja z retranślatarami — nie historyja ŭčorašniaha dnia. Heta doŭhi praces, za im stajać achviary z boku vyklučna Ukrainy. Technična jany kaardynujuć i dapamahajuć rasijskimi i iranskimi dronami bić pa ŭkrainskim nasielnictvie. Voś što adbyvajecca», — skazaŭ Zialenski ŭ intervju TSN.
Pavodle jaho słoŭ, Łukašenka atrymlivaŭ hetuju infarmacyju. I jon pavinien dziejničać, a nie prasić prabačeńnia.
«Łukašenka pavinien, akramia słoŭ, demanstravać deeskałacyju. Nie prosta słovami «Ja prašu prabačeńnia». Svajo «prašu prabačeńnia» jon niachaj sabie pakinie. Jano nie pracuje paśla pieršaha dnia pačatku vajny. Ja heta tłumačyŭ praz našu raźviedku i słužbu biaśpieki. Na roznych uzroŭniach u nas jość kantakt.
Ja jamu tłumačyŭ: patrebna demanstracyja kankretnych krokaŭ. Krok numar adzin — nijakaj techničnaj padtrymki. Retranślatary vyklučyć, źniać i pakazać nam, što jany źniatyja. I my zakryli hetaje pytańnie», — skazaŭ Zialenski.
Pakolki reakcyi na nieaficyjnyja papiaredžańni nie było, sprava dajšła da publičnaha ultymatumu.
«Pakolki heta pieradavałasia im nieadnarazova, my pierajšli ŭ stadyju publičnaha sihnału. Kali jon nie zdymie — my zdymiem. Heta zdarycca za tydzień. Abo jany, abo my», — zajaviŭ Zialenski.
Uładzimir Zialenski adznačyŭ, što pakul nie atrymlivaŭ nijakaj reakcyi na svaju zajavu. Pry hetym jaho nie cikaviać publičnyja słovy Łukašenki, a tolki dziejańni. Heta ž tyčycca i pastavak paliva dla rasijskaj armii.
Ciapier čytajuć
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary
[Zredahavana]